錫伯族

出自維基百科,自由嘅百科全書
跳去: 定向搵嘢
錫伯族
ᠰᡞᠪᡝSibe.png
Lansdell-1885-p211-Sibo-military-colonists.jpg
開荒嘅錫伯軍人,1882年亨利·蘭斯斗(Henry Lansdell )嘅畫
總人口
188824人(2000年)[1]
分布地區
中華人民共和國 中華人民共和國新疆伊犁察布查爾遼寧吉林
語言

錫伯文中文錫伯語中文

宗教信仰

藏傳佛教薩滿教多神信仰[2]

相關種族

滿族鮮卑赫哲族柯洛人鄂溫克族

錫伯族粵讀sek3 baak3 zuk6錫伯文Sibe.png穆麟德Sibe;中國標準羅馬字:Xibe,字母代碼:XB,數字代碼:38[3])係中國少數民族,人口18.8萬(2000年)[1],喺中華人民共和國政府認證嘅56個民族中排第31大,而家分居中國東北新疆兩地。

錫伯人本來係住喺滿洲通古斯民族,後來滿族統一曬啲滿洲部族,建立後金,錫伯人編咗入八旗。之後後金建立清朝,18世紀中葉時錫伯軍人分派去中國西北,於是形成而家喺兩地嘅分佈。錫伯人講錫伯話,寫嘅錫伯文改良自滿文。錫伯話同滿洲話好接近,基本相通,係珍貴嘅滿洲語言遺存,不過由於民族區分,錫伯話有自己嘅ISO碼,唔睇成滿文嘅方言[4]。而家錫伯話有三萬人到講(2000年),有錫伯話嘅新聞、廣播等媒體,亦有小學敎錫伯文,不過而家錫伯話有承傳壓力,狀況評級屬於受威脅(Threatened)[4]

族源[編輯]

關於錫伯族嘅來源,有人認爲佢哋係女真人後裔,係東海女真嘅支族,叫錫伯部。另外重有一種學說認為佢哋源自鮮卑。呢種學說話,「錫伯」係「鮮卑」嘅轉音,由Simbei轉變成Sibe(或者Sibo),之後進一步論證出西伯利亞個名其實係「鮮卑利亞」[5]。而歷史上鮮卑屬東胡,興於鮮卑山(大興安嶺),後來南下,喺遼東中原前燕北魏,後經孝文漢化逐漸變成唐人。而佢哋當年可能留咗啲部族駐守祖地(大興安嶺北部嘅祖廟嘎仙洞),後來演變爲錫伯族。不過呢種學說因為無文獻佐證,無咁易證實。

[編輯]

錫伯人原本係漁獵、遊牧民族,所以同滿族一樣有騎射傳統。明朝中後期,錫伯人由興安嶺搬到嫩江松花江流域,歸蒙古科爾沁部管轄。行出大興安嶺後,佢哋開始耕田,出產當時好有名嘅錫伯米[6]

1593年努爾哈赤征服科爾沁部,錫伯人跟住科爾沁臣服佢,編入咗蒙古八旗[7]。之後清兵入關,大量八旗兵丁南下關內,於是東北防務空虛。1692年,康熙爲咗東北防務,將錫伯壯丁從蒙古八旗度抽出做高級兵士,叫做「披甲」,編入滿洲八旗,於是錫伯人分屬兩邊嘅八旗。呢班披甲分駐而家黑龍江齊齊哈爾吉林省扶餘縣同埋吉林市呢三處[7]。幾年之後整頓八旗,有啲錫伯人分咗去遼寧、北京、山東德州呢啲地方。雖然分散各地,但係總體上依然分佈喺東北,其中集中喺遼寧[7]

18世紀中葉,平咗準噶爾亂大小和卓之亂之後,統一咗天山南北。但因爲戰亂,伊犁地方人口減少、軍防空虛,呢陣時沙俄又想滲透新疆,於是1762年開始調兵過去駐守,不過未夠,於是1764年將錫伯官兵、軍屬一齊西遷戌邊,於是今日錫伯族人分居東北同新疆兩處。目前新疆嘅察布查爾錫伯自治縣係唯一嘅錫伯自治地方。

當時嘅皇帝係乾隆,之所以揀錫伯人去新疆,就在於錫伯人有騎射傳統,同時又識耕田,軍事、經濟都有好處。派去戌邊嘅錫伯人都係當時駐守盛京(而家瀋陽)及週邊嘅官兵,按照文獻,佢哋係1764年農曆四月出發嘅,有一千個兵丁、20個官、3275個家眷,夾埋有4295人[8]。但實際更多人,因爲有啲親屬唔想分離,明明無佢份都跟埋去,呢部份有405人[9]。另外啲兵丁都係後生仔,發伍前嗱嗱聲結埋婚,費事過咗去無同族女人;呢支隊行咗成年先到伊犁,行軍過程中生咗350幾個臊蝦[9],到1765年7月抵達伊犁、清點人數去編牛錄時,發覺有軍民5050人[10]

後來闖關東嘅移民潮,令東北地方變成漢地,東北嘅錫伯人都漢化曬,滿洲話亦都變成瀕危語言,但新疆嘅錫伯人反而保留咗錫伯話,而錫伯話同滿文好似,成為滿洲語言爲數唔多嘅遺存。

參考資料[編輯]

  • 《對有滅絕危機嘅阿爾泰語言嘅實地調查》(絶滅危機의 알타이言語 現地調查/절멸 위기의 알타이언어 현지 조사),韓國阿爾泰學會(韓國알타이學會/한국알타이학회),2006年

[編輯]

  1. 1.0 1.1 錫伯族概況. 《民族問題五種叢書》之《中國少數民族》卷. 中華人民共和國國家民族事務委員會. . 喺2015年4月10號搵到;. 
  2. The Xibe ethnic minority. 人民網. . 喺2015年4月10號搵到; (英文). 
  3. 中國各民族名稱的羅馬字母拼寫法和代碼. 中國社會科學院民族研究所. 1992年4月1號. 喺2015年4月6號搵到;. 
  4. 4.0 4.1 Xibe. 民族語(Ethnologue). . 喺2015年4月10號搵到;. 
  5. 包爾罕、馮家升:《西伯利亞名稱的由來》(《錫伯族文學歷史論文集》,新疆社會科學院民研所,1981年)
  6. 錫伯族風俗習慣. 《民族問題五種叢書》之《中國少數民族》卷. 中華人民共和國國家民族事務委員會. . 喺2015年4月10號搵到;. 
  7. 7.0 7.1 7.2 吳元豐. 清政府對錫伯族的統治政策. 《錫伯族研究文集》. 新疆錫伯語言學會. . 喺2015年4月10號搵到;. 
  8. 錫伯族和滿族什麼關係. 知乎. . 喺2015年4月10號搵到;. 
  9. 9.0 9.1 錫伯族歷史沿革. 《民族問題五種叢書》之《中國少數民族》卷. 中華人民共和國國家民族事務委員會. . 喺2015年4月10號搵到;. 
  10. 從白山黑水到伊犁河畔的萬里西遷. 大西遷─錫伯文化主題網站. . 喺2015年4月10號搵到;. 

連出[編輯]