香港01
 香港01標誌 （2018年9月-） | |
| 網址 | hk01 |
|---|---|
| 網站類型 | 新聞 |
| 可用語言 | 繁體中文 |
| 擁有者 | 香港01 |
《香港01》（英文：HK01）係香港新聞媒體，2016年1月成立，主要搞網上新聞，2016年3月11號創辦同名周報《香港01》，逢禮拜五出版。創辦人係做過《明報》老闆嘅于品海，編採成員多數由《明報》、《明報周刊》、《南華早報》、《壹周刊》等等媒體過檔。佢嘅宣傳口號係「社會撕裂 大家都輸 是時候改變了」（粵文意思：係時候改變喇）。
由於高層立場係親中建制派[1]，但係前線員工嘅立場就普遍為泛民主派[2]，因此被視為中間派傳媒。
除咗媒體業務之外，《香港01》搞埋個外賣自取平台，叫「e肚仔」。
2023年10月13號，香港01母公司南海控股（HKSE: 0680）被香港交易所除牌。[3]唔夠一個禮拜，創辦人于品海又被一間公司入稟高等法院申請破產。[4]
閱讀數據
[編輯]根據獨立第三方機構Comscore數據，2020年11月《香港01》按月不重覆總觀眾人數有成500萬，係香港新聞／資訊-綜合新聞類別第一。喺2018年7月至2020年12月期間30個月，成為iOS App Store及Google Play Market香港新聞類免費App總下載量排名第一，當中有成20個月喺iOS App Store及Google Play Market香港新聞類免費App下載排行榜排名第一。
如果按每日計數，睇返Google Analytics數據，《香港01》平均每日不重複到訪人數直迫200萬人次，平均每日點擊次數迫近5000萬次。其中一個讀者睇《香港01》website嘅渠道係透過Google搜尋，搵到讀者有興趣嘅內容。由2019年底起，《香港01》Google關鍵字數目係全港媒體第一。
政治立場同爭議
[編輯]《香港01》涉及過唔少同政治立場同編採自主有關嘅紛爭。《立場新聞》喺2021年訪問咗幾個喺「親中派媒體」（包括《香港01》在內）嘅記者，就暴露咗一啲情況。有受訪記者甚至形容因為投資人于品海代任總編輯，編採自主蕩然無存[5]。
刪改六四事件解密檔案報道
[編輯]《香港01》喺2017年12月曾經發表一篇關於六四事件嘅文章，引述英國駐華大使館嘅解密資料，但原文發出後被撤換，略過咗好多原文嘅細節，亦刪減咗好多對解放軍士兵入城時嘅具體情況描述[1]。
被修改嘅內容包括：
- 描述中國解放軍27軍喺天安門清場嘅時候，刪咗士兵向學生、平民同冇武器嘅士兵發動「無差別攻擊」嘅字眼[1]。
- 無武器嘅士兵同學生被到達現場嘅軍車「射殺」，修改後變成佢哋「中槍」[1]。
- 引述英方報告指裝甲車多次輾過屍體將佢哋壓成「餡餅」，附有英文原文，但呢啲文字同英文原文後來被刪去[1]。
鄭若驊僭建醜聞期間
[編輯]有《香港01》記者喺2021年接受咗《立場新聞》訪問嘅時候話，2018 年啱啱上任律政司司長嘅鄭若驊爆出僭建醜聞，兩三個之後，有高層曾經婉轉阻止下屬跟進呢單新聞[5]。
2019年區選違反選舉條例同阻止記者訪問素人
[編輯]第6屆香港區議會選舉前夕，《香港 01》一連發表兩篇文章，一共點名唔支持 203 個候選人[6]，多數係泛民主派人士，被質疑違反《選舉（舞弊及非法行為）條例》[7]。另外，高層亦忽然唔畀前線記者再訪問一啲被視為空降嘅素人[5]。
事件引嚟泛民主派嘅批評，其中，時任立法會議員區諾軒（陳欣兒嘅師父）就批評做法唔負責任，而且侮辱咗傳媒呢兩個字，直斥《香港01》咁做係垃圾[7]。另外，《香港01》至少133名編採人員，來自突發、港聞、偵查、法庭同社區等近10部組，之後亦發表實名聯署聲明，質疑呢啲評論有欠公允、有失專業，更可能影響選舉嘅公平公正，又冇畀當事人機會解釋，對呢啲評論表示遺憾同強烈唔同意[8][9]。
另外，大律師龔靜儀接受訪問時亦認為，廉政公署同選管會應跟進事件[10]。
參考
[編輯]- ↑ 1.0 1.1 1.2 1.3 1.4 〈《香港01》刪改六四事件解密檔案報道惹關注〉。《英國廣播公司》。2017年12月21號。原先內容歸檔喺2019年6月17號。喺2020年8月2號搵到。
- ↑ 劉瀾昌 (2018-07-03)。《《在河水井水漩渦之中: 一國兩制下的香港新聞生態【增訂版】》》。秀威資訊。頁 344–345。ISBN 9789863265597。
- ↑ 〈南海控股月底除牌 不申請覆核〉。《明報》 (繁體中文)。喺2023-10-21搵到。
- ↑ 〈于品海涉債4億 遭建銀申破產〉。《明報》 (繁體中文)。喺2023-10-21搵到。
- ↑ 5.0 5.1 5.2 〈【獨立報導・1】反送中引燃政治審查 記者的抉擇：堅持還是離職？ | 立場專題 | 立場新聞〉。《立場新聞 Stand News》 (英文)。原先內容歸檔喺2021-03-19。喺2021-03-18搵到。
- ↑ 評論編輯室 (2019-11-23)。〈什麼人不符合出任區議員應有的品格和德行〉。《香港01》 (香港中文)。原先內容歸檔喺2021-03-21。喺2021-03-18搵到。
- ↑ 7.0 7.1 〈區選前夕 《香港 01》列兩「不支持候選人名單」 多數為民主派 | 立場報道 | 立場新聞〉。《立場新聞 Stand News》 (英文)。原先內容歸檔喺2021-03-21。喺2021-03-18搵到。
- ↑ 〈【決戰區選】《香港01》點名不支持候選人涉違例 過百編採聯署轟欠專業影響公平公正 ｜ 蘋果日報〉。《Apple Daily 蘋果日報》 (香港中文)。原先內容歸檔喺2021-03-21。喺2021-03-18搵到。
- ↑ 〈一群《香港01》編採人員就公司兩篇評論之聲明 | 獨媒轉載〉。《香港獨立媒體網》。原先內容歸檔喺2021-03-21。喺2021-03-18搵到。
- ↑ 〈區選2019：《香港01》發不支持候選人名單涉違選舉例〉。《on.cc東網》 (香港中文)。原先內容歸檔喺2021-03-21。喺2021-03-18搵到。
