燮和堂(英文:Sit Wo Tong),全名燮和堂五寶散藥廠(英文:Sit Wo Tong Ng Po Powder Factory),係香港一間中成藥藥廠,主要係賣「五寶散」同「五寶丸」。
燮和堂喺大清光緒七年(1881年)喺廣州開業,嗰時經已開始賣「五寶散」。隨住中共奪權,廣州燮和堂畀政府沒收搞公私合營,併咗入陳李濟,燮和堂喺1972年喺香港復業,除咗「五寶散」外,重研製出藥丸形嘅「五寶丸」,曾經大賣廣告:「腸胃不適,痾嘔肚痛,食夑和堂五寶散五寶丸啦!五寶散功效快,五寶丸容易食。全部香港製造。夑和堂出品。」。
「五寶散」同「五寶丸」據講嚟自佛門秘方,成份包括白芍、玉桂、甘草、樟木子同丁香,主治肚痾、嘔、肚痛同腸胃唔舒服。