關愛隊
關愛隊 (Care Teams)，全名「地區服務及關愛隊伍」(District Services & Community Care Teams)，係香港行政長官李家超喺2022年施政報告入面提出成立嘅地區組織。李家超話，全港18區會劃分成唔同小區，廣納地區組織同團體成為小區嘅「關愛隊」，包括青年同少數族裔。之前民政事務總署已經以「角色日漸式微」為理由，要求所有大廈互助委員會喺2023年1月1號之前解散[1]。
關愛隊成員嘅遴選工作由民政及青年事務局局長領導嘅「全港關愛隊評審及督導小組」同18區民政事務專員領導嘅「地區關愛隊評審及統籌小組」負責，由政府一手包辦。關愛隊會推展關愛活動，例如探訪有需要人士，民政事務處喺2023年第一季率先喺新界嘅荃灣區同港島嘅南區成立關愛隊，並逐步推廣至其它16區[2]。關愛隊初頭以10人團體為單位，每隊關愛隊設有隊長同副隊長。關愛隊無實權動員政府人員，同中國小區網格化嘅居民委員會有分別。關愛隊同政府之後會以協議形式合作，年期大約為兩年，期間由政府提供部分資源，身為首長級公務員嘅民政事務專員兼任當區關愛隊總指揮。
最初，政府消息人士無講明預計每隊關愛隊獲資助嘅金額，只係話會因應建議書構思而有所唔同[3]。之後，政府話會為關愛隊提供部分資源，每小隊喺兩年資助期嘅總資助金額大約為80至120萬元[4]，亦會因應小區特殊情況，考慮提供高過規定金額嘅資助[5]。
攷
[編輯]- ↑ 〈全港逾1600個互委會明年初解散 團體向立法會申訴民政處行政失當〉。香港01。2022-09-16。喺2022-12-31搵到。
- ↑ 〈18區設「地區服務及關愛隊伍」 並重組扶貧委員會〉。hk.news.yahoo.com (中文)。原先內容歸檔喺2022-10-30。喺2022-10-20搵到。
- ↑ 〈【施政報告】消息人士:18區關愛隊未悉整個計劃預算〉。《信報網站 hkej.com》。原先內容歸檔喺2022-10-20。喺2022-10-20搵到。
- ↑ 〈民政事務總署 - 公共服務 - 地區服務及關愛隊伍(關愛隊) - 關愛隊概要〉。www.had.gov.hk。喺2023-03-31搵到。
- ↑ 〈因應關愛隊特殊情況 會提供高於120萬元資助〉。《Now 新聞》 (香港中文)。喺2023-04-07搵到。