複都制

複都制（粵拼：fuk1 dou1 zai3）係種國家設置多個首都嘅制度，相對嘅概念係只設置一個首都嘅單都制。有住廣大領土嘅國家多數會噉採用。有兩個京都時稱爲兩都制（loeng5 dou1 zai3）、兩京制（loeng5 ging1 zai3）。

另外，複都制亦指將國家嘅首都機能分散入多個都市嘅制度。關於現代嘅複都制請參照首都#特殊情況。

喺中央集權國家嘅複都制，皇帝常住嘅都城叫「上京」、「上都」、「京城」、「皇都」、「京師」，其他嘅都城叫「陪都」、「留都」。不過，同陪都對應嘅語句喺西洋係無嘅，呢樣係東亞先有嘅嘢，稱呼做陪都制（pui4 dou1 zai3）。陪都亦係國都，皇帝搬去陪都唔係遷都，而係陪都升咗格。比如日本史中講嘅難波遷都，正確講法係天皇嘅陪都巡守同皇都昇格，同搬咗國都嘅遷都唔同。

皇帝留喺陪都時，皇帝唔喺度嘅皇都裏頭會設置國政代理，喺限制權限嘅基礎上由太子監政叫做「太子監國制」，託付畀信賴得過又有力支撐朝政嘅重臣嘅做法叫做「留守官制」。

羅馬帝國嘅複都制

喺2世紀後半，喺羅馬帝國出現正帝同副帝嘅分治，到戴克里先皇帝時代，帝國分成東西兩部，兩位正帝同兩位副帝夾埋成四帝共治。於是設置四都：尼歌美地亞（希臘文：Νικομήδεια，轉寫：Nikomedeia；即而家嘅伊茲篾，土耳其文：İzmit）、士妙雍（拉丁文：Sirmium）、米迪柯拉農（拉丁文：Mediolanum；即而家嘅米蘭）、奧古斯塔·堤里維羅隆（拉丁文：Augusta Treverorum；即而家嘅堤雅），就噉羅馬失去咗首都機能，但名義上繼續係帝國嘅首都。之後，西方正帝君士坦丁一世統一咗帝國，喺東方建立新都君士坦丁堡。

395年，東帝狄奧多西一世（西帝由佢年幼嘅細仔霍諾留喺形式上擔任）死咗，大仔阿卡狄奧斯做咗東帝，設置兩個都城：東面嘅君士坦丁堡、西面嘅米迪柯拉農（之後遷都去拉文納），羅馬帝國進一步東西二分成拉丁文圈同希臘文圈。

中國嘅複都制

中國嘅複都制開始於城邦時代嘅周朝。周朝興起於關中呢塊渭水流域嘅盆地，佢嘅東方係殷商呢個華北平原諸國嘅盟主，周滅商後，喺關中到呢個平原嘅出口度，有個洛水流域嘅要衝，就喺嗰度建設咗洛陽，作爲支配東方諸國嘅據點，之後又有作爲長安前身嘅關中嘅鎬京，佢同洛陽成爲周朝兩個據點，以此君臨天下，作爲諸侯呢班臣從城邦嘅盟主。

秦朝興起自關中，征服咗中原諸侯呢個國際社會，開拓出統一王朝，但佢喺短期間內崩潰，繼襲佢嘅係西漢呢個長期安定嘅統一王朝，佢以長安爲首都，又以洛陽爲複都來施行佢嘅統治。不過，西漢崩潰後，透過豪族嘅聯合政權再生出來嘅東漢轉移咗佢嘅重心，出咗關中搬到洛陽繼續實行佢嘅統治。

到咗失去漢朝統一後嘅南北朝時代，北周亦實行複都制，其中關中嘅長安作爲首都，係因爲佢係政權中樞嘅軍事力量嘅集結所在，位於東方華北平原出口位置嘅洛陽做咗陪都，噉係因爲佢係穀倉地帶物資嘅集積地。隋朝繼續咗呢項制度，唐朝喺開元十一年（723年），喺長安、洛陽（東都）兩都之外加多太原做北都爲三京，太原北面係鄂爾多斯地方同黃土高原北部嘅遊牧地帶，嗰度有騎馬嘅軍事力量威脅唐朝，太原喺汾水流域扼守住軍事重地。喺至德二載（757年）設鳳翔做西京，鳳翔喺關中渭水盆地西端，離西域更近；設成都（蜀郡）做南京，成都喺四川盆地，係重要嘅穀倉地帶；加多佢哋做五京，不過呢兩個都城無耐就廢咗。唐朝國都中，洛陽集積住華北平原同江南呢啲穀倉地帶嘅物產，相比食糧貧乏嘅長安，洛陽嘅食糧更豐富，皇帝就留皇太子喺長安監國，經常巡幸洛陽。特別係武則天治世年間，佢就幾乎唔喺長安，而住喺洛陽呢個都城。就噉樣，洛陽作爲重要嘅陪都同長安並稱爲兩京。

之後，作爲蒙古帝國皇帝直轄政權嘅元朝成立，按照遊牧國家嘅傳統，皇帝共佢直轄嘅遊牧軍團設立作爲夏營地嘅夏都上都，又設立作爲冬營地嘅冬都大都，佢哋就喺兩都之間呢個廣大嘅首都圈內季節巡迴。明朝喺華北取代咗元朝，當初喺建國地南京統治全國，但舊時嘅大都係同北元對峙嘅前線基地，於是設置佢做北京，將重心移來呢度，於是有南北兩京複都制。興於滿洲嘅清朝喺建國之地設盛京，與之相共嘅係，爲咗統治佢所征服嘅中華世界，佢繼承咗明朝北京、南京嘅首都機能。另外，同樣興於滿洲嘅王朝如渤海、遼、金呢啲都設置五京。

王朝時代嘅中國出於呢啲原因盛行複都制：要統治王朝嘅大本營同征服地呢雙方、軍事上同統治權力上嘅首都機能同經濟上嘅首都機能錯開咗、遊牧國家嘅影響等。

到咗近代國家時代，喺抗日戰爭時放棄首都南京之際，一時之間將首都機能轉移到重慶，稱做陪都。

北宋

北宋搞四京制，設置以下四都：

• 東京開封府（而家開封）
• 西京河南府（洛陽）
• 南京應天府（河南商丘）
• 北京大名府（河北邯鄲大名）

遼

喺遼國，將國土分成五道，分別設置副都。

• 上京臨潢府（而家巴林左旗南波羅城）
• 東京遼陽府（遼陽）
• 中京大定府（赤峯市南，挨近河北省界）
• 南京析津府（北京）
• 西京大同府（大同）

渤海

喺渤海國，設置以下五京。

• 上京龍泉府（而家黑龍江省牡丹江市寧安市渤海鎮）
• 東京龍原府（吉林省琿春市八連城）
• 中京顯德府（吉林省和龍市）
• 南京南海府（北朝鮮清津市附近）
• 西京鴨綠府（吉林省臨江市）

四大古都同兩京制

喺中國，洛陽、南京、西安、北京並列做中國四大古都，其中洛陽同西安係東西二都，南京同北京係南北兩京，佢哋嘅並列同兩京制喺中國嘅歷史有關，呢個涉及到中國政治格局嘅變遷。以殘唐五代爲界，喺之前嘅格局係東西競爭，之後轉爲南北競爭。喺之前，關中係根本重地，因爲西北面有重點防範嘅遊牧民族，靠住函谷關可以東進去謀中原，可以西退閉關自守，所以定都西安有重大軍事意義，比如周武王東征滅商、秦始皇滅六國、漢高祖以漢中爲基地奪天下、隋唐依靠關隴集團統一中國，都係從關中出發；而洛陽地處中原，喺漢人南渡前，中原係中國嘅文化、經濟核心，憑住呢點洛陽亦攞到定都資格。

經歷殘唐五代十國嘅大亂，隨住漢人南渡，政治格局轉變爲南北競爭。一方面中國經濟重心轉到南方，結果發展上南北唔平衡，而另一方面南部漢人政權最大嘅威脅在於北部嘅遊牧民族，所以北京成爲爭奪焦點，漢人無咗北京會偏安南方，而遊牧民族攞到北京就可以揮鞭南下。於是定都北京有軍事用意以及均衡南北嘅意義，而南京代表住經濟勢力以及南方作爲退守基地嘅象徵。

中國嘅複都制經歷幾個階段：從周朝到漢朝係長安同洛陽嘅東西二都，用來控制關中、中原呢兩部分；到唐代時前期以東西二都爲主，後期轉變爲多京制，宋遼金時代流行環抱護衛嘅多京制，到明朝設南北兩京，入到南北均衡嘅時代。另外，南京同北京嘅名亦係來自明代時嘅兩京制度，但喺明清時係民間俗稱，論正式名，明朝嘅南京叫應天府，北京叫順天府；清朝嘅北京叫順天府，南京叫江寧府；直到民國，南京同北京先成爲各自嘅正式名。

朝鮮嘅複都制

高麗

喺高麗王朝，正都係開京（開城），加埋東京（慶州）、西京（平壤）做三京。到第八代顯宗嘅時代，喺1010年，加埋南京（漢城，而家嘅首爾）成四京。

日本嘅複都制

喺古代日本，對唐朝好強嘅模仿意識令佢採用咗複都制，喺王權發祥之地奈良盆地、同時亦喺水運要衝大阪灣岸同琵琶湖岸設置都城，延曆十二年（793年），桓武天皇廢咗做咗好耐陪都嘅難波宮，定平安京做唯一首都。

• 孝德天皇搬去難波宮，然後天智天皇搬去近江大津宮，但飛鳥京（倭京）亦得保存，所以佢哋同飛鳥並列爲二都。
• 天武天皇喺天武天皇十二年（683年），落詔話「但凡都城宮室都唔會得一處，必定造兩處。所以我想畀難波做首都先」，於是難波同飛鳥一齊做咗都城。
• 聖武天皇計劃喺平城京、難波京之外，營造形態夾住泉川嘅恭仁京（但平城京嘅大極殿同步廊移築去恭仁京，所以可以認爲佢同難波構成二都計劃）。一般認爲恭仁京係模仿當時檻過洛水嘅唐洛陽城而營造。
• 淳仁天皇喺平城、難波之外加多設爲北京嘅保良京。一般認爲噉係模仿唐朝嘅北京太原。喺天平寶字五年（761年）營造嘅保良京無耐就廢咗。
• 稱德天皇營造由義宮做西京，亦無耐就廢咗。
• 喺明治維新時，江戶改名做東京來奠都，同京都成爲兩京制（參照東京奠都、留守官）。

參攷資料

• 瀧川政次郎 (1967年)。《《京制並に都城制の研究》（京制及都城制研究）. 法制史論叢第二冊》 (日文)。角川書店。
• 山田邦和 (1992年)。《《福原京に関する都城史的考察》（有關福原京嘅都城史考察）. 長岡京古文化論叢2》 (日文)。三星出版。
• 喜田貞吉 (1979年)。《《都城の研究》（都城嘅研究）. 喜田貞吉著作集5》 (日文)。平凡社。
• 角田文衛 (1980年)。《《ヨーロッパ古代史論考》（歐洲古代史論考）》 (日文)。平凡社。
• 岸俊男 (1988年)。《《日本古代宮都の研究》（日本古代宮都研究）》 (日文)。岩波書店。

睇埋

• 京
• 首都
• 奠都
• 遷都
• 中國首都
• 日本首都
• 四帝共治制
• 雙京構想