香港特別行政區財政司司長

香港特別行政區財政司司長（英文：Financial Secretary，簡稱FS，財政司司長，繼承英國殖民地時代嘅財政司，(俗稱財爺)係香港政府專門負責財經同金融政策嘅官員，直接向行政長官負責，佢嘅支援部門叫財政司司長辦公室。司長由行政長官提名，報畀國務院（中央人民政府）任命。

現任財政司司長係陳茂波。

職責

財政司司長

協助行政長官督導財經、金融、經濟、貿易同發展，同創新科技範疇政策嘅制定同實施，並喺金融管理局嘅協助之下管理外匯基金。財政司司長亦係行政會議成員。

此外，財政司司長負責編製政府財政預算案，並根據《公共財政條例》，每年向立法會提交政府嘅收支預算。財政司司長喺每年發表嘅財政預算案演詞，概述政府對可持續經濟發展嘅理念同政策，提出財政預算建議，並動議通過《撥款條例草案》，令到每年預算案當中各項開支建議具有法律效力。

財政司副司長

協助財政司司長協調跨決策局同部門嘅政策制訂同推行，督導轄下嘅決策局。財政司副司長亦擔任行政會議成員，協助行政長官決策，按照行政長官或財政司司長嘅指示，處理指定嘅政策範疇同特定項目。

財政司副司長負責聯繫立法會同其他持份者並聽取意見，同埋向佢哋、公眾同傳媒解釋政策。財政司副司長喺財政司司長因為外訪或休假缺勤期間代理佢嘅職務。

歷任財政司司長

1. 曾蔭權（1997年7月1號—2001年4月30號）
2. 梁錦松（2001年5月1號—2003年7月16號）
3. 唐英年（2003年8月5號—2007年6月30號）
4. 曾俊華（2007年7月1號—2017年1月16號）
5. 陳茂波（2017年1月16號—）
6. 黃偉綸(署理)

歷任財政司副司長

1. 黃偉綸（2022年7月1號—）

福利同待遇

• 會獲編配財政司司長官邸，位於香港島壽山村道45號
• 坐駕嘅專用車牌係FS，係英文「Financial Secretary」嘅簡寫
• 月薪為HK$36萬

出面網頁

• 香港特別行政區政府 - 財政司司長