閃電

  想搵颱風嘅話，請睇颱風閃電。

  「雷電」跳轉到呢度。想搵其它同名或近似嘅事物，請睇「雷電 (搞清楚)」。

幾條閃電

行雷天時嘅閃電光

閃電（粵拼：sim2 din6），廣府話舊時叫霅爧（讀「攝嶺」，sip3 leng5），係大氣嘅電荷就放出來嘅自然現象，通常係暴風雨時見到，亦會響火山爆發或者沙塵風暴度出現。大氣放電會好高溫，落到地可以將沙石變玻璃，天空亦會熱到有閃光。

一般情況下，行雷天氣時先睇到閃電發光，再聽到行雷。

發現史

喺發現雷電原理之前，古代中國嗰邊因民眾成日迷信，以為天上有雷公、電母之神，重用咗「雷劈孽種」嘅古仔嚟警告啲唔聽話嘅人。

直到1752年6月10號，美國科學家班哲文富蘭克林喺荷蘭利登嘅一個油庫入面，由於嗰日行雷，佢冒住生命危險將隻帶鐵絲尖嘅絲綢紙鷂放咗上天，結果引咗雷落地面，從而解開咗千百年嚟嘅雷電之謎。原嚟天上嘅雷電同平時嘅摩擦出靜電係同一件事。

原理

閃電嘅慢鏡演示

喺夏天比較熱嘅中午或挨晚，由於地面嘅熱空氣帶住大量水汽唔停噉升到上天，形成好大嚿積雨雲。由於積雨雲好多部位聚集咗正負兩種電荷，嗰時地面因受到近地面積雨雲入面嘅電荷感應，都帶咗同雲底唔一樣嘅電荷。雖然唔同電荷會相互吸引，但空氣嘅導電性能比較差，佢阻住正負兩種電荷嘅匯合，從而導致雲層入面嘅電荷積得越多時，達到一定強度之後，會撞穿阻住正負兩種電荷嘅匯合嘅空氣，夾硬整出條比較窄嘅通道而匯合。由於雲入面嘅電流好犀利，所以通道入面啲空氣燒到熱辣辣噉，溫度重高過太陽成幾倍，所以會出好劖眼嘅白光而形成閃電。而雷聲係因為通道入面啲空氣同雲滴遇到熱而突然漲大，從而爆出好大嘅「隆lung4」（國際音標似[bœ̃ːm]音）聲。

雷暴天時發出嘅雷聲

而雷電同閃電之所以係同一事物，係因為兩者喺雲層係同時發出，但閃電係光，雷電係聲，由於光速快過音速，所以行雷天氣時，先睇到閃電發光，再聽到行雷。

利與弊

閃電識得擗到地面

弊

閃電識得擗落地面，重可以將成間屋拆咗或引致山林大火、甚至殺人、劏家禽同埋牲畜、整冧電力設施或電力線路造成大面積停電、飛行事故，整爆電氣裝置都得。

利

喺仲夏嘅雷雨天時，好多時都有雨落，可以畀農作物提供足夠嘅水份；重可以将大氣出現嘅灰塵同煙霧刷到一乾二淨；甚至可以將空氣嘅N₂同O₂直接化合，從而形成NO，最後通過空氣嘅O₂而繼續形成NO₂，隨住雨水滲入泥土，從而變成硝酸鹽。硝酸鹽可以做肥料。

種類

閃電喺形狀可以分成5種；危害角度可以分成3種；帶電性質可以分成2種；生、機理可以分成3種等其它分類……

按形狀分

線形閃電（枝形閃電）

佢係閃電系列當中，最常見嘅品種。一般出一條好曲嘅折線，行到半佬開始有分支，而且條線越嚟越幼，行到有避雷針或地面之後，出現一條快速兼突進嘅閃爍白光。

帶狀閃電

• 火箭形閃電
• 球形閃電
• 連珠形閃電
• 片形閃電

按危害角度嚟分

直擊雷

直擊雷一般喺雲層入面放電，可以直接劈入或劈冧建築。佢可以細分成雲閃同地閃，其中雲閃得晴天霹靂一種，而地閃有上行雷同下行雷兩種。

感應雷

感應雷係先通過靜電感應，再通過電磁感應而放電，佢識得破壞室內嘅電器設備。

球形雷

球形雷通常行蹤好古怪且威力好犀利，佢既識得鑽窿鑽罅，又識得鑽入電器設備後發生爆炸，令設備損壞。但得好少機會發生。

按帶電性質嚟分

正閃電

負閃電

按生、機理嚟分

熱雷

界雷

低氣壓性雷

其它分類

• 黑閃電
• 乾閃電
• 超級閃電
• 聖艾爾摩之火
• 雷電波侵入
• 雷擊電磁波

俗語

喺廣東嘅廣州、佛山同中山地區，有句「東風雨怕西風，西風雨怕雷公」同埋「雷公先唱歌，有雨落唔多。」、「先雷後雨唔濕鞋，先雨後雷水浸街。」嘅俗語嚟形容行雷天氣。

有關嘅書

• 中国少年儿童百科全书 自然·环境 第153、161～162页　浙江教育出版社 ISBN 7-5338-1946-2/G·1942
• 雷电学原理 第1～18页　气象出版社 ISBN 978-7-5029-3675-4

出面網頁

• 雷电原理 百度文库
• The Science of Thunder NLSI