陳金兒

陳金兒，香港親中派傳媒人兼生意人，奧斯汀學校（前身香港凱莉山學校）負責人，曾經做過大公網香港營運中心總監。

生平

陳金兒祖籍福建，80年代喺13歲嚟香港同屋企人團聚，曾經喺毛冷廠打工同埋喺金行當售貨員。19歲嘅時候曾經創業開時裝舖，去到1992年，佢經喺屯門區開設天賜地產，之後賺到第一桶金。

政治立場

佢係香港親中派成員，除咗本身做過大公網高層之外，喺2016年香港立法會選舉亦曾經公開同民建聯同工聯會拉票。另外，佢亦不時出席一啲親中派組織嘅活動。佢喺任職香港柯士甸學校嘅時候，亦有大力推動學校同中國學校嘅交流。

部分公職

• 香港陳氏宗親總會副會長

爭議

被指資助洞鈜法師食肉

資深藝人翁靜晶喺2024年3月上載慈山寺前住持「洞鈜法師」食肉嘅影片，震驚香港社會。翁之後搵嚟洞鈜法師嘅功德主陳金兒接受訪問並當面對質。陳金兒承認自己有向洞鈜法師提供肉湯，又話自己因此承受報應。

獲取野雞大學學歷

佢報稱有博士學位，但有啲網民質疑佢嘅學位邊度嚟，喺2024年2月佢接受翁靜晶訪問嘅時候，翁提到呢件事，陳就只係支吾而對，聲稱由香港一所亞洲學院向佢頒發，強調唔係買，亦唔係假。之後，翁靜晶喺社交媒體揭露佢嘅博士學位由『亞洲知識管理學院』頒發，係假學位。而早在2019年，香港有線新聞亦揭露咗呢間其實係野雞大學，比錢就有得攞佢哋唔同嘅頭銜。