羅馬書

出自維基百科,自由嘅百科全書

羅馬書》(古希臘文Προς Ρωμαίους;又譯《羅馬人書》,全稱《保羅達羅馬人書》,簡稱《》,天主教全稱聖保祿宗徒致羅馬人書),係由使徒保羅寫畀當時喺羅馬教會嘅一封信。內容集合佢對基督教信仰,尤其喺救恩等問題嘅獨特見解,對後世嘅基督教神學研究有一定影響。

簡介[編輯]

作者:保羅
日期:57年春天
地點:哥林多
收信人:喺羅馬嘅信徒

保羅寫羅馬書係為計劃訪問羅馬教會嘅事做準備。保羅嘅計劃係先喺羅馬信徒中工作一段時期,然後等佢哋幫助繼續前往西班牙。佢解釋對基督教信仰嘅了解,同呢個信仰應該點樣喺信徒生活裏面實踐。呢卷係保羅對佢傳嘅信息解釋得最詳盡嘅一封信。

保羅首先問候羅馬教會嘅信徒,話畀佢哋知佢成日為佢哋祈禱。佢指出呢封信嘅重點係講明:因為福音顯示上帝稱人為義嘅道路,呢條路係由信心開始而且用信心結束。

保羅進一步發揮呢個主題,無論係猶太人定係外邦人,都一定要稱義。世上嘅人都處喺罪嘅權勢下,只有相信耶穌基督先可以稱義。跟住,保羅描寫人同上帝有呢種關係之後將獲得與基督結連嘅新生命。信嘅人得稱為義,上帝嘅靈使佢從罪同死嘅權勢得到釋放。喺第五至第八章保羅亦討論上帝律法嘅目的,同上帝嘅靈喺信徒生命裏面嘅功效。然後保羅討論猶太人同外邦人喺上帝對人類嘅計劃中所扮演嘅角色。佢嘅結論係:猶太人拒絕耶穌係上帝計劃嘅一部分,上帝要透過耶穌使全人類得到佢嘅恩典。保羅相信猶太人唔係永遠拒絕耶穌。最後佢討論基督徒應有嘅生活態度,特別強調要用愛心同人相處。佢亦提到基督徒事奉上帝,對國家同其他人嘅責任,同良心嘅問題。最後佢以個人問候同頌讚上帝嘅話結束呢封信。

提要[編輯]

  1. 序要同題旨(1章1-17節)
  2. 人需要拯救(1章18節-3章20節)
  3. 上帝拯救之道(3章21節-4章25節)
  4. 喺基徒裏面嘅新生命(5章1節-8章39節)
  5. 上帝計劃中嘅以色列人(9章1節-11章36節)
  6. 基督徒嘅行為(12章1節-15章13節)
  7. 結語同問候(15章14節-16章27節)