太平洋颱風季（英文：Pacific Typhoon Season）係指一年內喺赤道以北同埋國際換日線以西嘅太平洋水域，包括南中國海，所產生嘅熱帶氣旋嘅一段時間，係風季嘅一種。雖然而家氣象台冇定下任何颱風季嘅指定期限，但係大部份喺西北太平洋嘅熱帶氣旋通常都會喺5月至12月期間形成。據香港城市大學嘅統計顯示，喺1950年至2000年期間，平均每年就大槪有31個熱帶氣旋產生，其中27個嘅風力達到熱帶風暴嘅程度，其中17個重達颱風嘅程度。
