島

島指完全被海、河、湖等水體包圍嘅陸地。又有叫洲、嶼、山、星等等，字義相近，亦有分別，地域習用唔同。廣東話地名，多數用洲。如香港嘅長洲。受中國近代政權統一影響，有啲改以島為尾。學術上多稱島。

洲經佛教，引伸到大洲，畀大洋包圍。如今世界七大洲概念，歐洲、亞洲，由此而來。

名[編輯]

洲名，受地域，起名族羣，洲形，時局，政治變更，而有所變化。

洲最初寫州，甲骨文已有，水中地咁解。古文明，由耕田發展出來，養起眾多人，多數江邊水邊，州就係川中地嘅形態，水中可居嘅地方。之後州字加義，轉為地域分野。於是另造新字洲，以示原意。

佛教講世界，有四洲，浮喺水上，即四大洲。翻譯西洋世界分野，如亞洲歐洲，亦參攷佛教概念而來。

州。水中可居曰州。周遶其旁，从重川。昔堯遭洪水，民居水中高土，故曰九州。《詩》曰：在河之州。一曰：州，疇也。各疇其土而生之。

島，原寫㠀，上鳥下山，島指海中住得嘅山。有異寫嶋。現今外國名多繙為島。

㠀。海中往往有山可依止曰㠀。从山，鳥聲。讀若《詩》曰：蔦與女蘿。

嶼，意思同島一樣。但通常指細啲。福建話常用，如鼓浪嶼、糖嶼，廣東話少用。香港有大嶼山，但嶼字可能另一啲字訛變。

嶼。㠀也。从山，與聲。

山，海水之州都係山，中國古輿圖常見。廣東有零丁山、萬山、七星山。福州有馬祖山。浙江臺灣，以及東海，多叫山，如舟山。

星，通常幾個洲為一組，如七星，九星等。

簪或針，好細嘅洲，細到石咁，如大星簪。

沙，水上浮出來嘅沙洲，多數喺江口。如萬頃沙。亦有南海大洋中積沙地。

礁，水面見到嘅石，沉低過水面，就係暗礁，福建嗰面常用，如將軍礁。現今學術亦用，如珊瑚礁。

近代學術跟日本，通稱島為多，按西洋意思，繙有羣島、列島。另有火山島，人工島。