亞摩尼亞

亞摩尼亞分子結構

氨（粵拼：on1），又叫做氨氣或者阿摩尼亞，係氮同氫嘅化合物，分子式係NH₃。佢喺室溫下呈氣態，無色兼帶有強烈而刺激嘅氣味，密度細過空氣，易溶落水，但唔容易解離，佢嘅水溶液係弱鹼性。

氨對陸上生物來講係相當之重要，因為佢係所有食物同肥料嘅重要成份，重係所有藥物嘅成份。雖則氨有咁重要而又廣泛嘅用途，但係佢既帶有腐蝕性，亦都有害。2006年，全球就生產咗大約十四億六千五百萬噸氨。

商業上，都會經常叫氨做「脫水氨」。呢個叫法所強調嘅係氨呢種物質係冇水喺裏頭嘅。氨嘅沸點係−33.34℃，故此液態氨就一定要儲存喺高壓，或者低溫嘅環境。而佢嘅汽化熱都算幾高，即係話如果佢已經係液態嘅話就唔會咁易變返氣態，所以氨可以裝喺普通嘅燒杯同埋放入通風櫃道處理。而「氨水」其實就係氨溶液。

結構及基本化學特性

氨嘅份子結構係三角錐形，而根據價層電子對互斥理論（VSEPR），佢嘅鍵角就係107.8°。中間嘅氮原子本身有五粒最外圍電子，再加埋三粒來自三個氫原子嘅附加電子，佢最外層就會有八粒電子，呢四對電子會排喺氮原子嘅四面，其中三對會用來做鍵對，淨返一對就係孤對電子喇。孤對電子嘅排斥力係大過鍵對電子嘅好多，所以佢就唔會好似想像中嘅正四面體噉鍵角109.5°，而係量度到嘅鍵角107.8°。亦因為呢對孤對電子，氨成為質子接受體，鹽基。 而呢個結構就令到佢有電偶極矩同帶有極性。正正因為佢有極性，又有高嘅建氫鍵能力，所以極易溶混於水。氨其實係一隻弱鹼，佢1.0M水溶液嘅pH值係11.6啫。如果加強酸入去直至變成中性，就會大約有99.4%嘅氨份子會質子化。而溫度同鹽度就會影響NH₄⁺嘅比例喇。NH₄⁺嘅結構就係正四面體，而且亦都同甲烷等電子。

大自然含量

喺大氣層之中，氨嘅份量其實僅屬微量，主要來自動植物屍體嘅腐化。另外，喺雨水之中，亦都發現少量氨同銨鹽；喺火山地區就會搵到氯化銨同硫酸銨；至於碳酸氫銨結晶體就會喺巴塔哥尼亞海鳥糞之中搵到。腎臟亦會分泌氨去中和過多嘅酸。而喺海水同所有沃土道，都會發現銨鹽。冥王星同木星上面都搵到氨，而天王星就僅有少量。

歷史

爾個高壓反應器係巴斯夫1921年喺路德維希港道起嘅。其後，喺德國卡爾斯魯厄大學道重新樹立。

「阿摩尼亞」得名於埃及主神阿蒙嘅希臘化名（Ἄμμων Ammon）。當時，古利比亞阿蒙廟附近有氯化銨礦，正因為好近座廟，羅馬人採後就叫啲礦做「阿蒙鹽」（sal ammoniacus）。 氨鹽好早就為人所知曉，而「Hammoniacus sal」爾個詞亦早見於老普林尼嘅著作，雖然唔知爾個詞係埋就等同於新啲嘅「sal-ammoniac」，即氯化銨。