陸榮廷

陸榮廷（1856年—1928年），原名陸亞宋，字幹卿，係清末民初嗰時嘅政治人物，舊桂系嘅首領。

陸榮廷係壯族人，喺廣西武鳴縣出世。響清末時係廣西提督，辛亥革命時響應革命，民國成立後就做咗廣西都督。1915年佢以反對袁世凱稱帝做理由，揮軍廣東，做埋廣東督軍，1917年升做兩廣巡閱使。

1920年，孫中山響廣州成立嘅軍政府派陳炯明攞走陸榮廷控制嘅廣東，1921年再攞埋廣西。陸榮廷冇晒權力，最後1928年響上海死咗。

評價[編輯]

孫文話：『我公（陸榮廷）再造民國，勛在宇宙』。
馬君武亦話：『於廣西，為廣西有數人物；於共和政體，為民國有數人物。將來共和史之開篇，有一極重要嘅人物，舍公其誰？』。
章太炎講：『君老於戎事，軍行遇百姓有恩，初治廣西，群盜屏跡。其後仍歲出師，未嘗加賦，囊中無余金銀，遇士大夫尤謙下』。
梁啟超亦講：『廣西將軍陸榮廷，自帝制發生，特緣地勢關系，發之不能太驟，及滇軍喺川與袁軍相持，事趨危急，陸君崛起以促時局之解決。嗰陣時兩軍成敗，間不容發，廣西獨立，實茲役最重要之樞紐也』。
黎元洪都話：『陸公治軍數十年，佢境況仍唔如一團長，誠廉潔可見也』。
李宗仁話過：『廣西耀武上將軍陸榮廷揭櫫義旗，響應雲南獨立，而護國戰役中南北優劣之局，因此頓形改觀，此舉實為洪憲帝覆亡，護國運動勝利之關鍵』。
鈕永建講道：『幹公護國護法，兩次興師，偉業豐功，聲施華夏，茲聞逝世，不勝悲感』。
國民政府嘅「褒揚令」寫到：「陸榮廷任廣西都督，叠膺兼圻，聲譽甚著，討袁之役，率先響應義師，尤彰功勛。今逝世已久，遺愛在民，經廣西臨時參議會咨由廣西省政府呈請行政院轉呈褒揚前來，特予明令褒揚，以示政府篤念舊勛之至意，此令。」

相傳陸榮廷做緊兩廣巡閱使嗰陣，想搵個相士去睇相，但係又驚相士睇得出佢係達官貴人，所以就扮到好似個窮人咁去睇相。相士見到有個窮人去睇相，當然奚落佢，將佢講到好衰。結果不出幾年，陸榮廷真係冇晒權勢，最後重鬱鬱而終。

所以廣東人就有句俗語叫：「陸榮廷睇相，唔衰攞嚟衰」，後尾傳下傳下，就變做：「陸雲廷睇相，唔衰攞嚟衰」。