香港五十蚊紙

五十蚊紙（50元紙幣）係現時香港流通貨幣之一，面值50港元，目前分別由香港3間發鈔銀行發行。作用主要係輔助廿蚊紙，所以出得比較少。實際上，以鈔票冧巴計，50蚊紙係出得最少嘅銀紙之一。

史

50蚊紙早喺19世紀中已經由當時嘅3間發鈔銀行──香港上海匯理銀行（即後來嘅香港上海滙豐銀行）、印度新金山中國匯理銀行（即後來嘅渣打銀行）、印度倫頓中國三處匯理銀行（即後來嘅有利銀行）出，至到1941年香港淪陷為止。

直到1968年，滙豐銀行至再出新版50蚊紙，設計以藍色為主調，而渣打銀行亦自1970年起出藍色嘅50蚊紙。自1985年起，兩間發鈔銀行嘅50蚊紙除咗細張啲之外，亦改以紫色印刷。喺1993年，因應香港主權移交臨近，兩間發鈔銀行改咗原本帶有英國色彩嘅鈔票設計，但色水冇變。到咗1994年，中國銀行香港分行（即後來嘅中銀香港）亦加入發行紫色嘅50蚊紙。

然而，香港金融管理局喺2002年推出紫色嘅10蚊紙，3間發鈔銀行為免市民混淆，喺2003年重新設計嘅50蚊紙改以綠色為主色，當中渣打銀行嘅新版50蚊紙，唔再採用沿用咗23年嘅「獅子踩波」圖案，改用舊版廿蚊紙嘅「海龜」圖案。由於回收步伐幾快，舊版紫色50蚊紙已經較少流通。