大牌檔

大牌檔

大牌檔又寫大排檔，係香港一種好受歡迎嘅露天食肆，最大特色係冇冷氣同埋唔係太企理、有好多唔同種類嘅食品、抵食、同埋夠鑊氣。雖然被視為香港人嘅集體回憶，但係真正嘅大牌檔到今時今日已經買少見少。直到目前為止，全香港只係剩返廿九間大牌檔，主要集中喺中環、深水埗同埋石硤尾。另外，喺一啲市政大廈熟食中心入面嘅食肆會保留些少大牌檔原有嘅風味。

歷史

呢類無牌經營嘅熟食檔喺19世紀末開始出現，向收入低微嘅人提供包括粥、飯、麵等等嘅平嘢食。除咗中環之外，灣仔同埋跑馬地馬場周圍都有唔少熟食檔。其實，1918年跑馬地馬場大火就係由平台下面嘅熟食檔引起。另外，喺一啲碼頭附近亦有呢類熟食檔，叫做為食碼頭，專做搭船過海嘅乘客生意。

第二次世界大戰之後嘅1945年，香港嘅殖民地政府為咗令到喺戰爭期間死傷嘅公務員嘅屋企人有嘢做，所以就發咗啲特別嘅牌照畀佢哋喺公眾地方開熟食檔。個牌上面有持牌人嘅相。因為呢種牌畀一般嘅牌大張，所以就俾本地人叫做大牌，而呢類熟食檔就順理成章叫埋做大牌檔。由嗰陣時開始，香港嘅街頭巷里就越嚟越多大牌檔。

不過到咗1956年，因為大牌檔造成嘅交通阻塞同埋衞生問題，同埋一啲持牌人喺黑市將經營權出租，政府決定唔再發出「大牌」，同時唔再畀轉讓同埋繼承牌照。

1975年之後，好多大牌檔搬咗去一啲好似尖沙咀海防道之類嘅臨時街市，又或者由市政局管理嘅市政大廈入面嘅熟食中心度經營，以便監管。為咗改善公眾衞生，政府又喺1983年起陸續向持牌人贖返呢種牌照。由於大部分持牌人都已經年紀大，同埋牌照只可以轉讓畀配偶，好多持牌人都將大牌交返畀政府，要番啲賠償。由呢個時候起，傳統嘅大牌檔就好快咁減少。

到咗而家，好多大牌檔都係生存喺熟食中心，而有部分較為成功嘅就搬咗去有冷氣嘅鋪位度經營（不過，亦有啲，好似結志街嗰間噉，就同時保留咗原來嘅街檔口）。但係，或者係因為舊式嘅大牌檔象徵住好多香港人嘅集體回憶，佢哋好多都會認為呢啲搬走咗、唔再係喺路邊開檔嘅大牌檔係唔及得舊時嘅咁好食。