野豬

How to read a taxobox 野豬
香港嘉道理農場裏面養嘅野豬
瀕危指標
最唔使理（Least Concern） (LC)
物種分類
界 動物界 門 脊索動物門 綱 哺乳綱 目 偶蹄目 科 豬科 屬 豬屬 種 S. scrofa
二元學名
Sus scrofa Linnaeus，1758年

野豬（學名：Sus scrofa），係家豬嘅祖先，但係體格較強健，主要係灰黑色，腳同咀尖端呈白色，面同喉嚨有灰白毛。細個嗰陣頭大、耳又尖又長，豬公嘅牙生得非常之發達，由個口度突出嚟，向外彎曲。

分佈

野豬分佈好廣泛，大部份歐洲、亞洲、南美洲、中美洲都搵倒佢哋，其他洲都有一尐地方有。

習性

繁殖期全年，妊娠期約 130 日，一胎可生 4 - 8 隻，而一隻野豬壽命可達 21 年。除交配季節外，豬公一般獨居，豬乸同豬仔一般成群出沒。

象徵

德國 Eberbach 鎮野豬徵章

喺古時候蘇格蘭高地嘅 Campbell 部落，野豬畀佢哋用作臂章以表示勇氣同勇猛。喺同屬蘇格蘭嘅 Urquhart 部落，都係用三隻豬頭嘅圖案做徵章。古代波斯嘅 Sassanaid 帝國，野豬視為勇猛同勇敢嘅動物。野豬亦喺 英王理察三世嘅象徵。喺德國 Eberbach 鎮，野豬被用作該鎮嘅徵章。喺比利時，野豬係南部 Ardennes 森林嘅象徵，同時亦係比利時陸軍 Chasseurs Ardennais 軍團嘅吉祥物，軍人都喺佢哋嘅貝雷帽上扣上野豬扣針。

遇到野豬點算

日本神戶市東灘區公所咁講：

1. 唔好理野豬，野豬會行開。
2. 如果野豬行近你，唔好驚，慢慢打倒褪。行動快只會嚇親野豬，令難以預計嘅事情發生。
3. 唔好追捕野豬，受驚嘅野豬可能發癲咁亂噉走，撞傷人。

香港嘅野豬

野豬係香港現時身型最大嘅原生哺乳動物，喺香港分佈亦好廣泛，香港島、大嶼山、大帽山、新界東北、西貢同清水灣都搵到佢哋嘅蹤影。喺好多種生境都搵倒野豬，包括林地、草原甚至農田郊野地帶。

因為香港冇乜會食野豬嘅猛獸，野外原有嘅華南虎一早已經死清光，得緬甸蟒蛇對野豬仔有潛在威脅，加上野豬繁殖得好快，數量容易失控，破壞唔少農田。野豬重會食農作物，最鍾意嘅係蕃薯、野葛同土伏苓。目前對香港嘅野豬研究仍然係起步階段，可能係香港生態裏面重要嘅清道夫（食動植物嘅屍體），而翻土行為亦可能有利植物生長。

出沒

香港政府接到有關野豬滋擾人嘅投訴，2004年有 42 個、2005年有 116 個、2006年有 135 個。投訴人主要係擔心野豬威脅人身安全同破壞財產。2004 至 2006年間，香港政府只喺紀錄咗有一宗「有人因驅趕野豬而受傷」嘅報告，傷者傷勢並唔嚴重。野豬近年滋擾人嘅地點包括：粉嶺鶴藪、崇謙堂村、大埔松嶺、汀角路、葵涌醫院同埋元朗八鄉菠蘿山清潭水塘。

野豬狩獵隊

為咗處理野豬擾民同傷人問題，警方喺二十世紀七十年代後期，成立咗由民間志願人士組成嘅野豬狩獵隊。漁農自然護理署根據香港法例第 170 章《野生動物保護條例》向隊員發出「特別許可證」，而警方亦向佢哋發出槍械牌照。野豬狩獵隊射殺嘅野豬數目，2004年係 6 隻、2005年又係 6 隻、2006年係 52 隻。

野豬狩獵隊成員要考筆試同射擊，合格後唔使差人陪同都可以行動，但係每次行動要事先通知警方，事後亦要詳細報告開槍細節，而喺狩獵行動四個鐘頭之內，要帶返啲紀錄同彈頭畀警方，以防有人違規用槍。狩獵隊嘅所有開支都係自費，並且要自己買第三者保險，政府一個仙都唔會津貼。成員幾乎都係退咗役嘅香港差人。

該隊伍人士向傳媒透露，行動時殺嘅通常係大公野豬，其餘嗰啲就嚇到匿返入山林，唔多敢再出嚟見人，而所得獵物，會攞來食（編按：未必次次都會）。

政府忽然之間由嚴格保護變成頻繁撲殺

民間非專業者驅趕來犯嘅野豬時，除咗可能自己受傷，重要冒法律風險，皆因此乃受保護野生動物。而阻止野豬擾民嘅基本策略，依然係控制其數量；野豬狩獵隊由2019年4月起唔准再出動。取而代之嘅，係由漁農署主導，用活捉，絶育再放生嘅程序處理，不過此行徑失敗，野豬變得比之前擾民，然而漁農署繼依然宣稱有進展，呢種動物亦繼續受法律嚴格保護。喺2021年11月，政策突然鉅變，外間相信係一次香港警察嘅任務失敗所致。有警察同漁農自然護理署職員合組嘅一隊人，出動去生擒一隻野豬時，出咗岔錯，有個輔警俾佢咬傷咗，目標野豬亦墮樓而死。漁農署好快就突然宣布，改成自行派員頻繁出動，喺市區一揾到野豬就捉去殺死。民間及大部分議員對此激烈反對，認為極唔人道。特首林鄭月娥指應該靠毀滅野豬嚟保護兒童云云。漁農處亦更改其網站，將保護野豬嘅條文刪除。野豬狩獵隊嘅槍擊，針對攻擊性強嗰啲野豬，弱嘅就驅逐到之後唔敢再去人住嘅地方；至於民間其他人，受法例限制唔可以殺、傷、捉或者虐待，通常嚇到佢哋當刻過咗就算數；然而漁農處做嘅就包括主動去非民居地帶誘捕，就連馴良者以及無能力傷人嗰啲細嘅，都殺無赦，動物權益團體指其行為非常卑鄙。漁農署同警察等人合組嘅隊伍出動殺野豬時，亦會即場遇到市民嘅反對。警務署署長蕭澤頤向傳媒講，該署並無向漁農署施壓嚟令佢哋改變政策。之後，由漁農署同警察主導嘅香港政府人員，繼續週圍捉啲野豬再毒死，例如，喺緊貼郊野嘅民居地帶曾經有兩隻野豬徘徊揾嘢食而並無襲擊人，亦已經被警察趕返樹林之中，然而漁農署晏啲派咗人去該處，揾到一大一細兩隻野豬（編按：唔見有消息指明被趕走同被殺嘅係唔係同樣嗰兩隻），一律滅口。

非獵殺嘅應對方法

1. 裝電子圍欄
2. 控制野豬繁殖數量

連出去

• Wild Boar in Britain
• Higashinada Ward Office, Kobe-city, About Wild Boars
• 立法會五題：野豬出及狀況

睇埋

• 台灣哺乳動物
• 香港哺乳動物