黃國樑

出自維基百科,自由嘅百科全書
Jump to navigation Jump to search
黃國樑將軍

黃國樑1900年7月1號1978年5月11號),字日如,係中華民國陸軍中將。佢係廣東增城客家人[1][2],喺增城縣二龍鄉歐福田村出世。[3]

後生[編輯]

黃國樑阿爺叫黃玉成,阿嫲姓石。[3]阿爸黃俊朋(一說黃俊明[4]),早年落南洋搵食。阿媽邱阿嬌,係民國期間增城家喻戶曉嘅英雄母親,為地方建設同抗日救國作出過貢獻。[1]黃國樑排第三,仲有兩個大佬繼叔、鏡波,一個細妹榮娣。佢識講廣州話客家話[1]

黃家務農為業,家道清貧。13歲嗰年佢跟阿媽落咗南洋,喺當地讀書。1917年返唐山,考入雲南陸軍講武堂第十二期步兵科,1919年冬畢業,成績優異。[5]

戎馬生涯[編輯]

粵軍[編輯]

1920年5月,黃喺粵軍第一師做過教官、排長。1922年夏,參加攻擊江西陳光遠之戰,1923年,升任東路討賊軍第八旅獨立連連長。佢參加過討伐陳炯明嘅戰役。1924年,參與北江連平戰役,無耐調升師部少校參謀,參與第一次東征。1925年5月,晉升中校參謀處長,跟住參與第二次東征,升任師行營參謀主任。1926年2月,做過國民革命軍第一軍十四師四十團中校附暫代團長。[5]

北伐[編輯]

1926年7月,國民革命軍誓師北伐。黃做第一軍第一師第三團中校團附。8月,攻打孫傳芳嘅部隊,戰績彪炳,晉升團長。1927年4月,發生四一二事件。黃奉命喺上海清黨,將周恩來組織嘅工人糾察隊繳械。7月,佢率部攻克山東郯城,調任同一個師嘅第一團團長。之後又奇襲龍潭孫傳芳指揮部,解除南京危局,挽回北伐挫勢,因此晉升少將團長。11月,調升第九軍十四師少將副師長並代理師長,無耐接任師長。12月,攻克徐州[5]

之後,蔣介石派重兵圍剿井岡山瑞金等地嘅工農紅軍。蔣以黃圍剿不力而撤職。1928年部隊縮編後,做第九軍第二師第四旅旅長,3月9號特任軍事委員會委員。1929年7月,做討逆軍第八路軍總指揮部參事。1930年6月,做武漢行營參議。1931年1月,做第十七軍總指揮部參議。9月,做第四集團軍教導大隊大隊長。1932年,做第一集團軍總部參議。1933年8月,喺廣東陳濟棠屬下,做直屬警衛旅少將副旅長兼第一團團長,1934年7月調任第二團團長。後來仲做過第十八軍副師長等職位。[4][6]1936年2月5號,國民政府授予黃國樑陸軍少將軍銜。[7]

抗日[編輯]

1937年7月,抗日戰爭全面爆發。9月,黃時任第十八軍第六十七師少將副師長,率部參加淞滬會戰當中最慘烈嘅羅店戰役,10月接任師長,繼續率部作戰。無耐之後調任第四十六軍第九十二師師長。12月,做長沙警備司令。1938年4月6號,升任陸軍中將。[7]5月,率九十二師擔任徐州會戰右側外圍作戰。9月,積功晉升三十七軍軍長,參加第一次長沙戰役[5]1939年,佢同其他部分粵軍將領奉命回師廣東,保衛鄉梓。佢做第六十五軍副軍長,1940年2月接任軍長。[1]

1940年,靜君編著嘅戰地新聞通訊集《良口之戰》出版,記載第二次粵北戰役全過程,並有4篇人物通訊,報導戰役主要將領余漢謀(戰役總指揮)、張瑞貴黃濤同黃國樑。根據《良口之戰》,1940年5月13號,日軍第二次進犯粵北,妄圖奪取曲江,打通粵漢線。日軍司令官安藤利吉指揮,第十八、三十八、一〇四師團,約2萬人,戰車數十部,以及第二十一獨立飛行隊三十幾架飛機,再次向粵北進犯。黃國樑指揮六十五軍,同黃濤嘅六十二軍、張瑞貴嘅六十三軍並肩作戰。國軍依託有利地形,喺前沿逐步阻擊日軍,並誘敵深入。日軍先頭部隊孤軍進至從化良口,俾國軍集中兵力進行圍殲。日軍潰退後,國軍又乘勝追剿,左右包抄,日軍大敗而還。呢一次大戰,「已知敵官兵死亡之數,約四千餘名,死傷合共約在八千以上」,係國軍抗戰以來少有嘅痛快淋漓嘅勝仗。[1]

1940年至1945年春,黃參與指揮三次粵北戰役,保衛咗廣東臨時省會韶關。1945年6月至7月,喺贛南作戰。[5]

1945年9月,抗戰勝利,黃辭去六十五軍軍長職務,返鄉下侍奉阿媽。[4]

國民政府喺1942年授予黃陸海空軍甲種一等獎章,1943年授予干城甲種一等獎章,抗戰勝利後授予抗戰勝利獎章,表彰黃喺抗日戰場嘅卓著功勳。[1]

國共內戰[編輯]

1946年,國共內戰爆發。7月,黃奉召出任整編六十四師師長。同年兼任徐州綏靖公署參議。1947年春,清剿徐州外圍,擊潰共軍張光中嘅部隊。5月上旬進佔徂徠,中旬援孟良崮,下旬再剿梁邱,6月中旬馳援新泰。6月下旬,蔣介石下令整編十一師、廿五師及黃嘅整編六十四師做攻擊軍,進攻十幾萬共軍華東野戰軍盤踞嘅沂蒙山區,經過四晝夜浴血鏖戰,會師南麻。喺呢一仗,黃嘅部隊虜獲美製步槍、機槍子彈150萬發,未裝火藥嘅手榴彈十幾萬粒,黃色炸藥5噸,炮三十幾門。10月上旬,固守范家集,血戰11日,打死敵軍過萬,乃係黃將軍百戰餘生中最艱苦一仗。1948年春,奉國防部令晉升整編第二軍軍長。又做過第七兵團副司令。[5]1948年11月29號,大軍南移,佢做廣東省保安司令部副司令。[8]1949年8月7號,由廣州飛赴海南,做海南警備副司令。[9]1950年,海南失守,佢同一班廣東出身嘅將領多數去咗香港。[10]1951年,佢去臺灣[4]

晚年[編輯]

黃喺台灣做國防部中將高參。1959年10月退役。退休之後,黃住喺苗栗。佢為人淡泊名利,生活低調。[2][6]

過身[編輯]

1978年5月11號中午12點18分,黃國樑將軍喺台北榮民總醫院食道癌病逝。[3]6月9號上晝大殮,遺體安葬喺台北縣(今新北市)中和鄉春秋墓園。7月9號,喺香港有追悼會,何世禮將軍、陳克華將軍等五百幾人致祭。[11]

屋企人[編輯]

老婆梁碧蓮(?–1986年1月13號),仔浩凖,女惠文[1],女婿姓管[6]

軼事[編輯]

喺香港調景嶺生活嘅國軍老兵陳寶善(演員陳玉蓮之父),係黃嘅增城鄉里同部下。1947年范家集一戰,東門失守,黃幾乎要自殺,陳率隊重奪東門,黃感激不已。[2]

佢同陳誠友好。試過陳誠做副總統嘅時候,去苗栗視察,邊度都唔去住,而揀喺黃家下榻。[2]

參考[編輯]

  1. 1.0 1.1 1.2 1.3 1.4 1.5 1.6 "平民将军、抗日功臣黄国梁 - 增城之窗". www.zcwin.com. 原先內容歸檔睇2018-06-14. 喺2018-06-14搵到. 
  2. 2.0 2.1 2.2 2.3 胡, 春惠 (1997). "陳寶善先生訪談錄". 香港調景嶺營的誕生與消失. 台北: 國史館. ISBN 9789570207323. 
  3. 3.0 3.1 3.2 "故黃公國樑將軍行狀". 廣東文獻季刊. 1978-06-30. 陸軍中將黃公國樑將軍,不幸於中華民國六十七年國曆五月十一日中午十二時十八分因食道癌仙逝於台北榮民總醫院,距生於民前十二年農曆六月五日,享壽積潤八十一歲。慨神州之未復,悲老成之溘逝!一代忠良,百年有盡,爰紀生平,以告邦人。將軍字日如,原籍廣東增城二龍鄕歐福田村,祖考玉成公,祖妣石氏,顯考俊朋公,顯妣邱氏,兄繼叔、鏡波,將軍行三,妹榮娣…… 
  4. 4.0 4.1 4.2 4.3 "黄国梁". www.gzsdfz.org.cn. (原先內容喺2018-08-30歸檔). 喺2018-06-13搵到. 
  5. 5.0 5.1 5.2 5.3 5.4 5.5 "黃國樑將軍在台病逝 港友好明舉行追悼會". 工商晚報. 1978-07-08. 第 二頁. 
  6. 6.0 6.1 6.2 熊, 穆文 (2007-06-21). "日公 - 黃國樑". 新浪部落. 喺2018-06-13搵到. 
  7. 7.0 7.1 "中华民国南京政府授予将军全名录". www.douban.com (用中文寫). 原先內容歸檔睇2012-10-28. 喺2018-06-14搵到. 
  8. 1948-11-30,華僑日報第一張第四頁:《黃國樑任保安處長》
  9. 1949-08-08,華僑日報第一張第一頁:《張發奎將返穗 將否復出尚未决定 黃國樑任瓊警備副司令》
  10. 熊, 穆文. "父親". 新浪部落. (原先內容喺2018-08-30歸檔). 喺2018-06-15搵到. 
  11. "黃國樑將軍在台病逝 同袍友好昨舉行追悼會". 香港工商日報. 1978-07-10. 第 八頁.