青木建設

首條新幹線青木建設有份起

沙田污水處理廠

青木建設係日本建築公司，一九四七年成立，全名株式會社青木建設，全盛時日本、香港同臺灣，都接咗好多建築項目，亦曾涉及非本業生意，曾擁有威士汀酒店同其下酒店。日本來講，二十世紀九十年代，去到中遊總承建商。二〇〇一年申破產保護令，形同破產，二〇〇四年同翌檜建設合拼，成立翌檜青木建設。二〇一九年，合拼公司除牌，化為髙松建設集團子公司。

青木建設由青木益次所創立。而佢本身做過大日本帝國海軍司令。一九四七年，公司初名剷泥車工事株式会社，以大阪為大本營，發蹟關西，一九四八年開東京寫字樓，同年引入外國剷泥車。一九五七年，當時日本要起首條高速公路，橫濱新道，公司參與其中。一九六四年，起東海道新幹線綾瀨段。一九六九年改名青木建設。由於佢後起，實情比唔上國際級大型建築公司，故此亦發展其他業務，涉及酒店業以得更多工程。

香港

青木建設喺香港接過好大單嘢。香港地鐵車站有大窩口站、杏花邨站、香港站、東涌站。九廣鐵路有筆架山隧道。公路有北大嶼山公路陰澳段、西九龍公路南段。又有沙田污水處理廠第一期、屯門醫院、宏利保險大廈，以及康山花園地盤平整。

一九九三年六月二號，公司負責中華煤氣大廈工程，出咗單冧籠𨋢意外，好嚴重地盤意外。十二工人天臺坐籠𨋢，保險措施無法煞停，直冧到底，全部死晒，而且當中有未成年，震驚全港。公司因而備受批評。