民政事務專員

民政事務專員係香港民政事務總署各區民政事務處嘅主管，亦係香港政府派駐落地區層面嘅最高級公務員，一般由首長級丙級政務官出任，個別由高級首席行政主任出任，職級屬於首長級薪級第2點。自2024年政府推行「完善地區治理」後，民政事務專員亦兼任嗰區嘅區議會主席。

各區民政事務專員

内文：民政事務專員一覽

沿革

1968年香港政府參考新界實行嘅理民府理民官（District Officer）制度，將港九市區劃分做10個區，即係西區、中區、灣仔區、東區、深水埗區、旺角區、油尖區、九龍城區、黃大仙區同觀塘區，實行民政主任計劃，每區設民政署 （City District Office），以市區民政主任（City District Officer）為首長。1982年10月1號地方行政計劃正式實施，理民官同埋民政主任統一叫做政務專員（英文叫District Officer）；1997年7月1號中文名再改做民政事務專員。

爭議

喺2019年區議會選舉後，由於民主派議員喺18區區議會攞到大多數民選議席，令到民主派成功控制多區區議會。之後，民主派喺區議會會議上多次提出唔同動議或議案，都被多區嘅民政事務專員故意阻撓或反對，令議案或會議冇辦法順利通過，因此畀市民同區議員質疑身為公務員嘅民政事務專員有冇盡忠職守，係唔係政治唔中立，偏袒香港政府同親中派。