香港仔艇家

香港仔艇家（英文：Aberdeen Floating Village）又叫香港仔艇戶，係指香港南區香港仔住喺住家艇上嘅人家，早喺香港開埠之前已經發展到幾大規模，係嗰時漁村重要部份。而家主要集中香港仔避風塘嘅西便，有幾百隻艇，約莫住六千人，全盛時期係1960年代，西到田灣，東到涌尾，住超過15萬人，隨住之後政府喺香港仔大幅填海發展，同埋起咗田灣邨、石排灣邨等公屋安置居民上岸居住，艇家就變得越嚟越少。