順化皇城

出自維基百科,自由嘅百科全書
Jump to navigation Jump to search
順化故都遺跡建築群
Welterbe.svg 聯合國教科文組織認定嘅世界遺產
PalaisHarmonie.jpg
順化皇城
登錄原文名
英文 Complex of Hué Monuments
法文 Ensemble de monuments de Huê
基礎信息
 越南
承天順化省順化市
座標 16°28′11″N 107°34′40″E / 16.46972°N 107.57778°E / 16.46972; 107.57778座標: 16°28′11″N 107°34′40″E / 16.46972°N 107.57778°E / 16.46972; 107.57778
文化遺產
標準 iv
678
登錄史
登錄年份 1993年 (第17屆)

順化皇城粵拼seon6 faa3 wong4 sing4越南文Hoàng thành Huế皇城化),又叫大內daai6 noi6Đại Nội大内),喺越南承天順化省順化市順化古城嘅中央,係越南阮朝故宮,亦係越南現存規模最大嘅古建築羣。1993年同順化京城一齊以「順化故都遺跡建築群」嘅名義列入聯合國教科文組織世界文化遺產名錄。

歷史[編輯]

順化本來係屬於占城,後尾畀越南攞咗。鄭阮紛爭時期,順化成為廣南阮主嘅統治中心。1635年到1687年,廣南阮氏領主阮福瀾(神宗)、阮福瀕(太宗)喺度建立金龍城作為京城。之後經過阮福溙(英宗)、阮福濶(世宗)兩代人嘅擴建,改名富春Phú Xuân富春)。阮福濶喺度起咗金華殿、光華殿、瑤池閣、朝陽閣、光文殿、就樂殿、正冠堂、中和堂、怡然堂、暢春堂、瑞雲亭、同樂軒、內院庵、絳香亭等等嘅宮殿亭閣,並喺香江上游起咗建陽春府,裡面有長樂殿、閱武軒等等嘅建築[1]

阮福映建立阮朝、定都順化之後,喺原有宮殿嘅基礎上,仿照北京紫禁城嘅規制,大規模擴建皇宮。嘉隆三年(1804年)四月,開始宮城營建工作,負責人有阮文謙、黎質、范文仁[2]等等。

佈局[編輯]

順化皇城位於順化京城南面,係正方形佈局,採取中軸對稱嘅平面佈置,起咗城牆,四面圍有護城河。南邊嘅正門係午門,午門入面係正殿太和殿。太和殿嘅左邊係太廟、肇廟,右邊係世廟、興廟,北邊係大宮門,門入面係阮朝嘅帝后妃嬪同太子等人居住嘅紫禁城。喺紫禁城嘅外西側有太后同太妃住嘅壽祉宮、興寧宮,而外東側有御苑幾暇園同瀛洲。皇城裡面重有內務府、御醫院、尚膳所、象廠、馬廠等等嘅服務性建築。

城牆[編輯]

順化皇城嘅城牆,周長六百四十丈一尺(2500米),南北長一百五十一丈(604米),東西寬一百五十五丈五尺(620米)。城牆高一丈五寸(6.5米),厚二尺六寸(1.04米)[3]

  • 金水池,係順化皇城嘅護城河,喺嘉隆年間開鑿,明命十四年擴建。

城門、城台[編輯]

午門[編輯]

午門Ngọ Môn)係順化皇城南邊嘅正門。佢嘅前身係南關台,係凸出皇城城牆嘅長方形墩台建築,係嘉隆年間起嘅,台上有乾元殿。台下面嘅左右城牆都有開門,東邊係左端門,裡面有文公署,西邊係右端門,裡面有武公署。明命四年(1823年),文、武公署改名做左、右朝堂[4]。明命十三年(1832年)八月,阮朝聖祖(明命帝)下令將南關台改建做午門,明命十四年正月起好。

改建之後嘅午門,係模仿清朝北京皇宮午門,平面係凹字形,城台開五道門闕:中央嗰道門叫午門,係阮朝皇帝專用嘅門道;午門兩邊嘅門道係左右夾門,再外邊嘅兩個門道係左右闕門。城台上面起有五鳳樓,左右雙闕上設有待漏院[5]。1945年8月30日,保大帝喺午門城樓舉行退位儀式,將象徵住權力嘅國璽同寶劍交畀越南獨立同盟會嘅代表陳輝燎、阮良朋同古輝近。

大旗台[編輯]

大旗台Kỳ Đài)位於午門出面,喺嘉隆八年(1809年)起,紹治六年(1846年)改建,正面同御屏山遙相對應。旗台分做三層,下層高一丈四尺(5.12米),中層高一丈四尺五寸(5.80米),上層高一丈五尺(6米)。有儀式活動嗰陣,旗台就升掛旗幟,平時就做瞭望台。旗桿最初係木造,分成兩段,高29.5米,上設望鬥(瞭望哨位);後尾因為幾次都畀颱風折斷,喺成泰十年(1904年)換成鋼管,分做三段,高57米。1947年旗桿喺法越戰爭之中再次被毀,第二年用鋼筋石屎接返好。

其他城門、城台[編輯]

  • 東關台,設喺皇城嘅東牆正中,係凸出城牆之外嘅長方形墩台。墩台下邊正對住護城河上面嘅橋樑,進入皇城必須由台下經過,從城台右側嘅顯仁門入城。呢種設計喺打仗嗰時,可以憑藉關台居高臨下,阻擊宮城出面嘅敵人。
  • 顯仁門Cửa Hiển Nhơn),位於東關台嘅右邊(南面),係順化皇城嘅東門。佢係兩層牌坊式石建築,下層闢有三道拱券門洞,上層為三券,上覆黃色琉璃瓦同火柱、日輪等磚雕。而門柱上有青瓷同彩色琉璃浮雕。
  • 西關台,設喺皇城嘅西牆正中,係凸出城牆之外嘅長方形墩台。
  • 彰德門Cửa Chương Đức),位於西關台嘅左邊(南面),係順化皇城嘅西門。形制同顯仁門一樣。
  • 北關台,位於皇城嘅北牆正中,係凸出城牆之外嘅長方形墩台。1923年,啟定帝喺台上起咗四方無事樓Lầu Tứ Phương Vô Sự)。1968年毀於順化戰役,2001年重建。
  • 和平門Cửa Hoà Bình),位於北關台嘅右邊(東面),係順化皇城嘅北門。喺嘉隆三年起,初頭叫做拱辰門。明命二年(1821年)五月改名做地平門,明命十四年再改名做和平門。成泰六年(1894年)有維修過,保大八年(1933年)再次改建。現存城門嘅形制係三開間門廳式建築,闢三門,外牆塗做黃色,上覆黑色屋瓦。

皇城嘅四個城台同四道城門,而家仍然保存完好。

太和殿[編輯]

太和殿Điện Thái Hoà)位於午門入面,太液池嘅北邊,嘉隆三年(1804年)開始起,嘉隆四年正月完工。嘉隆五年五月,阮朝世祖阮福映喺太和殿舉行登基典禮,陳設大朝儀,羣臣進奉金冊[6]

太和殿最初係喺現地址嘅北邊,即係而家嘅大宮門嗰度。明命十三年(1832年)八月,明命帝下令將太極殿移到南邊嘅空地「將軍廠」重建,喺午門嘅所在位置起大宮門,作為皇城嘅正門[7]。成泰三年(1891年)、十一年(1899年)曾經維修過太和殿,1923年為咗慶祝啟定帝嘅四十大壽而再次擴建。

太和殿係前後兩殿相連而成,面闊九間,進深七間,面積大約有1200平方米,屋頂重簷,鋪黃色琉璃瓦,並嵌有彩色瓷雕同御製詩歌瓷片。太和殿殿基高兩米,中闢七門,喺殿內嘅裡頭設有皇帝寶座同寶遮。殿裡面有80條木質立柱,都係髹朱漆,裝飾有金漆雲龍浮雕,地面係鋪花石同黑色大理石。

太和殿前面有清化石砌成嘅石台丹陛,叫做大朝儀或者大朝院Sân Đại Triều),分為第一拜庭和第二拜庭兩級,喺丹陛嘅下面,陳設有銅製鍍金嘅獅子。太和殿嘅南面係太液湖Hồ Thái Dịch),湖上面有中道橋Cầu Trung Đạo),橋上起有兩座銅製嘅櫺星門,兩道門嘅南面題額分別係「正直蕩平」、「高明悠久」,北面題額分別係「居仁由義」、「中和位育」。太液湖嘅東邊係左待漏院,西邊係右待漏院。

太和殿係越南阮朝皇帝權力嘅象徵,亦係舉行皇帝登基、皇帝壽誕、迎接重要使臣,同埋每月(農曆初一、十五)舉辦兩次嘅大朝儀等等重要朝儀嘅地方。舉行大朝儀嗰陣,太和殿入面就擺皇帝寶座,祗有四柱官同皇親國戚先至可以入殿謁見。其他官員都要喺大朝院,由正一品排隊到從九品,文官企喺左邊,武將企喺右邊。從正一品到從九品嘅位階,都記低喺朝院嘅兩行石標度,官員就根據石標嘅位置確定自己企喺邊度。

法越戰爭之中,法軍同越盟嘅軍隊曾經喺1947年2月喺順化皇城入面打仗。雖然太和殿喺呢場仗度完好無損,但就喺1968年嘅順化戰役裡頭受破壞,1970年重建,跟住喺1981年、1985年同1992年都多次進行維修。

宗廟[編輯]

太廟、肇廟[編輯]

太廟Thái Miếu),又叫做太祖廟Thái Tổ Miếu),位於太和殿東邊,皇城嘅東南角。原本係廣南阮主祭祀祖先嘅宗廟,西山阮朝嗰陣被毀。嘉隆元年(1802年),阮福映攞返富春,喺原太廟嘅位置設立臨時拜殿,嘉隆六年(1807年)再命黎文豐主持修復太廟。嘉隆十八年(1819年)太廟起成,主持者張進寶、阮文雲、阮科明等人同從役軍士獲賞5000緡[8]。明命元年又起太廟神庫、神廚。

太廟面闊九間,周圍設有迴廊,殿內中央供奉廣南國九代阮主嘅神主牌。正中間係太祖嘉裕帝(仙主)阮潢同皇后嘅牌位,其他各帝后嘅神位就按昭穆順序佈置。左邊昭位依次係熙宗孝文帝(佛主)阮福源、太宗孝哲帝(賢主)阮福瀕、顯宗孝明帝(明主)阮福淍、世宗孝武帝(武主)阮福濶(阮福映之祖父)同佢哋嘅皇后;右邊穆位依次係神宗孝昭帝(上主)阮福瀾、英宗孝義帝(義主)阮福溙、肅宗孝寧帝(寧主)阮福澍、睿宗孝定帝(定主)阮福淳同佢哋嘅皇后[9]

太廟東邊係隆德殿(祭祀太祖)同埋昭敬殿(祭祀世宗),西邊係穆思殿(祭祀睿宗),每年喺皇帝忌日嗰時舉行祭祀典禮。而穆思殿北側嘅小殿就祭祀土地神。太廟正殿嘅前庭係穆清閣,樓下係門道,明命十一年(1830年)改名綏成閣,成泰年間拆除。綏成閣左右係矮牆,東面係延禧門,佢上面係鍾樓,西面為光禧門,佢上面係鼓樓。矮牆出面有左右廡,喺嘉隆十二年起,供奉阮朝嘅建國元勳、功臣。太廟嘅四圍起有圍牆,東門係顯承門,西面係肅相門,北牆東邊係元祉門,西邊係長祐門。綏成閣南面係太廟門,門前嘅左右擺咗對石獅。

肇廟Triệu Miếu),又叫做肇祖廟Triệu Tổ Miếu),位於太廟牆外北邊,內務府嘅南面,係嘉隆三年起。原名「皇考廟」,祭祀廣南國太祖嘉裕皇帝阮潢嘅老竇阮淦(肇祖靖皇帝)神主。正殿係越南特有嘅前後兩楹建築,周圍有迴廊,東邊係神庫,西邊係神廚,東、西、北方起有小塔。肇廟四周圍牆,北牆開集慶門、衍慶門,南牆開元祉門、長裕門。

太廟喺1947年法越戰爭嘅時候焚毀,肇廟重喺度。

世廟、興廟[編輯]

世廟Thế Miếu),又叫做世祖廟Thế Tổ Miếu),位於太和殿西邊,皇城嘅西南角。喺明命二年起,係供奉阮朝諸帝神位嘅宗廟。正中間係世祖高皇帝(嘉隆帝)阮福映、承天皇后、順天皇后嘅神位,左邊昭位依次係聖祖仁皇帝(明命帝)阮福晈、翼宗英皇帝(嗣德帝)阮福時、景宗純皇帝(同慶帝)阮福昪同佢哋皇后嘅神位;右邊穆位依次係憲祖章皇帝(紹治帝)阮福暶、簡宗毅皇帝(建福帝)阮福昊、弘宗宣皇帝(啟定帝)阮福晙同佢哋皇后嘅神位。被廢同被迫退位嘅恭宗(育德帝)、朗國公(協和帝)、咸宜帝成泰帝維新帝重有末代保大帝嘅神主都冇入到世廟。但而家重修後,咸宜、成泰入咗昭位,維新入咗穆位。

世廟正殿嘅前庭係顯臨閣Hiển Lâm Các),形制類似太廟嘅綏成閣,左邊係峻烈門,佢上面係鐘樓;西邊係豐功門(後尾改名咗崇功門),佢上面係鼓樓。世廟東面係更衣殿,西面係土地神祠。世廟周圍有圍牆,東門係啟迪門,西門係崇成門,北牆東邊係顯祐門,西邊係篤祐門,南邊係世廟門。

顯臨閣嘅後庭(北面)陳列有九鼎Cửu Đỉnh),喺明命十七年(1836年)鑄造,鼎上面有日月、山川、花草等圖案。九鼎以廣南阮主同阮朝皇帝嘅諡號命名,中央係高鼎(Cao đỉnh),高153厘米,直徑101厘米,左一係仁鼎(Nhân đỉnh),左二係英鼎(Anh đỉnh),左三係純鼎(Thuần đỉnh),左四係裕鼎(Dụ đỉnh);右一係章鼎(Chương đỉnh),右二係毅鼎(Nghị đỉnh),右三係宣鼎(Tuyên đỉnh),右四係玄鼎(Huyền đỉnh)。

興廟Hưng Miếu),又叫做興​​祖廟Hưng Tổ Miếu),位於世廟牆外北面,奉先殿嘅南邊。喺明命二年(1821年)起,正殿係越南特有嘅前後兩楹建築,四周圍有迴廊。殿內供奉阮朝開國世祖高皇帝嘅老竇,廣南武主嘅仔阮福㫻(興祖孝康皇帝)同皇后。興廟殿前面同左右係三面圍牆,東面係章慶門,西面係毓慶門,南牆兩個門同世廟北牆嘅兩個門相重,分別係應祥門(世廟應祐門)同致祥門(世廟顯祐門)。

世廟同九鼎重喺度,但興廟就毀於1947年嘅法越戰爭中,1951年由端徽皇太后出資重建。

奉先殿[編輯]

奉先殿Điện Phụng Tiên)位於肇廟北面,皇城嘅西邊,同彰德門、西關台好近。喺嘉隆十三年(1814年)三月起,初頭叫做皇仁殿。最初係攞來停放嘉隆帝皇后嘅梓宮,嘉隆十八年又停放嘉隆帝嘅梓宮,後廊安置​​先帝側妾居住,明命元年遷往新營建嘅慈壽宮。明命十年改名奉先殿,前楹十一間,正楹九間,殿內供奉嘉隆、明命、紹治、嗣德四帝同諸皇后嘅神位。

奉先殿喺1968年順化戰役嘅時候燒咗,而家得返圍牆、殿基同廟門遺跡。

紫禁城[編輯]

紫禁城Tử Cấm Thành),又叫做宮城Cung thành宮城),位於皇城中央嘅偏后區域,嘉隆元年(1802年)十一月規劃[10],明命三年(1822年)將太和殿南遷,常朝同內寢區域起圍牆,改名做紫禁城,主要建築都係黃色外牆。城牆高九尺三寸(2.81米),厚一尺五寸(0.54米),周長三百零六丈(930米),東西寬八十一丈(245米),南北深七十二丈六尺(220米)。

紫禁城總共有七道門。南面正門係大宮門,東面係興慶門、東安門,西面係嘉祥門、西安門,北面係祥鸞門、儀鳳門。紫禁城採取中軸對稱佈局,大宮門、勤政殿、乾成殿、坤泰殿、建中樓形成一條中央軸線,兩邊對稱佈置嘅係左廡、右廡,文明殿、武顯殿,光明殿、貞明殿,養心院、順徽院,外圍就佈置閱是堂、太平樓、紹芳園、六院,同埋內務府、侍衛值房、尚膳所、御醫院等等嘅內廷服務機構。

勤政殿區域[編輯]

  • 大宮門Đại Cung môn),喺明命十四年起。原本嘅位置係太和殿,左邊係左肅門,右邊係右肅門。明命十四年起大宮門,門額係「乾成宮」三個字。
  • 勤政殿({{lang|vi|Điện Cần Chánh),始建於嘉隆三年(1804年,後尾喺嘉隆十年(1811年)、嘉隆十八年(1819年)、明命十二年(1831年)、成泰十一年(1899年)多次重修。外觀同太和殿類似,面闊九間,係阮朝皇帝處理政事、接見外國使臣嘅常朝殿。
  • 文明殿Điện Văn Minh),喺明命五年起,喺勤政殿東面,初頭叫做武顯殿,明命十四年改名,係便殿同朝議嘅地方。
  • 武顯殿Điện Võ Hiển),喺明命五年起,喺勤政殿西邊,初頭叫文明殿,明命十四年改名,係便殿。
  • 左廡Tả vu),位於勤政殿前庭嘅東廡。右值房係機密院辦公處,左值房係內閣辦公處。
  • 右廡Hữu vu),位於勤政殿前庭嘅西廡,左右值房都係內閣辦公處。

呢個區域嘅所有建築,除咗左、右廡之外,其他都喺1968年順化戰役受到徹底破壞。

乾成殿區域[編輯]

  • 乾成殿Điện Càn Thành),位於勤政殿嘅北面,係皇帝寢宮。喺嘉隆三年起,初頭叫中和殿[11],明命十四年(1833年)改名做乾泰殿,係前後兩楹建築,面闊九間,前殿叫做乾成宮。
  • 光明殿Điện Quang Minh),喺嘉隆九年起,喺乾成殿前庭嘅東面,係太子嘅寢宮。
  • 貞明殿Điện Trinh Minh),喺嘉隆九年起,喺乾成殿前庭嘅西邊。
  • 明慎殿,喺明命十一年起,喺乾成殿嘅東軒,殿前有光文池,池西係四方無事閣,池北係自僵樓,池東係日成樓。成泰年間拆除。

呢區所有建築全部喺1968年嘅順化戰役期間被徹底破壞。

坤泰殿區域[編輯]

  • 坤泰殿Điện Khôn Thái),位於乾成殿北邊,係皇后寢宮,面闊九間。喺嘉隆六年起,初頭叫坤元宮,明命十四年將前楹改名做「高明中正殿」。
  • 養心院Viện Dưỡng Tâm),位於坤泰殿前庭嘅東面,院嘅東邊係清暇書樓,樓嘅北面係淡然書舍,都喺成泰年間拆咗。
  • 順徽院Viện Thuận Huy),位於坤泰殿前庭嘅西邊,係后宮「六院」(Lục Viện)嘅首院。
  • 靜觀院,位於高明中正殿嘅東軒,北面係澄光榭,榭嘅北邊係內御河。

呢區所有建築全部喺1968年嘅順化戰役期間被徹底破壞。

建中樓區域[編輯]

  • 建中樓Lầu Kiến Trung),喺紫禁城中軸線嘅北邊,樓東係紫禁城嘅東北門祥鸞門,西面係紫禁城嘅西北門儀鳳門。原本係明命八年(1824年)起嘅明遠樓,呢棟樓畀紹治帝列做「神京二十景」之一嘅「重明遠照」。嗣德二十九年(1876年)因為建築老朽而拆咗。維新七年(1913年)喺原址起悠久樓,係夾雜越南風格嘅法式樓房建築。啟定六年(1921年)擴建,啟定八年(1923年)完工,並改名做建中樓,係面闊66米嘅巴洛克式樓房。阮朝末年,保大帝同皇后經常住喺度。1947年2月,建中樓喺法越戰爭中被摧毀,而家得返建築基址。
  • 御前文房Ngự Tiền Văn phòng),位於建中樓嘅東面,係御前文書機構,1947年2月被摧毀。

閱是堂區域[編輯]

  • 閱是堂Duyệt Thị Đường),位於光明殿東牆出面,是宮入面嘅戲樓,亦係順化皇城裡面體量最大嘅建築之一。喺明命七年(1826年)起,裡面係兩層樓閣。1962年改做順化國立音樂學院嘅校址。
  • 太平樓Thái Bình Lâu),喺閱是堂嘅東邊,係皇家藏書樓。
  • 尚膳所,喺閱是堂嘅南面,喺嗣德六年(1853年)起。
  • 御醫院,喺尚膳所嘅東邊,喺嗣德六年起。南牆出面係侍衛值房、謹信司、儀仗庫等機構。

呢區嘅建築多數毀於戰亂同修繕不善,閱是堂已經喺1995至2002年間重建咗,成為越南古代宮廷音樂嘅演出場地。

其他建築[編輯]

  • 紹芳園Vườn Ngự Uyển),位於閱是堂北牆出面,紫禁城嘅東北角,係皇帝御花園,面積大約佔紫禁城嘅六分之一。園內由紫禁城出面嘅金水湖引水,開鑿玉液池,東牆起有城隍廟,供奉皇城城隍同靈應神。園內有平面呈卍字形嘅皇福殿,同埋八角亭、明達四亭、仁智堂、太平御覽書樓、翠光樓、弘恩寺、威靈相祐廟(關帝廟)等建築,後尾都喺成泰年間拆咗[12]
  • 六院Lục Viện),位於紫禁城嘅西北角,包括坤泰殿西廡嘅順徽院Viện Thuận Huy),同埋位於佢西邊嘅端順院Viện Đoan Thuận)、端和院Viện Đoan Hoà)、端徽院Viện Đoan Huy)、端莊院Viện Đoan Tường)、端祥院Viện Đoan Trang)六組院落,係阮朝妃嬪居住嘅后宮區域,而家已經冇咗。

西路后宮[編輯]

  • 延壽宮Cung Diên Thọ),又叫壽祉宮,係皇太后嘅寢宮,位於紫禁城西牆出面,奉先殿嘅北邊,長生宮嘅南邊。正門係壽祉門,門入面係壽祉宮,壽祉宮之後係寧壽宮。寧壽宮原本叫長壽宮,係嘉隆三年(1804年)起嘅。嘉隆十五年,為咗同皇太子起清和殿,所以拆咗長壽宮,攞佢啲木料來用。明命元年(1820年)重建,改名做慈壽宮。嗣德帝時期改叫嘉壽殿,成泰十三年(1901年)又改返做寧壽宮。壽祉宮前庭嘅西邊,係越南風格嘅兩層樓房靜明樓,喺保大七年(1932年)起,係同慶帝皇后養病嘅地方。1947年建中樓喺法越戰爭嘅時候被破壞,保大帝試過住喺呢度。壽祉宮前庭嘅東面係左恭,有長廊同紫禁城坤泰殿相連(而家冇咗)。
  • 長生宮Cung Trường Sanh),又叫長寧宮(Cung Trường Ninh),位於延壽宮嘅北面,皇城嘅西北角,係太皇太后嘅寢宮,喺明命三年(1822年)起。喺長生宮同延壽宮之間,曾經起有五代同堂(壽泰殿)同埋萬福樓,後尾拆咗。

苑囿[編輯]

  • 幾暇園Vườn Cơ Hạ),位於皇城嘅東北角,明命帝即位之前曾經喺度住過,呢度重設有天府(內庫)。明命帝即位之後,喺明命十八年(1837年)大幅度增建、擴建。園內有欽文閣、賞勝樓、和風榭、可月廊、福聚洞、湖津柳浪、賽武江等景點。欽文閣係阮朝皇帝舉行經筵儀式嘅地方,成泰十七年(1904年)拆咗。園嘅北邊係金水湖,湖嘅中間係瀛洲島。
  • 瀛洲,位於和平門內嘅東北角,係以金水湖同瀛洲島為中心嘅水景景區,有海靜年豐閣、無限意樓、成樓、吉雲堂、思蔭榭、誠心榭、傳心榭、湖心亭、觀德亭、八風從律亭、步月亭、掖香亭、七檻亭、蔭綠軒、清可居、倦槎、安舫、天壺島、鎮北島、金水橋、芳英堤等建築[13]

內府機構[編輯]

  • 內務府Phủ Nội Vụ),原本位於紫禁城興慶門嘅東邊,明命十八年移到紫禁城東邊顯仁門裡面,肇廟北邊,幾暇園南邊嘅位置。佢係阮朝內廷嘅供奉場所,有友收所、內造所、督工所等建築同埋倉庫。內務府而家剩低嗰兩層樓房建築,係保大十三年(1933年)先至起嘅。
  • 馬廠,又叫御馬所,係宮裡頭嘅養馬場所,設喺太和殿左右,由上駟院管轄,另外喺京城東南門嘅寧謐坊亦設有外馬廠[14]
  • 象廠,係飼養御象嘅場所,位於太和殿左右,馬廠嘅南邊。成泰二年集中喺太和殿西面。另外順化京城裡面嘅東泰坊、南明坊,京城出面嘅金龍社、楊春社,都設有京象廠[15]
  • 將軍廠,原本位於而家太和殿嘅位置,係鑄炮嘅地方,明命元年六月設立,明命六年曾經喺度鑄造九鼎。明命十三年在喺將軍廠嘅位置起太和殿,將軍廠嘅九門銅砲就移咗去皇城午門出面嘅金水池北邊,午門嘅東面係左大將軍廠,午門嘅西面係右大將軍廠。

[編輯]

  1. 《大南一統志》卷一:京師城池·京城
  2. 《大南實錄正編》第一紀卷二十四,《世祖高皇帝實錄》嘉隆三年四月朔日
  3. 《大南一統志》卷一:京城城池·皇城
  4. 《大南一統志》卷一:京城城池·皇城
  5. 《大南一統志》卷一:京城城池·皇城
  6. 《大南實錄正編》第一紀卷二十九,《世祖高皇帝實錄》嘉隆五年五月己未
  7. 《大南實錄正編》第二紀卷八十二,《聖祖仁皇帝實錄》明命十三年八月
  8. 《大南實錄正編》第一紀卷五十九,《世祖高皇帝實錄》嘉隆十八年二月丁丑
  9. 《大南一統志》卷一:京城城池·太廟
  10. 《大南實錄正編》第一紀卷十九,《世祖高皇帝實錄》嘉隆元年十一月
  11. 《大南一統志》卷一:京城城池·皇城
  12. 《大南一統志》卷一:京師城池·紫禁城
  13. 《大南一統志》卷一:京師苑囿·瀛洲
  14. 《大南一統志》卷一:京師官署·馬廠
  15. 《大南一統志》卷一:京師官署·象廠

出面網頁[編輯]