1964年奧運會聖火接力

1964年奧運會聖火接力，嗰時叫東京世運會聖火，係指一九六四年東京世運會舉行時嘅聖火，當時係第十八屆世運會。

東京世運會，係亞洲首次世運會。聖火由奧林匹克火把乘住，喺希臘奧林匹亞點起，東行經亞洲各城，傳到日本東京場地。聖火坐飛機，到唔同城。城城之中，捧棒傳聖火，點着火盆，再搭飛機去其他城。到咗十月十號，到東京場地，點着火盆，當年世運會亦正式開幕。聖火最後閉幕禮而熄滅。

火把

當時香港工商日報話，火把係銅造，似神燈一盞。查實一九六二年，世運會有委員會，制訂傳送裝備。火把係要易點，抵得住大風落雨，亦要易於棄置。東京奧運會火把，係長管形，下有托。管係不鏽鋼製，黃銅色。而托係鋁製，暗黃銅色，爲咗輕身而用鋁。火把長六四五毫米，重八百卅六克。

路線

聖火傳經好多城市，除咗雅典同伊斯坦堡喺歐洲，全部都喺亞洲，大部份喺日本國內。聖火傳送大致順利，除咗香港一站因打風整壞飛機，換機阻咗一日。

奧林比亞

1964年8月21號，希臘王君士坦丁二世，同身爲希臘奧委會主席嘅公主艾連，一齊喺奧林比亞主持點取火。女祭司拎住火把，用日光聚焦點着。經神廟沿海跑到雅典。

雅典

8月23號二點十五分，日航飛機去土耳其伊斯坦堡。

伊斯坦堡

聖火五點鐘到伊斯坦堡市郊，過咗一晚，24號飛到貝魯特。

貝魯特

聖火廿四號到貝魯特。

香港

世運聖火，1964年9月4號抵港，第二日9月5號離港。當時香港行夏令時間，實際係慢一粒鐘。聖火由菲律賓馬尼拉赴港，搭日航飛機，名富士。其時颱風露比臨襲香港，經已掛一號戒備信號。飛機未到，就偶落大雨，但無減香港人嘅熱情，萬人沿途等聖火，水洩不通。聖火原定六點抵港，之但要兜路避風，要六點廿分先到，地爲啟德機場。日人高島文雄，戴住白手套聖聖火捧落機，交到葡籍跑手蒙帝路離開機場。會長沙利士到場迎接。蒙帝路送到宋皇台道轉角，傳火到傑他利士嘅火把。由土瓜灣到紅磡一段，傑他利士傳到菲爾特。喺漆咸道、楠道到加士居道交界，菲爾特傳畀威林起路，威林起路向尖沙嘴走，有李美度士接應。直到尖沙嘴碼頭側邊嘅九龍公眾碼頭，就交畀柏士過海。搭海事署輪船四十五號，到皇后碼頭。碼頭上有張乾文接應，跑到大會堂點火盆。當時香港總督戴麟趾演辭中，市政局決定立世運道同世運公園，以資紀念。其時掛咗三號風球。聖火過咗一晚，要返到機場。

台北

聖火响9月6號由日本航空專機運抵台北市，傳遞路線由松山機場出發，經民權東路、南京東路、西門町中華路、總統府、信義路、南京東路，以台北市立體育場（而家叫做「台北田徑場」）為終點。聖火响第二日（9月7號）按原路線反方向運到松山機場離開台北。為咗迎接聖火首次經過台北，中華民國政府整咗一座毛公鼎造型嘅聖火台擺喺台北市立體育場門口前面，畀聖火停駐一晚。

呢個係到而家唯一一次入咗台灣嘅奧運聖火。