戲曲中心

出自維基百科,自由嘅百科全書

座標: 22°18′8.2″N 114°10′2″E / 22.302278°N 114.16722°E / 22.302278; 114.16722

戲曲中心入口

戲曲中心粵拼hei3 kuk1 zung1 sam1英文Xiqu Centre)係香港一間戲曲表演場地,位於九龍西九文化區東面入口、廣東道柯士甸道西交界,將會致力促進同傳承戲曲文化,鼓勵創新,培育新晉藝術家,並開拓一班觀眾,戲曲中心喺2019年1月20號正式開幕[1]

概覽[編輯]

戲曲中心將會成為一個世界級嘅表演場地,致力保存、推廣同發展戲曲,包括粵劇同其他戲種。戲曲中心嘅設施完備,可以用嚟演出、新作培育、研究、教育、培訓同交流嘅用途。更會提供技能發展計劃,以培育戲曲新人同推動戲曲創作。透過同香港唔同戲曲組織同藝團緊密合作,戲曲中心將會面向更多來自香港同世界各地嘅觀眾,推廣傳統中國表演藝術。

獲選設計[編輯]

2012年3月,舉辦咗一個為期十個月嘅設計比賽,為戲曲中心物色最適合嘅概念同設計團隊。來自世界各地超過五十個建築設計團隊,表示有興趣參與呢個項目,同年12月10號,加拿大建築師譚秉榮建築事務所,連同香港建築師呂元祥建築師事務所組成嘅團隊,獲選成為呢個標誌性表演場地嘅設計團隊。 譚秉榮建築事務所同呂元祥建築師事務所嘅設計方案,令到戲曲中心充分體現戲曲嘅精髓之中。結合劇院、藝術同公共空間嘅早期設計,表達咗四個重要概念:

  1. 戲曲中心嘅流線外型,以至空間嘅鋪排處理,呈現出「氣」嘅概念;
  2. 大自然嘅概念,喺戲曲中心各層嘅綠色景觀之中呈現;
  3. 大門同表演亭台概念,觀眾可以從戲曲中心嘅四個角落入到劇院;
  4. 庭院嘅概念,喺地面層嘅全天候有蓋公共空間之中體現,營造一個上演活動同慶典嘅都市舞台。

設施[編輯]

2018年12月30號,喺戲曲中心大劇院舉行嘅戲曲中心開台儀式,由時任香港行政長官林鄭月娥(左三)、西九文化區管理局董事局主席唐英年(左四)、香港八和會館理事會主席汪明荃(左二)等人主持。大會司儀係方健儀(右三)同劉焯文(右二)
中庭

大型開放式中庭係戲曲中心嘅門戶,呢個有蓋公共空間係上演各種活動同慶典嘅都市舞台。公眾可以喺呢度欣賞展覽、聽音樂會或參加戲曲講解同示範。

大劇院

大劇院座位超過1000個,邀請來自香港、中國各地同埋東南亞地區嘅著名戲曲藝術家同戲團,定期上演傳統同創新戲曲表演。

茶館劇場

茶館劇場配備當代中式傢俱,氣氛精緻典雅,舞台形式同枱凳可以靈活變動,拉近演出者同觀眾嘅距離。常駐嘅茶館新星劇團演出時間為禮拜三至禮拜日,大概個半鐘精選粵劇折子戲嘅演出,導賞員深入淺出解說,配以粵式茗茶點心,重現古代戲曲茶樓文化。

演講廳

演講廳設有共108個座位,畀放映會、座談會或文化交流活動使用,並定期舉辦各類型戲曲同文化藝術知識普同活動,例如「西九101」講座系列、電影放映等。

排演室

8個唔同大細嘅排演室配備有投影設施、基本燈光同音響系統。排演室1同排演室3嘅樓底高達8米,最大嘅排演室1面積更係同舞台差唔多大,令演出團隊可以更完善噉進行排練。

交通[編輯]

戲曲中心附近有港鐵東涌綫機鐵九龍站高鐵西九龍站屯馬綫柯士甸站

[編輯]

參考[編輯]

  1. 西九文化區戲曲中心明年1月20日開幕 《香港電台》 2018年10月15號

出面網頁[編輯]