黑社會以和為貴
《黑社會 II：以和為貴》係喺2006年出嘅香港電影，係導演杜琪峰嘅《黑社會》嘅續集。呢套戲亦係2006年入圍康城影展的官方項目。
電影資料
[編輯]制作
[編輯]- 出品機構：中國星電影有限公司、銀河映像（香港）有限公司、一百年電影有限公司
- 發行商：中國星電影有限公司（香港）、Tartan Films（美國）
- 出品人：羅守耀、向華強
- 監製：羅守耀、杜琪峰
- 導演：杜琪峰、羅永昌（執行導演）
- 編劇：游乃海、葉天成
- 主演：任達華、古天樂、張家輝、林雪、張兆輝、林家棟、王天林、譚炳文、鄭浩南、潘月彤、安志傑……等。
背景及簡介
[編輯]故事嘅背景同第一集一樣，講述現代香港黑社會一啲內部爭鬥嘅事情；今集帶出嘅黑暗面更強更令人心寒，就好似其中一段係漁船上執行家法嘅場面，由執行到完成，整個過程冇剪接冇停過一個鏡頭，重有另外一啲拍得好迫真嘅血腥鏡頭，除咗增加套戲嘅真實感之外，亦加添咗唔少嘅震憾力。
劇情大綱
[編輯]香港幫會「和聯勝」每兩年就要再選一個新嘅辦事人（最高統帥），兩年前由佐敦區大佬阿樂當選成為幫會嘅龍頭大哥；兩年後，幫會又要籌備選舉新龍頭，而每個有實力嘅人亦都開始有所動作。
到咗阿樂生日，曾經幫佢搵返幫會權力象徵－－龍頭棍嘅五個契仔幫佢做生日一齊食晚飯，阿樂趁呢個機會乘機試探一吓有邊個想出嚟選做下一任龍頭。席間東莞仔高調咁提出要出嚟參選，但係只得大頭支持佢，飛機冇表態，但就反對東莞仔出嚟選，因為覺得佢冇為幫會做過乜嘢；Jimmy 仔就講明唔想做龍頭大哥，因為佢呢兩年做生意搵咗唔少錢，又同好多大老細合作喺內地搞緊房地產投資，雖然財力實力都好雄厚，就連輩份最高嘅叔父鄧伯都開聲支持，但係佢只想安安穩穩咁繼續搵錢，唔想再踩隻腳入江湖；師爺蘇亦都唔想選，剩係想學 Jimmy 仔咁喺大陸做吓生意搵錢。聽過幾個契仔嘅態度之後，阿樂心裏面開始盤算點去為佢自己連任而舖路，甚至希望可以一路做落去。
Jimmy 仔陪住幫佢搵錢嘅地產老細郭生去高級酒廊消遣，酒廊老闆兼另一幫會「新記」嘅龍頭大哥許生介紹咗一個人畀 Jimmy 仔識，呢個人係省公安廳嘅石副廳長，佢知道「和聯勝」又要選新龍頭，不過佢唔滿意阿樂在任時候嘅香港治安，所以希望 Jimmy 仔出嚟參選，重話畀 Jimmy 仔知師爺蘇喺大陸嘅地下六合彩生意會遭到封殺。Jimmy 仔雖然對參選仍然冇興趣，但就好關心師爺蘇單嘢，點知搵極都搵唔到師爺蘇。
過咗兩日，Jimmy 仔帶住兩千萬港幣上深圳，因為佢同地產商郭生喺深圳嘅地產生意要向各單位疏通，唔想個發展計劃有咩阻礙。Jimmy 仔連同新請返嚟嘅助手阿力去到約定餐廳交錢畀經貿部嘅何科長，冇幾耐發現餐廳入面忽然間多咗好多好似公安嘅人，開頭以為係嚟捉佢哋，正想諗計走嘅時候就見到師爺蘇出現；Jimmy 仔想通知師爺蘇快啲走，點知成班公安開始採取行動，重將佢哋幾個捉晒返公安廳。
喺公安廳羈留期間，石副廳長單獨召見咗 Jimmy 仔，重畀返晒啲身份証同回鄉証佢應承放佢哋走，唯一條件係以後唔畀 Jimmy 仔喺大陸做生意；Jimmy 仔當然唔服點解第二個幫會嘅龍頭可以喺大陸做生意，而佢就唔得，石副廳長就解釋因為人哋係幫會龍頭而佢唔係；說話之中嘅暗示令到 Jimmy 仔進退兩難，為咗想撈返正當生意，Jimmy 仔終於決定參加今屆嘅選舉，做兩年龍頭為佢未來嘅生意舖路。
返到香港，Jimmy 仔即刻着手預備，而佢嘅大佬龍根亦都幫佢搵到幾個叔父嚟支持佢，加強佢參選嘅實力。為咗喺選舉上更有利，師爺蘇重幫 Jimmy 仔搵咗另一個幫會「號碼幫」嘅金牌打手阿武嚟做後援；對於認錢唔認人嘅阿武嚟講，幫第二個幫會做嘢冇問題，最緊要有錢收。
當一班叔父開會時，鄧伯第一個表態支持 Jimmy 仔，但係寸爆就反對，因為佢懷疑 Jimmy 仔身邊嗰個新助手阿力係警方嘅臥底，怕到時有啲咩事就會為幫會帶嚟好大嘅麻煩；Jimmy 仔雖然好欣賞阿力，但係為咗要令班叔父放心支持佢，唯有忍痛咁帶咗阿力出海執行家法。
Jimmy 仔出爾反爾表明要出嚟參選，最唔滿意就係阿樂同埋東莞仔，於是兩個人決定綁架地產商郭生嚟要脅 Jimmy 仔退出。佢哋將郭生收埋，然後阿樂就搵 Jimmy 仔講數要佢唔好參選，點知 Jimmy 仔拒絕，重表明如果郭生有咩依郁將會有好多人陪葬。呢吓嘢搞到阿樂非常難愖，唯有進行另外一啲開路計劃；首先佢叫助手將支龍頭棍帶上廣州收埋，吩咐如果到時選唔到佢就唔好交支棍出嚟，再去搵鄧伯提議畀佢連任，但係鄧伯為咗公平而拒絕，於是阿樂就出手整死埋鄧伯。跟住再派飛機去漏夜伏擊 Jimmy 仔。飛機引咗 Jimmy 仔上車諗住落手殺佢，不過最後都俾 Jimmy 仔說服，放低 Jimmy 仔就開車走咗。
Jimmy 仔知道阿樂已經殺到埋身，於是決定反擊；佢用金錢同武力令到阿樂身邊嘅幾個貼身跟班變節幫佢做事嘢，重知道咗郭生嘅收藏地點。第二日 Jimmy 仔師爺蘇同阿武一齊出動去救郭生，雖然行動成功，但係阿武就俾東莞仔殺死咗。
同一時間，阿樂因為知道自己個仔 Danny 喺學校群咗班「號碼幫」嘅古惑仔，亦都查出咗班人會喺茶餐廳度收入會費正式踢佢個仔入會，於是阿樂親自出馬喺茶餐廳嘅樓上睇住；正當 Danny 想拎出利是封畀幾個古惑仔嘅時候，阿樂由樓上行落嚟，Danny 一見到老豆即刻嚇到奪門而出，阿樂即刻喺後面追住，而幾個打手就揸住車喺後面一路跟；Danny 喺啲街度穿穿插插係咁跑係咁跑，阿樂追到冇氣，於是上咗車叫司機繼續跟住佢個仔，但係車上面幾個變咗節嘅打手唔單止冇再跟住 Danny，重一人一鎚咁喺車度將阿樂扑死。
阿樂死咗，東莞仔因為俾警察目擊佢殺咗阿武而潛逃咗去第二度，飛機因為冇乜人識所以冇人支持，喺冇競爭對手嘅情況之下，班叔父一致通過選 Jimmy 仔成為新一任嘅「和聯勝」龍頭大哥。
Jimmy 仔諗住做兩年龍頭有個交待，等搞好咗大陸嘅生意就退出江湖，點知石副廳長親手交返支龍頭棍畀佢，重提出想佢永遠保存支棍，永遠做「和聯勝」嘅龍頭，希望喺 Jimmy 仔嘅管理之下，香港嘅治安一路保持安定。呢個時候 Jimmy 仔先至領教到深圳公安嘅利害，就連龍頭棍嘅去向都知得清清楚楚，喺冇得選擇嘅形勢之下，只有慨嘆無奈。
以後嘅「和聯勝」龍頭會係繼續選舉產生，定係好似石副廳長所交帶咁實行世襲，由 Jimmy 仔開始一代傳一代……？姑勿論結果會點，等同帥印、象徵大權嘅龍頭棍，最終做咗鄧伯嘅陪葬品之一，長埋地下。