1881 Heritage

出自維基百科,自由嘅百科全書
跳去: 定向搵嘢
1881 Heritage

1881 Heritage前身係香港水警總部,位於香港九龍油尖旺區尖沙咀廣東道2號A,1884年至1996年期間係水警總區總部,1994年成為香港法定古蹟。2003年,政府推出發展前水警總部文物旅遊計劃,邀請私人發展商以招標形式去保存、修復同發展呢個歷史地段[1]。之後由長江實業地產有限公司發展,改建成為匯聚國際級購物商場、飲食娛樂同酒店於一身嘅特色建築物。

簡介[編輯]

「1881」雲集多間國際品牌名店、時尚食府、古蹟酒店、同埋一個以古蹟為主題嘅展覽館,裏面嘅商舖、酒店同飲食設施總面積達到13萬呎。「1881」附近有香港文化中心香港太空館香港藝術館尖沙咀鐘樓等地標建築物,亦都近住九龍公園港鐵尖沙咀尖東站天星小輪同巴士總站,交通四通八達。「1881」建築極具特色,既有大型廣場,亦有百年古樹,配合夜晚特別嘅燈光設計,凸顯「1881」高貴不凡嘅氣勢。

背景[編輯]

「1881」而家嘅位置由1880年代開始直至1996年,除咗第二次世界大戰時期之外,一直都係香港水警總部。項目主要由五幢建築組成,包括前水警總部主樓、前馬廐、前時間球塔、舊九龍消防局同舊九龍消防局宿舍。根據《古物及古蹟條例》,項目喺1994年列為法定古蹟(除咗舊九龍消防局主樓),極具歷史意義,所以發展商特別將佢嘅名改做「1881 Heritage」,以凸顯呢度嘅歷史價值同發展商對重新為古蹟文物注入新元素嘅使命。

改建過程[編輯]

喺歷時6年嘅改建過程當中,設計師首要嘅任務係保留古蹟原貌,同埋加入新功能,呢個亦係整個項目最艱巨嘅地方。例如以前嘅防空洞,而家保留同復修作為通往展覽廳嘅通道,畀市民可一睹防空洞嘅真貌;為保留原址嘅古樹,特別邀請有關專家為大樹做評估、結構性修剪、日常護理同除蟲等工作。另外,為保留前水警總部嘅特色,以前用嚟向港口船隻報時嘅時間球塔亦會重新啟動;而喺廣場嘅地面亦特別鋪砌香港航海圖同子午線,以彰顯香港超過一百年作為經商港口嘅偉大使命。

1881古蹟[編輯]

時間球塔

最初叫做時間球塔,每日朝早由人手懸掛時間球喺塔頂,下晝1點除落嚟(除咗禮拜日同公眾假期),畀港口嘅船隻喺望到時間球除落嚟嘅時候,就可調校經線儀(航海天文鐘)。時間球塔旁係一支颱風訊號杆,用嚟懸掛颱風訊號之用。強風襲港嘅時候亦會發射颱風槍︰響槍一聲代表有強風逐漸移近,兩聲表示正有颱風吹襲,三聲就表示預計風向會有所轉變。響20世紀初,時間球搬咗去訊號山,從此結束咗時間球塔嘅歷史使命。

馬廐

馬廐仍然保留舊式木門。

鴿舍

鴿舍位於前水警總部嘅主樓外牆,相傳於19世紀,信鴿係當時水警總部同海上水警船艇之間傳遞資訊嘅工具。

壁爐

前水警總部裏面原有嘅鑄鐵壁爐,上面有精細鑄花圖案。

刻有「印度警察」嘅門楣

香港水警成立於1841年,部隊成員由唔同國籍人士組成,包括歐洲籍、中國籍同印度籍。

槍房保安窗戶

水警警員透過槍房嘅保安窗戶交收槍械,以配合保安程序。

地板門

主樓地下嘅木地板同地面保持一定距離,令到個到有足夠嘅通風,所以設有地板門通向地下嘅維修同通風空間。

監牢

前水警總部原有三間監牢,全部都保留低,並擁有超過一百年嘅歷史。

煤氣燈

前水警總部原有三盞煤氣燈,全部都保留低。

炮台

喺前水警總部西北草坪一角,原本裝置咗一部三磅哈乞開斯式速射炮。但係喺1961年,呢個炮台同怡和嘅午炮互相對調,直至1996年呢個舊午炮被轉送到西灣河嘅新水警總部。而家喺草坪上嘅炮台係專程由外地買返嚟相同型號嘅炮台。

花崗石護土牆

原本沿廣東道嘅花崗石護土牆因應政府計劃嘅廣東道擴建工程而被拆除,原有護土牆每一石塊經仔細拆下同編號後,而家重置喺九龍公園徑嘅護土牆。

參考[編輯]

出面網頁[編輯]