利是

出自維基百科,自由嘅百科全書
跳去: 定向搵嘢
利是封

利是,有時讀做「勵事」,又寫做利市利事勵事,中國北方叫做紅包紅封包,即係紅色封包住嘅,係種禮物,紅色響中國文化代表喜慶。響過年結婚生日等喜慶場合送錢做禮物都會用到,而喺呢啲場合送利是畀人係中國傳統嘅習俗。利是入面通常會擺入有吉祥數字嘅錢,好似有8字,或以雙數結尾嘅數目。

傳統嘅利是係用一張紅紙包住啲錢。但近年有好多地方都改用機器印製嘅小信封。每年臨近農曆新年,各大商業機構都有整利是派畀顧客。

新年[編輯]

  • 中國傳統文化習慣響利是入幾多經常同雙方交情成比例。
  • 除夕由家長派畀細路嘅利是叫做壓歲錢,係表示將祝福同好運帶畀佢哋。
  • 每年農曆新年期間有派利是嘅習俗:
    • 部份地區(如廣東、香港和澳門)係已婚人士發畀未結婚嘅親友,叫「逗利是」,不過,而家響香港澳門有啲同居多年嘅情侶、未婚媽媽或爸爸、同埋一啲未婚嘅中老年人亦會派利是。
    • 中國大陸,派利是嘅習慣通常只響比較親近嘅親戚朋友之間。
    • 台灣就係由已經出社會嘅人派畀未出社會嘅後輩。
    • 響部分地區,新年發利是嘅範圍比較廣泛,例如鄰居屋企嘅細路、普通交情嘅同事之間都有可能派利是,但呢種利是內嘅金額往往比較細,有啲人甚至會響利是入啲5蚊、10蚊嘅紙幣。
    • 另外,亦有啲人會因唔同理由,送利是畀大廈管理員、助手,或者酒樓侍應等。
    • 響部分地區,農曆新年時各機構通常都會向所有員工派一封「開工利是」。而公司內結咗婚嘅員工或者上司,通常亦會向同事下屬派利是。
  • 今時今日,好多人已習慣用啲新印製嘅銀紙來做利是,有人認為除咗比較雅觀外亦寓意去舊迎新,因為咁每年農曆新年前好多銀行嘅現鈔提取量就會急劇增加。印鈔廠亦會有印新銀紙嘅壓力。部分環保主義者認為呢個習慣唔環保。所以,2006年港澳政府都叫啲市民響農曆新年期間用舊鈔來包利是,而銀行亦都會準備迎新鈔(大概八成新)畀市民封利是[1]

利是封[編輯]

內文: 利是封

相傳送利是嘅習俗,響好耐以前就流行,但嗰時啲人不過係以寓意吉祥嘅鮮紅色紙,包住一張寫滿祝福字句嘅字條,送畀親朋好友,以表心意。到咗大概300年前,啲人就改用一張形狀同正方形相若嘅紅紙,包住啲銅錢,封作「利是」。而第一代嘅利是封,大概響1900年印刷術開始多人用時,先至出現。當時嘅所謂利是封,做法超簡單,只係紅紙印上黃油,再喺未乾嘅黃油上曬上金粉,效果就好似而家燙咗金字嘅利是封咁,而圖案就多以簡單爲主,再配吉利嘅字句。

賀禮[編輯]

除咗農曆新年之外,響其他喜慶場合,好似婚禮、新店開張咁亦有送利是嘅習慣。因為賀禮利是嘅金額通常唔少,所以好多人響收到婚禮請柬嘅時候,會講笑叫佢做「紅色炸彈」,意味住又要拎一筆賀禮出嚟做利是。香港同埋澳門就叫佢做「做人情」。

其他民族相似嘅習俗[編輯]

  • 越南:派「利市」(Lì xì)。
  • 日本:家長會派「お年玉」(羅馬拼音:otoshidama)畀細路,類似華人社會嘅壓歲錢,不過係用白色封套包裝,而且封套上會寫上接受人嘅名。
  • 馬來西亞:傳統馬來人會派一種入面有錢嘅綠色封套,附有一啲伊斯蘭嘅圖案,咁係受咗華人響節慶時派利是嘅影響。

同利是相關嘅犯罪[編輯]

  • 送利是以前亦係華人慣常用嘅貪污手法。行賄嘅一方畀對方利是,以作為某種服務報酬。響香港,向政府人員送利是曾經係日常生活嘅一部份,但響廉政公署成立咗之後,送利是已差唔多無晒。根據而家嘅法例,公務員只有收受親屬嘅利是唔受限制;私交好友嘅利是唔能夠超過 2000港元;其他人唔可以過1000蚊;同時唔准收受有公事來往同下屬嘅利是。如果送利是係用作行賄,就無論邊個人、乜數量嘅利是都屬違法。一啲地方,仍然保留呢個制度。
  • 喺香港同埋澳門嘅農曆新年期間,亦曾經有一啲不法之徒(通常係三合會成員)假意送財神、送年桔、送揮春舞獅賀年等手法,迫一啲商戶同市民派利是以作回謝,以圖或企圖勒索。
  • 東亞國家嘅人民有響手術前後送禮畀執刀醫生利是嘅陋習,呢種利是嘅目的係拜託醫生特別照顧同表達酬謝嘅意思,原本係東亞文化嘅一種禮數同敬意嘅表現,但係就變咗質變為醫生向病人亂咁攞利是,甚至利是成為醫生嘅主要收入來源,嚴重傷害醫生同病人嘅關係同善良風俗,因為咁利是幾乎已被各國政府立法禁止,但到今日仍無辦法完全杜絕。

參考[編輯]