灣鱷

How to read a taxobox 灣鱷
香港濕地公園所養嘅灣鱷貝貝
瀕危指標
Least concern (LR/lc)
物種分類
界 動物界 門 脊索動物門 綱 爬蟲類 目 鱷目 科 鱷科 亞科 真鱷亞科 屬 Crocodylus 種 C. porosus
二元學名
Crocodylus porosus （Schneider，1801年）
綠色部份係灣鱷現時嘅全球分佈

灣鱷

灣鱷，又叫做鹹水鱷（Saltwater Crocodile）、入江鱷、河口鱷（Estuarine Crocodile），係 23 種鱷魚品種入面最大隻嘅，亦都係家下世界上最大嘅爬蟲類。由於佢係鱷目中唯一頸背無大鱗片嘅鱷魚，所以亦叫做裸頭鱷。鱷魚公大隻之後可以有 7 米長，但一般唔會超過5米。鱷魚乸最大體長差唔多 2.5 到 3 米到。成年體重可以有 100 到 200 千克。細個嗰陣係淡啡色，身同尾有黑色斑點條紋。大過之後顏色會比較深，腹部淡黃色或者係白色，條尾下面最尾嘅部份係灰色。世界紀錄到最大嘅灣鱷有 10 米長。

分佈同生境

灣鱷係熱帶同亞熱帶嘅物種。原產泰國、馬來西亞等東南亞地區、印度、南中國海一帶亦都有發現，主要分佈喺澳洲、巴布亞新畿內亞。灣鱷適應力非常頑強，可以住喺唔同嘅濕地，例如河口、紅樹林、沼澤、海岸等鹹淡水區域。

嶺南好耐以前都有灣鱷，主要分佈喺沿海同潮汐帶。唐代韓愈喺潮州所作嘅《祭鱷魚文》提到的正是灣鱷。至少喺一世紀前灣鱷仲有喺華南一帶出沒。據《巡海記》載，李准試過喺1907年跟著「伏波」、「琛航」兩艘軍艦由海南島駛去西沙群島一帶視察，描述咗旅程中仲有灣鱷爬到上去艦邊嘅經過，鱷魚最後係被擊退咗。

而喺香港發現嘅骨骼（現存德國柏林大學博物館內）展示佢哋舊時曾經響度出沒，可能喺紅樹林棲息；但噉亦會令人聯想到，呢啲大型爬行類動物或者亦住響香港其他嘅低地河流。

習性

灣鱷屬於兇猛嘅大型鱷魚，有好強嘅地盤意識，同時擁有適應高鹽度水質嘅生理結構。灣鱷位處濕地食物鏈嘅最高層次，有啲地區嘅灣鱷甚至比老虎重得人驚。小灣鱷主要係食昆蟲、兩棲類、甲殼類、細小嘅爬蟲類、魚類，成年灣鱷會捕食體形更大嘅動物，但主要係食泥蟹、龜、巨蜥、水鳥，部分體形更大嘅成年灣鱷甚至會捉水牛、牲畜、野豬、馬騮嚟食。喺澳洲，灣鱷更加有食人，甚至反艇嘅記錄，所以佢哋又叫做「食人鱷」。

交配季節喺 5 至 6 月之間，因應地區而定：泰國品種喺 7 至 8 月生蛋，爪哇品種甚至可以喺2月見到鱷魚蛋。鱷魚公用個身壓喺鱷魚乸背上，前肢捉實鱷魚乸唔放，用尾繞住鱷魚乸後面，進行交配，持續幾個鐘。灣鱷利用爛草整個巢，每次生 20 至 90 隻蛋。經過 75日（爪哇品種）至 96 日（斯里蘭卡品種）就可以孵出幼鱷。

歷史文化

中國古代嘅灣鱷分佈記錄：海南島附近嘅《巡海記》。話說李准曾經喺1907年坐「伏波」、「琛航」兩艘軍艦從海南島駛去西沙群島一帶視察。佢響《巡海記》入面描述過曾經有灣鱷爬上艦邊，鱷魚最後被做底。

之後，Lesson（1801年），Boukenger（1889年）同 Gadow（1901年）都先後發現灣鱷喺中國南方出現，但係並無具體地點同可供查證嘅實物標本。而喺香港發現嘅兩具骨骼顯示灣鱷舊時曾經喺華南地區出沒，大概住喺紅樹林（好似山貝河嗰種）。

種群動態同保護

世界上有唔少動物園同鱷魚農場都有養灣鱷，尤其係泰國同澳洲。有「鱷魚先生」之稱嘅利弗亦係以捉灣鱷作為綽頭。

喺香港，而家只有香港濕地公園、嘉道理農場暨植物園有養灣鱷，舊時荔園動物園亦都有公開嘅灣鱷展覽。

資料來源

• 《中國動物志：爬行綱》
• 《兩生爬行類圖鑑》ISBN 957-469-519-0
• 《香港生態情報》ISBN 962-04-2386-0
• 《中國重點野生動物研究叢書：揚子鱷研究》
• 《中國動物誌記要》（Beitrage zur Fanua Sinica）

睇埋

• 鱷魚
• 貝貝