黃鶴樓 (詩)

  想搵第二個意思嘅話，請睇黃鶴樓 (搞清楚)。

1920年影嘅黃鶴樓

黃鶴樓（粵音：wong⁴ hok⁶ lau⁴）係大唐詩人崔顥嘅名作，相傳，李白原本想去黃鶴樓吟詩，見到崔顥喺牆上嘅題詩，讀完之後竟然掟咗支筆，重話：

眼前有景道不得 崔顥題詩在上頭

意思： 眼前咁靚景都吟唔出句 皆因崔顥首詩吟曬出來

於是呢首詩成為唐詩經典，廣為流傳，並且李白嘅事成為文壇佳話。之後李白仿呢首詩寫咗首《登金陵鳳凰臺》。有啲人評佢做「全唐七律之首」。

內容

打注意嘅地方係易錯音嘅字。

原文 黃鶴樓 昔人已乘黃鶴去， 此地空餘黃鶴樓。 黃鶴一去不復返， 白雲千載空悠悠。 晴川歷歷漢陽樹， 芳草萋萋鸚鵡洲。 日暮鄉關何處是？ 煙波江上使人愁。

粵音 Wong4 hok6 lau4 Sik1 jan4 ji5 sing4 wong4 hok6 heoi3 Ci2 dei6 hung1 jyu4 wong4 hok6 lau4 Wong4 hok6 jat1 heoi3 bat1 fau6注意 faan2 Baak6 wan4 cin1 zoi2 hung1 jau4注意 jau4注意 Cing4 cyun1 lik6 lik6 hon3 joeng4 syu6 Fong1 cou2 cai1 cai1 jing1 mou5 zau1 Jat6 mou6 hoeng1 gwaan1 ho4 cyu3 si6 Jin1 bo1 gong1 soeng6 si2 jan4 sau4

意思 黃鶴樓 舊時嗰個人都騎黃鶴去咗剌， 呢度淨係留得住一座黃鶴樓。 黃鶴一飛就唔會再返來， 千年來啲白雲就噉樣飄。 日頭曬住江河，照得漢陽嘅樹一清二楚 鸚鵡洲嘅芳草又生得咁青鮮 不過噉又點？望到日落連自己鄉下都未望到邊 再望下長江蒼茫嘅煙波，剎時覺得真係好閉翳啊！

格律同文氣

2006年影嘅黃鶴樓

呢首詩以平仄論，係好有問題。但凡律詩，都係有固定格式，而佢就破格破得好犀利，睇下：

呢首詩嘅平仄 仄平仄平平仄仄 仄仄平平平仄平 平仄仄仄仄仄仄 仄平平仄平平平 平平仄仄仄平仄 平仄平平平仄平 仄仄平平平仄仄 平平平仄仄平平

格式上嘅平仄（平起式） 平平仄仄平平仄 仄仄平平仄仄平 仄仄平平平仄仄 平平仄仄仄平平 平平仄仄平平仄 仄仄平平仄仄平 仄仄平平平仄仄 平平仄仄仄平平

前四句可以講係奇觀，第三句幾乎全句都係仄聲，第四句嘅「空悠悠」係三平調煞尾，呢兩個都係格律詩聲律大忌，齋第三句就破到個格好誇張。然後喺內容上，「黃鶴」兩隻字出現咗三次，呢個係重複大忌，一般嘅詩噉寫法會顯得累贅譖氣（音：cam³ hei³）。同時佢無對仗，噉樣嘅寫法，與其話係律詩，不如話係古體詩寫法。而後四句先至合返律詩格律，成首詩就好似劏開兩半，一邊古體、一邊律詩噉。

喺文藝評論上之所以有咁高嘅讚譽，在於啲人唔係從格律，而係首詩嘅「文氣」來睇佢。所謂「文以氣爲主」，當時律詩已經定型出格式，崔顥自己都寫過中規中矩嘅律詩，佢亦唔係學似杜甫噉自創調式寫拗律，而係佢唔理個格式、立意在先，《紅樓夢》黛玉敎詩就有話：「若是果有了奇句，連平仄虛實不對都使得的。」

雖然呢首詩望起身「劏」開咗，查實佢符合「起承轉合」嘅傳統章法。佢頭兩句（首聯）係起筆，一起筆就放開去寫、唔理格式，之後兩句（頜聯）係承接首聯，呢四句借千年傳說落筆，傳說本來係攞來講嘅啫，佢反而以無作有，然後話「不復返」「空悠悠」，有「仙去樓空、前事作古、世事茫茫」嘅意象；寫完呢段古體，唞啖氣，轉爲律詩，內容亦都跟住轉，忽然間從空無嘅、作古嘅傳說，轉成眼前嘅景色，於是文勢就顯得浩蕩起伏。最後嘅合，係寫思鄉、舉目無親、在外浮沉嘅「蒼茫之感」，合返前邊仙人傳說嗰種「空悠悠」。

沈德潛喺《唐詩別裁》卷十三嘅評價係「意得像先，神行語外，縱筆寫去，遂擅千古之奇」。