高昌景教寺院壁畫

出自維基百科，自由嘅百科全書
(由高昌景教教堂壁畫跳轉過嚟)
聖枝主日祭
做懺悔嘅紅衣女子
基督榮進耶路撒冷城

高昌景教寺院壁畫（德文：Wandbilder aus einem christlichen Tempel, Chotscho）係指德國吐魯番考察隊（英文：German Turfan expeditions）於20世紀初喺高昌古城（中文：高昌古城）郊外發現嘅一座東方教會（景教）廢寺入面出土嘅三幅公元9世紀末壁畫殘片，而家收藏喺德國柏林亞洲藝術博物館（英文：Museum of Asian Art），亦名柏林印度藝術博物館（Museum für Indische Kunst）。

歷史背景[編輯]

北宋年間，使者王延德（中文：王延德）於公元981年出使高昌回鶻（中文：高昌回鶻）。佢見到當地仍有摩尼教寺院同波斯僧，各持其法，就係畀當時嘅佛教稱做外道嘅僧侶。東方教會初入唐帝國時叫「波斯經教」，因嗰陣嘅教會大本營位於波斯薩珊帝國，所以大唐時來到中土嘅景教教士阿羅本同景淨（中文：景淨）又畀叫做「波斯僧」。《宋史·天竺傳》記載：「太平興國九年（公元984年）五月三日，西州回鶻及波斯外道來朝貢。」呢度所謂嘅「波斯外道」指高昌回鶻王國嘅景教信徒[1]。

發現經過[編輯]

20世紀初，德國柏林民族人類學博物館嘅艾拔·葛倫威德爾（英文：Albert Grünwedel）同艾拔·馮·李·寇克（英文：Albert von Le Coq）率領嘅考察隊喺吐魯番進行咗三次考察，期間發現兩座摩尼教寺院同埋一座景教寺院，都係廢寺遺址。其中出土咗一批摩尼教同景教嘅壁畫、紙畫、絹畫及麻布畫，包括色彩鮮麗奪目，有濃郁波斯風格嘅手抄本、絲織品、掛軸等[2]。

呢座景教寺位於高昌古城東城牆北端同小佛塔羣之間，而家存有三個殿堂，長約20米，寬近7米。李·寇克喺教堂入面發現殘缺嘅壁畫，主要繪於東廳北墻、東墻及西廳，大多都非常殘破，佢揭取咗兩幅較為完整嘅壁畫：「聖枝主日祭」同「做懺悔嘅紅衣女子」[1]。葛倫威德爾則以白描臨摹咗另一幅壁畫「基督榮進耶路撒冷城」[3]。

壁畫概述[編輯]

  • 聖枝主日祭：亦叫「棕枝主日」或「聖枝圖」，此畫高約63釐米，寬約70釐米。左邊繪一較大人像，留着捲曲嘅黑髮，着住圓領袍（中文：圓領袍），可能係教士，佢右手拎住隻聖水杯，行祝福禮嘅左手重持有一隻金色提爐（英文：Thurible）[4][5]；右邊三名較小人像手執棕枝列隊而行，其中兩名男子着住西域風格嘅翻領長袍，頭上嘅圓形帽冠大概亦係胡帽；最右邊嘅女子足蹬綠色翹頭履，頭頂圓髻，腦後重梳有大髮髻，上身似乎着住半臂（日文：半臂），可見綠色衣袖，下垂至襦裙（中文：襦裙）上嘅織物可能係披帛（中文：披帛），佢畀認為有回鶻女子嘅特徵[2]。李·寇克原認為呢幅畫係描繪景教祭司施洗禮嘅場景，但經京都大學教授羽田亨（日文：羽田亨）考証，此畫實際係表現信徒慶祝基督教嘅聖枝主日。另一名日本學者吉村大次郎則話此畫左邊較大人物係耶穌，右邊三名較小人物分別係彼得、約翰同埋抹大拉嘅瑪利亞（英文：Mary Magdalene）[1]。
  • 做懺悔嘅紅衣女子：幅畫高43釐米，寬21釐米，描繪一名做緊懺悔祈禱（英文：Repentance (Christianity)）嘅紅衣女子。相較「聖枝主日祭」裏嘅人物，呢個女子嘅着裝同埋髮型都顯得簡單樸素。
  • 基督榮進耶路撒冷城：幅畫表現咗留鬍蓄鬚嘅基督騎緊驢進入耶路撒冷。佢嘅頭部戴住個內嵌十字架嘅頭飾，向後飄拂嘅短上衣，拎住支遊行用嘅十字架長杖，十字架四臂末端鑲嵌珍珠。呢種珍珠十字架同喺高昌發現嘅一件摩尼教經幡上描繪嘅夷數像所持十字架極為相似[3]。基督身後重有一名着住唐朝服飾嘅女信徒像。此畫原作已佚失，而家僅存白描複製圖。

攷[編輯]

  1. ↑ 1.0 1.1 1.2 林梅村; 宋妮雅 (2007年1月31號). 〈景教藝術在西域之發現〉. dsr.nii.ac.jp. 喺2018年7月8號搵到.
  2. ↑ 2.0 2.1 張惠明 (2016年5月30號). 〈德國考察隊在高昌故城收集的摩尼教、景教繪畫殘片〉. 《中國美術報》. 喺2018年7月8號搵到.
  3. ↑ 3.0 3.1 Parry, Ken (1996). "Images in the Church of the East: The Evidence from Central Asia and China" (PDF). Bulletin of the John Rylands Library (英文). Manchester: John Rylands University Library. 78 (3): 159. 喺2018-07-08搵到.
  4. ↑ "Wandbilder aus einem christlichen Tempel, Chotscho". dsr.nii.ac.jp (德文). 喺2018-07-23搵到. In der linken Hand schwingt er ein goldenes (gelbes) Weihrauchfaß.
  5. ↑ 浩然 (2010年4月11號). 〈中國境外有豐富景教遺物〉. 《基督教週報》. 喺2018年7月8號搵到.

睇埋[編輯]

由「https://zh-yue.wikipedia.org/w/index.php?title=高昌景教寺院壁畫&oldid=2001208」收