鐵甲威龍
| 鐵甲威龍 | |
|---|---|
 | |
| 資料明細 | |
| 導演 | 保羅韋浩雲 |
| 監製 | Jon Davison[*] |
| 編劇 | Edward Neumeier[*] Michael Miner[*] |
| 主演 | Peter Weller[*] Nancy Allen[*] Dan O'Herlihy[*] Ronny Cox[*] Kurtwood Smith[*] Miguel Ferrer[*] Ray Wise[*] Felton Perry[*] Paul McCrane[*] Edward Edwards[*] 保羅韋浩雲 |
| 攝影 | Jost Vacano[*] |
| 製片商 | Orion Pictures[*] |
| 產地 | 美國 |
| 話 | 英文 |
| 上畫同發行 | |
| 上畫日期 | 美國：1987年7月17號 瑞典：1988年1月15號 德國：1988年1月7號 1987 |
| 前集同續集 | |
| 續集 | 鐵甲威龍2 |
《鐵甲威龍》（RoboCop）係一部1987年嘅美國數碼鬅客動作電影，由保羅韋浩雲做導演，Edward Neumeier同Michael Miner編劇。主演係Peter Weller，其他配角有Nancy Allen、Dan O'Herlihy、Kurtwood Smith、Miguel Ferrer、Ronny Cox。
簡介
[編輯]第一集劇情主要講述鐵甲威龍誕生嘅前後同埋遭遇，而第二集同第三集都係講述鐵甲威龍所遇到嘅事同埋本身人性嘅心路歷程。
呢套戲入面其實隱伏咗好多社會問題，畀觀眾好多討論空間，比如：人死後其實重有冇可能變成機械咁嘅方式而繼續生存呢？經過死亡變成咗另一種存在方式之後，又會唔會重有前身嘅記憶？劇中嘅私營大財團 OCP 一直以接管底特律市 (Detroit City) 並計劃將佢改建成先進城市達爾他城 (Delta City) 為目標而不惜使用暗黑手段，導致社區遭到蠶食，現實會唔會發生？又會有咩後果？……等。除此之外，戲裏面重會時不時穿插住一啲似真還假嘅新聞報導同埋廣告，其中嘅訊息好多都關乎我哋週圍發生緊嘅環境，好似臭氧層出現減退，汽車排放廢氣問題，太空戰略計劃嘅問題……等，睇吓睇過嘅人有幾多領會。
第一集劇情大綱（含劇透）
[編輯]梅菲 (Alex Murphy) 係一位新調任到底特律市嘅機動警察，之不過喺佢第一次同拍檔露薏絲 (Anne Lewis) 出勤時就出咗意外，俾一班控制區內罪惡嘅賊匪團夥殺死咗，至於露薏絲就逃過一劫。
喺之前，擁有當地規劃兼有警隊管理權嘅大財團 OCP 公司 (Omni Consumer Products) 正研究緊發展機械警察及軍用機械人，因為由副總裁鍾斯 (Dick Jones) 推動嘅全機械設計 ED-209 喺示範操作中嚴重失誤，財團主席老人 (The Old Man) 感到非常失望，於是選用咗急於上位嘅技術主管摩頓 (Robert Morton) 嘅「人類改造鐵甲戰士」嘅計劃。
梅菲不幸殉職，其實都係因為摩頓利用職權去干預警方有關，令警員殉職嘅機率提高，就可以利用遺體嚟實行改造計劃。
因為咁，死咗嘅梅菲即刻被送到手術台，經過工程師嘅一輪改造之後，新一代擁有鐵甲身軀，但仍保有部份人類器官嘅半機械超級警察－－－鐵甲威龍 (ROBOCOP) 正式誕生。
鐵甲威龍嘅程式設定裏面，有三個佢一定要遵守嘅主要法則：
- 為公眾服務
- 保護無辜嘅市民
- 維持法紀
- ⋯⋯⋯⋯
經過洗腦之後，鐵甲威龍只有電腦記憶庫，所有關於梅菲前身嘅記憶理論上已經冇晒，之但係估唔到威龍居然會發夢，夢境係梅菲嘅零碎記憶同埋被殺嘅一刻，之後喺現實中，因為威龍流露出本身不自覺嘅小動作或者口頭禪， 畀某啲人認出佢機械人以前嘅身份，令到威龍覺得好困惑，「我究竟係乜嘢嚟？」，於是決定搵出原因。
威龍喺調查過程中知道警員梅菲如何殉職， 結合種種蛛絲馬跡，越諗越扯火，於是誓要搵出殺梅菲嘅嗰班人渣出嚟繩之於法。期間，晉升咗成為 OCP 副總裁嘅摩頓，一朝得志表現囂張，終於畀收柯打做嘢嘅人殺死；及後當威龍喺拘捕行動中以暴力迫供罪犯時，罪犯爆出原來喺背後操控犯罪，企圖令城市崩壞嘅主謀係⋯⋯。
之後威龍隻身前往拘捕主謀人，但係主謀人已經胸有成竹，老早收埋咗一樣秘密殺着，就係佢預先加咗喺威龍程式裏面嘅第四項法則；呢個時候，因為呢個第四法則喺適用條件下被啟動，威龍即時失控，攪到畀 ED-209 猛烈追擊，好彩負傷途中被同袍救走，帶到去到廢棄工廠暱埋。
喺另一邊，主謀人將公司最新研發嘅重型武器俾咗班賊匪團夥，於是班友拿拿林出動，根據追蹤器去廢棄工廠追擊威龍，當然威龍亦都早有準備，經過一輪游擊戰之後，呢班賊匪團夥最終都俾威龍造瓜晒。
當夜威龍即刻趕返去 OCP 大樓，直闖入會議室，當時班 OCP 高層大佬正喺度開緊會，威龍因為受到第四法則限制，於是先向與會一眾高層喺大屏幕展示主謀人嘅犯罪證據，主謀人知道自己仆咗街，於是掹鎗脅持人質要求畀直升機佢走佬，最後主謀人脅持失敗，畀威龍就地正法。
臨離開會議室時，有人問威龍：「靚仔鎗法唔錯吖，你叫咩名？」
威龍回頭一笑：「梅菲。」
演員
[編輯]- Peter Weller 飾演 Alex Murphy / 鐵甲威龍
- Nancy Allen 飾演 Anne Lewis
- Dan O'Herlihy 飾演 The Old Man
- Ronny Cox 飾演 Dick Jones
- Kurtwood Smith 飾演 Clarence Boddicker
- Miguel Ferrer 飾演 Bob Morton