2024年9月5號日本國家男子足球代表隊對中國國家男子足球代表隊賽事
2024年9月5號日本國家男子足球代表隊對中國國家男子足球代表隊賽事，喺2024年9月5號夜晚喺日本埼玉縣嘅埼玉體育場舉行，係場2026年FIFA世界盃外圍賽亞洲區第三圈（十八強）C組賽事，由日本國家男子足球代表隊（日本隊）對中國國家男子足球代表隊（中國隊）。
賽前國際足球協會嘅世界排名入面，日本隊排第18位，而中國隊排第87位[1]；日本隊正選球員身價係1.95億歐羅，而中國隊正選球員身價係615萬歐羅。日本隊正選球員都喺歐洲揾食，身價最低嘅谷口彰悟值150萬歐羅，比中國隊身價最高嘅正選球員武磊嘅120萬歐元重高咗30萬歐羅[2][3]。賽前，中國隊自1998年2比0贏過日本隊開始，從嚟未贏過日本隊，其間戰績係14戰6和8負。不過，爾段時間日本隊最多都係贏兩球，從未試過贏三球以上[2]。
喺呢場比賽，日本對中國火力全開[1]，先後憑遠藤航、三笘薰、南野拓實、伊東純也、前田大然同久保建英建功，以7-0大炒中國[4]。對中國隊嚟講，亦係繼1985年5月19號中華人民共和國足球代表隊對香港足球代表隊賽事、2013年6月15號中華人民共和國足球代表隊對泰王國足球代表隊賽事同2022年2月1號越南男子足球代表隊對中華人民共和國男子足球代表隊賽事之後再度恥辱性輸波，受到中國球迷同傳媒猛烈抨擊。
中國隊喺本場賽事創造咗多項慘敗紀錄，包括：對日本隊最大比分失利；FIFA世界盃外圍賽單場最多失球；FIFA世界盃外圍賽最大比分失利[2]。
參考資料
[編輯]- ↑ 1.0 1.1 〈世预赛亚洲区18强赛开赛 中国男足客场0:7惨败日本队〉。《中国新闻网》。2024年9月5號。
- ↑ 2.0 2.1 2.2 宋承良 (2024年9月5號)。〈防守糟糕！国足客场0比7不敌日本，创队史正赛最大比分失利〉。《澎湃新闻》。
- ↑ 宗祺 (2024年9月6號)。〈国足惨败日本，0比7的差距到底有多大？〉。《新华报业网／北京日报》。
- ↑ 〈2026年世界杯亚洲区预选赛18强赛：中国男足客场0-7日本队〉。olympics.com。2024年9月5號。