扑嘢

扑嘢

扑嘢（粵拼：bok1 je5），指用陰莖抽插陰道性交嘅行為，為男性做主導嘅用詞，意思與「屌屄」相同；唔提主次嘅對應用詞係搞嘢。

其他形聲皆與「扑嘢」差唔多咁合理，不過極少人用嘅寫法有搏嘢、攴嘢、攵嘢、㩧嘢……

正如唔少同性相關嘅口語詞彙，「扑嘢」同「搞嘢」意思可以好模糊，有時亦會指其他形式嘅性行為。

官話潮語之中，有同義詞「打炮」。

要強調個行為充滿感情嘅話，會用「做愛」一詞。

來由

「扑」，係用棍棒或杆之類嘅嘢敲打嘅動作，可以話敲即係「扑」。有所謂「扑扑齋」，即係和尚一路唸經一路敲木魚（後來引申為就讀冇女生嘅男校）。

關於「扑嘢」一詞嘅由來眾說紛云，其中以呢五個比較繪形繪聲：

1. 喺做愛嘅時候，因為陰道有分泌物滋潤，當陽具一抽一插時就會發出「噗滋噗滋（扑滋扑滋）」嘅聲，於是就用咗「扑」呢個擬聲字嚟形容做愛。
2. 陽具好似一支棍咁，同女人性交就好似一棍棍咁「扑」落去女人嘅身體上。
3. 「扑」源自英文Bob，其中一個意思係上下（或來回）快速擺動，「Bob 嘢」即係男性嘅性交時擺動身體嘅動作。
4. 話說香港早年有個鐵匠晚晚喺屋企開工「扑鐵」扑到好夜，經常做做吓忽然興起就捉住老婆搞嘢，點知搞得太嘈，當鄰居走過嚟拍門投訴嘅時候，個鐵匠即刻話：「唔好意思呀，重扑緊嘢，好快搞掂！」，投訴鬧到上當時新聞紙亦有報導，就咁呢個詞語就變成做愛嘅新代名詞。
5. 又有文化研究專家提出，「扑嘢」一詞源自舞場嘅公關小姐（俗稱「舞小姐」），話說因為啲公關小姐同客出完街之後想蛇一蛇，多數會約埋幾個姊妹打返幾圈，有次當個舞場經理打電話嚟要佢返公司接下一個客嘅時候，聽到電話中打蔴雀嘅扑扑聲，個小姐就作嘢話自己喺度「扑緊嘢」，嚟誤導個經理係做愛時碰撞到嘢嘅聲響，等佢以為個小姐重接緊客唔得閒，咁呢個小姐就可以乘機偷吓懶；久而久之，「扑嘢」就成為咗舞場行內術語，之後重流入坊間成為流行用語。

其實以上呢啲講法都有待查証，不過現今大家已經潛移默化咁將「扑嘢」直接代表成做愛就已經係無可否定。

用法

現今啲人都好普遍咁用「扑」或者「扑嘢」嚟代替「屌屄」，雖然聽落去冇粗口字咁礙耳，但因為佢只係「屌」嘅替身，係冇咁粗俗，但就絕對唔係溫和嘅版本嚟，所以仍然帶有唔尊重嘅意味，對著老婆或者親密女朋友時千祈咪亂咁用。以下舉出其中幾種用法：

1. 尋晚扑咗條弗得妹，嘩幾鬼正呀！
2. 2006年世界盃嗰陣呀，聽講朗拿甸奴晚晚走去扑嘢，搞到落場踢波腳仔軟，卒之咪俾法國踢埋出局囉！

引申及創作

就個「扑」字嘅另類意思，引申出一啲相關嘅詞語。

• 「扑濕妳」：性交嘅過程入面要搞到妳個陰道係咁分泌！
• 「扑鑊甘」：好激烈咁性交、性交咗好多次。

其實粗俗字詞除咗引申出另外一啲詞語之外，亦引發咗好多嘅另類創意：

借喻

夜總會嘅公關小姐，而家有人將佢哋分成「金魚」同埋「木魚」；呢兩種分別在於：

• 「金魚」，屬於觀賞魚，係唔可以用嚟「食」嘅。於是被借喻形容嗰啲剩係陪坐陪飲酒，但係就唔會陪人客共渡春宵嘅公關小姐。
• 「木魚」，空心用木造嘅小圓鼓，有支用嚟敲打嘅圓頭鎚仔，係佛門出家人唸經嘅法器之一。但係呢度就被借喻嗰啲陪坐之餘亦陪人客開房渡春宵嘅公關小姐，話「可以扑得」咁解。

改篇

雖然話「扑」字喺另類意識上屬於粗俗嘅字句，但係都過到香港嘅電檢處審查，出現喺2B級電影裏頭。喺一齣叫做《賭俠大戰拉斯維加斯》嘅香港電影入面，其中一幕講述女主角應承會喺夜晚獻身畀飾演壞蛋大老千嘅萬梓良，等女主角一行開，萬梓良即刻好興奮咁大聲唱：「今晚扑嘢夜唔夜～」。

呢句歌詞係來自一首英文舊歌嘅第一句主旋律，改篇自1961年Bobby Vee 主唱嘅作品《I Love You More Than I Can Say》，而香港嘅演員兼歌手許冠英都有隻改篇自同樣來源嘅歌，叫做《蝦妹共你》。

睇埋

• 粗口