閃光燈

閃光燈（粵拼：sim2 gwong1 dang1）係種可以提供短時間強光嘅燈，通常喺影相嘅時候用到。閃光燈發光時間通常喺1/1000－1/200秒之間。最早嘅閃光燈係鎂光燈，靠通電之後鎂嘅氧化反應來發光。而今嘅閃光燈多數係電子閃光燈，有靠充稀有氣體來發光，亦有用LED燈發光。

閃光燈一般會喺環境唔夠光嘅時候用，但係有啲場合會唔畀用，或者用咗都無效果。比如，對行緊嘅車或者其它交通工具用閃光燈會嚴重影響個司機，閃光燈照落古董道會加速表面氧化，照落動物或者孲𤘅子道會嚇親佢哋（後一種情況重會傷到佢對眼）。另外如果用閃光燈來影銀幕上啲嘢，或者對住塊玻璃用閃光燈想影到玻璃後面啲嘢，都只會影到白茫茫一片，達唔到想要嘅效果。

因為閃光燈喺短時間內提供嘅強光足以將人眼虹膜嘅紅色影出來，所以用閃光燈影人相好多時候會有「紅眼」。而今幾乎所有數碼相機都會有修正紅眼嘅功能。