香港十蚊紙

十緡紙（十元鈔票）係香港嘅流通銀紙，面值10港元。

歷史

10蚊紙已經有好耐歷史，喺19世紀60年代開始由匯豐銀行同渣打銀行首先發行，原本好大張，1959年起發行嘅10蚊紙開始「縮水」，1985年起發行嘅10蚊紙又再縮細張啲。

香港主權移交前，政府授權匯豐銀行同渣打銀行發行10蚊紙，紙幣以綠色為主色，俗稱青蟹，嗰陣10蚊紙喺兩間發鈔銀行所發行銀紙入面數量最多（以鈔票冧巴計），係當時主流面額銀紙之一。1994年，香港政府自行鑄造10蚊銀，10蚊由銀紙變成銀仔，發鈔銀行就再無印10蚊紙，匯豐銀行喺1993年新印刷銀紙嗰陣已經唔印；而渣打銀行就出到1995年。

政府原本諗住以10蚊銀嚟取代10蚊紙，但民眾對10蚊紙嘅需求仍然好高：一嚟因為10蚊銀好重，二嚟每逢過年時節，唔少人都鍾意用新銀紙嚟封利是，而為免俾人覺得寒酸，好多人都只會放銀紙而唔放銀仔入利是封。加上，自從香港回歸後冇幾耐發生亞洲金融風暴，香港經濟每況愈下，唔少民眾要求政府出返10蚊紙。另一方面，亦由於10蚊銀好易俾人偽造，喺發行後幾年間政府同銀行都收到唔少假10蚊銀，當中更不乏大量生產嘅個案。於是香港政府喺2002年決定委託香港金融管理局出過10蚊紙，以紫色為主色並加入防偽特徵，俗稱花蟹。而原本以紫色為主色嘅50蚊紙需要讓路，同年起改以綠色為主色。

10蚊銀面世後，青蟹俾民眾收埋晒，流通數量大幅下降，而20蚊紙開始大量發行，20蚊紙變成主流面額鈔票，「青蟹」淪為作輔助20蚊紙用途，就算係政府金融管理局出嘅「花蟹」都係噉。

2007年7月9號，香港金融管理局首次發行10蚊塑膠銀紙（俗稱膠蟹，因為佢用塑膠嚟整），成為香港貨幣史上首批塑膠銀紙。另外自2005年9月起，全港所有銀行一收到民眾存入嘅「青蟹」，就會全部收番，唔再畀佢流出市面，所有「青蟹」收番之後都會交去發鈔銀行報銷。