廣東道

出自維基百科,自由嘅百科全書
 呢篇文講嘅唔係廣東路
廣東道北端位置
新港中心廣東道入口

廣東道英文Canton Road)係香港一條馬路,響九龍半島西便,由半島頭尖沙咀向北伸入官涌油麻地,直至旺角,差啲到深水埗。佢南便接住梳士巴利道,而北面就駁住荔枝角道。廣東道大致同彌敦道平行。因為規劃變化,家下廣東道有少部份係斷開,分成四截。全香港最大嘅門牌冧巴,就響廣東道,即係旺角1239號。

歷史[編輯]

1887年九龍倉碼頭側邊開咗條馬路,當時英文叫MacDonnell Road,中文叫麥當奴道。個名以當時香港總督麥當奴命名。到咗1909年3月,為免同香港島另一條麥當奴道撈亂,佢就同附近街道一樣,改用香港附近通商各城為名。九龍呢條麥當奴道,就以當時大清廣東省城為名,即後尾中華民國中華人民共和國廣州市。就咁,條路英文就叫Canton Road,中文就由於翻譯失誤,誤譯省城道廣東道[1][2]

條路跟住九龍市區向北發展而伸長。佢原本係貼近半島西岸,不過多次填海之後,除咗尖沙嘴一段,同海隔好遠。1970年代,香港政府將官涌近佐敦道碼頭一段,向西改駁渡船街,而側邊一段路,亦變成九龍佐治五世紀念公園。所以,佐敦道以南以北兩段就斷開咗。佐敦道以北路段,近窩打老道,因為規劃咗做油蔴地果欄斷開。後尾香港房屋協會響油蔴地近眾坊街駿發花園,呢段廣東道剷走咗來起呢個屋苑。

九廣鐵路公司計劃起九龍南線嗰陣,有諗過響尖沙嘴海港城邊起廣東道站,同海港城業主九龍倉傾,不過因為傾成本分擔傾唔掂數,最後都冇起到。不過近官涌嘅九龍西站,都係響廣東道側邊,就響舊時佐敦道碼頭巴士總站個位度。

沿路主要建築[編輯]

美國Hard Rock Cafe餐廳,尖沙咀一段

參考[編輯]

  1. 《九龍街道命名考源》梁濤 著,第六頁,市政局出版,1993年
  2. 《香港歷史文化小百科16-趣談九龍街道》 爾東 著,第77-78頁,明報出版社,2004年11月,ISBN 962-8871-46-3