聖誕頌歌 (小說)
| |
| 作者 | 查理斯·狄更斯 |
|---|---|
| 原著書名 | A Christmas Carol. In Prose. Being a Ghost Story of Christmas.（直譯：一首散文式嘅聖誕頌歌，聖誕鬼故） |
| 插圖 | 莊·李奇 |
| 出版 | Chapman & Hall |
| 出版地 | 英格蘭 |
《聖誕頌歌》（英文：A Christmas Carol，字面上係一首聖誕頌歌噉解），台灣有譯做《聖誕鬼異》，內地有譯做《小氣財神》，係由英倫作家狄更斯寫嘅一本中篇小說，首次出版於一八四三年十二月十七號[1]，莊·李奇負責畫插圖。個故仔以聖誕做主題，講一個孤寒財主史高治喺聖誕前夕嘅奇幻經歷：佢唯一嘅事業夥伴馬利嘅鬼魂突然出現，預告畀佢知會有三隻幽靈嚟搵佢；其後三隻幽靈分別帶史高治睇自己嘅過去、現在同將來；喺幽靈嘅引領下，史高治明白聖誕節嘅真諦，以後學識要感恩，理解「施比受更有福」嘅道理。
《聖誕頌歌》被指係反映咗當時英倫社會嘅狀況：當時英國人喺度探索同重新評估聖誕節傳統，包括係好似聖誕頌歌等嘅舊有習俗，以及係聖誕咭同聖誕樹呢啲（當時嚟講）新興嘅習俗；狄更斯後生嗰陣睇過唔少講聖誕嘅故事，及後佢參觀過街頭兒童學校，就受到啟發，寫咗《聖誕頌歌》呢本小說嚟講社會應該點樣對待窮人。
《聖誕頌歌》第一版出，正值聖誕前夕。本書一出就廣受好評而且好好賣，到咗一八四四年尾已經一共出咗十三版咁多，甚至仲吸引咗人非法偷印。到咗一八四九年，狄更斯開始公開閱讀個故仔，取得重大成功，一路到咗佢去世嗰年（一八七〇年）都仲有人請佢做呢樣嘢。就算到咗廿一世紀初，呢本書都仲係好受歡迎，譯咗做各種語文，亦有改編做劇集、電影、歌劇同舞台劇等唔同媒體嘅作品。
中文譯版
[編輯]截至 2024 年為止，《聖誕頌歌》仲未有官方嘅粵文譯本，不過中文書面語譯本就大把。
《聖誕頌歌》早喺廿世紀初期就有中文譯本：喺一九一四年，竟生已經整咗個叫《慳人夢》嘅譯本仲刊登埋。跟住嗰年，孫毓修嘅譯本《耶穌誕日賦》刊登喺《小說月報》嗰度；一九一九年，聞野鶴嘅《鬼史》譯本由上海嘅東阜兄弟圖書館出版；同年，蘇梅節嘅譯本《客來及特之耶蘇聖誕節》刊登咗喺《北京女子高等師範文藝會刊》嗰度。一九五八年，泰來整咗個譯本叫《聖誕鬼異》喺台灣由全民出版社出版[2]。
|
主要人物
[編輯]| 人物 | 原文名 | 備註 |
| 艾比尼澤·史高治 | Ebenezer Scrooge | 主角，孤寒財主一名 |
| 阿芬 | Fan | 史高治個妹 |
| 弗雷德 | Fred | 阿芬嘅仔，史高治嘅侄仔 |
| 雅各·馬利 | Jacob Marley | 生意人，史高治唯一嘅朋友 |
| 阿鮑·卡拉池 | Bob Cratchit | 史高治個伙記，家境貧困，成日畀史高治刻薄。 |
| 添仔 | Tiny Tim | 阿鮑個細仔，天生有病所以生得好細粒。 |
| 費立維先生 | Mr. Nigel Fezziwig | 史高治嘅前僱主，佢同佢老婆對自己嘅員工好慷慨。 |
| 貝爾 | Belle | 史高治個前未婚妻，因為唔鍾意史高治嘅性格而同咗第二個男人結婚。 |
| 代表過去嘅聖誕靈 | The Spirit of Christmas Past | 聖誕三靈之一 |
| 代表現在嘅聖誕靈 | The Spirit of Christmas Present | 聖誕三靈之二 |
| 代表未來嘅聖誕靈 | The Spirit of Christmas Future | 聖誕三靈之三（死神） |
故事大綱
[編輯]《聖誕頌歌》嘅情節大致如下。本書分做五大章節，每個章節叫「一行五線譜」（Stave） ——講到好似本小說係一首歌噉。
第一行
[編輯]
- Title：馬利嘅鬼魂（Marley's Ghost）
「馬利已經過咗身，千真萬確過咗身。史高治知道馬利過身未呀？當然知！咁多年嚟史高治係馬利唯一嘅事業夥伴、唯一嘅管理人、唯一嘅繼承人、唯一嘅朋友、亦係唯一一個會哀悼馬利嘅人。史高治係好傷心，但就連喪禮嗰日都不改商人本色，喺度講價，想慳喪葬費。」
《聖誕頌歌》故事一開頭，係倫敦一個凍冰冰嘅平安夜。主角艾比尼澤·史高治係一個年老財主，正喺度同佢嗰位工作過勞嘅店員
- 「如果佢哋寧願去死，噉就最好去死咗佢啦，順便仲可以解決埋人口過剩嘅問題。」
就快收工嗰陣，阿鮑求史高治畀佢放一日聖誕假，史高治刁難咗阿鮑一輪之後，心不甘情不願噉答應阿鮑嘅請求，跟住就叫阿鮑聖誕翌日要提早返工嚟補償。
- 「聖誕節有咩咁好？好到連生意都唔做？」
史高治放咗工就返屋企。佢屋企好簡陋——佢住嗰棟建築物，屬於佢嗰位過咗身嘅生意夥伴雅各·馬利，孤寒成性嘅史高治將大部份嘅房租咗出去畀人住，淨低一間細房仔自己住，四埲牆又黑又凍。史高治一返到就鎖起道門，換上睡衣點著個火爐（但係佢唔肯使錢，唔捨得加多幾嚿煤炭），坐喺火前面食粥。食食吓佢就嚇咗一大跳：佢見到過咗身七年咁耐嘅馬利，穿過道門入咗嚟，馬利全身都畀鎖鍊纏住，鎖鍊上綁住咗啲帳簿、房地契同錢袋——馬利話佢自己一世人又自私又貪錢，搞到而家受罰要喺無止盡嘅悔恨當中行走，佢生前最愛嘅錢財成為咗佢死後永恆嘅負擔。
- 「史高治呀，我嚟探你，就係唔想你死咗之後好似我噉。跟住落嚟嗰三晚，會有三隻鬼嚟探你。」
講完，馬利就消失咗。
第二行
[編輯]
- Title：聖誕三靈之一（The First of the Three Spirits）
史高治喺午夜扎醒咗，醒返起馬利話會有鬼魂嚟搵佢，就戰戰兢兢噉等待佢嘅靈異訪客。
到咗半夜一點鐘，史高治張床邊出現咗一個怪異嘅靈體。隻靈體望落似個細路，但係有一股智慧同世故嘅氣息。佢自稱係代表過去嘅聖誕靈，佢一手掂史高治個心口，人同鬼就一齊飛咗上天。聖誕靈帶住史高治飛返去佢童年住嘅地方：史高治見到佢細個嗰間學校，仲有佢細個嗰時嘅朋友。睇睇吓，史高治開始喊。聖誕靈帶住喊緊嘅史高治去到一間學校。喺嗰度，有一個好寂寞嘅男仔，年年都孤獨噉一個人過聖誕節。原來嗰個男仔就係細個嘅史高治。史高治同聖誕靈一路睇住個男仔長大，有一日男仔嘅細妹
- 「阿爸終於畀你返屋企喇！我係嚟帶你走㗎！」
史高治原來好細個就被送咗去寄宿學校，年年都要自己過聖誕，佢當時見到阿芬好開心。不過，阿芬喺好多年前就過咗身，而弗雷德就係阿芬個仔。
聖誕靈帶史高治去睇及後嘅聖誕：史高治仲記得有次聖誕，佢個未婚妻
- 「史高治？佢而家一支公，好孤獨噉囉。」
史高治一路喺度睇，一路就開始情緒激動，開口求聖誕靈帶佢返屋企。佢一返到就即刻瞓著咗。
第三行
[編輯]
- Title：聖誕三靈之二（The Second of the Three Spirits）
教堂鐘聲響起，嚇醒咗瞓到打晒鼻鼾嘅史高治。史高治慶幸自己醒咗，準備迎接第二隻聖誕靈。史高治等咗大約十五分鐘，就見到有一道光照落佢身。有啲迷惘嘅史高治向住光源行入隔離房，就見到第二隻聖誕靈等緊佢。呢隻聖誕靈望落似一個著住綠色袍嘅巨人，坐喺一張由美食砌成嘅王座上。佢好大聲噉自我介紹，話自己係代表現在嘅聖誕靈，而佢只係得一日命。聖誕靈叫史高治摸摸佢件袍，史高治一摸，啲美食同間房就即刻消失，下一刻佢哋兩個已經身處聖誕朝早嘅街頭。
路人正喺度享受由舖頭傳出嚟嘅香味。佢哋開開心心噉掃雪，有啲拎住禮物袋，彼此打招呼講「聖誕快樂」。聖誕靈帶住史高治去阿鮑（史高治嗰個員工）嘅屋企，見到阿鮑老婆同佢啲仔女喺度準備焗鵝嚟慶祝聖誕，又喺度食啲慳儉嘅平價零食。大女
聖誕靈跟住帶史高治去睇其他人嘅聖誕聚會，見到一班礦工喺山旮旯地方慶祝，又有人喺船上面搞聖誕
冇幾耐，午夜十二點嘅鐘聲響起，代表現在嘅聖誕靈就消失咗。取而代之嘅，係一隻披住斗篷嘅幽靈。
第四行
[編輯]
- Title：最後嘅聖誕靈（The Last of the Three Spirits）
隻幽靈形象係著住黑色長袍嘅身影，望落有啲得人驚。史高治見到佢，不由自主噉跪低咗。史高治開口問：
- 「你係咪代表未來嘅聖誕靈？」
隻幽靈粒聲唔出，史高治懇求幽靈分享佢嘅教訓，唔想落得好似馬利噉嘅下場。幽靈跟住落嚟就畀史高治睇幾個場景。史高治跟幽靈去到倫敦證券交易所，聽到有班商人喺度討論某某有錢人嘅死訊。
- 「佢嘅喪禮？如果佢哋請出席者食午餐嘅話，我就會去。」
然後史高治同幽靈去到倫敦貧民窟嘅一間污糟當舖，見到一班流浪漢同可疑人物，佢哋喺度買賣由某個死咗嘅財主度偷返嚟嘅財物。隨後，史高治又去到一個窮人家庭嘅屋企，屋企嘅兩公婆好似如釋重負噉嘅款，
- 「我哋跟住變成爭邊個錢，我唔知，不過刻薄過佢嘅人就應該好難搵，今晚可以安心瞓覺喇。」
最後，幽靈又帶史高治去見阿鮑同阿鮑老婆，阿鮑一家因為添仔死咗而好傷心。睇下睇下，史高治開始緊張：
- 「死咗嗰個財主... 係邊個？」
幽靈依然唔出聲，只係帶住史高治去墳場，佢哋見到個啱啱樹立咗冇耐嘅墓碑，上面寫咗個名：艾比尼澤·史高治。史高治即刻驚恐萬分，佢捉實幽靈，求佢將呢個惡夢景象變走，佢仲承諾自此之後會由尊重聖誕精神，按照過去、現在同未來三靈嘅教訓嚟生活。
幽靈聽到，就將史高治一變變走。然後史高治發現自己返咗屋企張床度。
第五行
[編輯]
- Title：終曲（The End of It）
第二朝，史高治醒返。聖誕日嘅朝頭早，史高治下定決心要改變自己嘅行為。佢即刻換衫衝落樓下，周圍去散播善意：
- 「我感覺自己好似羽毛咁輕，好似天使咁開心！」
佢命人送一隻大火雞去畀阿鮑一家，然後又去同佢侄仔弗雷德和好，去弗雷德屋企食聖誕大餐。聖誕節翌日，阿鮑一早嚟返工，見到史高治，史高治唔單只即場加阿鮑人工，仲表態話想幫添仔。及後佢仲扮演添仔教父噉嘅角色，幫添仔渡過難關。史高治身邊嘅人見到史高治轉晒死性噉，個個都好驚訝。
自此之後，史高治呢個曾經係刻薄守財奴嘅人，變得人見人愛，喺佢餘生當中都不斷周圍散播善意同慷慨。
改編作品
[編輯]
電影
[編輯]- A Christmas Carol（1908）係第一齣由聖誕頌歌改編嘅電影[3]
- 《米奇的快樂聖誕》（1983年）：迪士尼出品，由 Burny Mattinson 導演，Alan Young 同 Wayne Allwine主演嘅一部電視動畫特別節目。呢套嘢係米奇老鼠 1953 年最後一套電影短篇動畫。
- 《布偶聖誕頌》（1992年）
- 《聖誕頌歌》（1997年）
- 《聖誕發明家》（2017年）
- 《小氣財神史顧己：聖誕頌歌》（2022年）
其他
[編輯]- 《摩登原始人：聖誕禮讚》（1994年）
- 《聖誕歡歌》（1999年）
- 《聖誕頌歌》（2019年）
寫作背景
[編輯]有人話，《聖誕頌歌》嘅靈感來源係嚟自狄更斯自己嘅生平：查理斯·狄更斯出身中產家庭，但因為佢父親阿莊揮霍無度，令佢哋屋企陷入財政困境；喺一八二四年，阿莊因為爭人錢而畀人拉咗，關入倫敦南華克嘅馬歇爾西債務人監獄；當時得嗰十二歲咁細個嘅狄更斯被迫要典當佢啲藏書，輟學去一間又污漕又多老鼠嘅鞋油廠做嘢。有傳記作者話，呢個環境轉變令狄更斯佢產生咗「深刻嘅個人同社會憤怒」，大大影響咗佢嘅寫作同世界觀[8]。
狄更斯作《聖誕頌歌》嗰陣，已經取得咗一定嘅成功，但係同時又受到壓力：到咗一八四二年底，狄更斯已經係一位有返咁上下名氣嘅作家，出咗六部主要作品，仲有好幾個短篇故事、中篇小說同埋其他作品；同年十二月三十一號，佢開始以月刊連載嘅形式發表佢嘅小說《馬丁·朱索維特》，佢似乎好鍾意呢件作品，但係件作品嘅銷量令人失望，仲搞到佢遇上短暫嘅財政困難。
喺維多利亞時代嘅英倫，慶祝聖誕節嘅風氣越嚟越盛。聖誕樹係喺十八世紀引入英國嘅，其後經維多利亞女皇同亞厘畢親王推廣，就變得更加普及。喺十九世紀初，聖誕頌歌（一種以聖誕為主題嘅歌曲，可以追溯至古羅馬時代）嘅傳統經過一百年嘅沉寂之後，有幾位英倫作家同學者寫書嚟推廣，再次受到關注。
相關條目
[編輯]引用來源
[編輯]- ↑ "Charles Dickens - A Christmas Carol". University of Glasgow. 原著喺2013-04-25歸檔. 喺2013-04-22搵到. 根據英國格拉斯哥大學嘅館藏資料，初版日期應該係1843年12月17號
- ↑ 賴慈芸 (2016-11-13)。〈狄更斯在台灣：譯本源流〉。翻譯偵探事務所。原著喺2019-05-20歸檔。喺2019-04-20搵到。
{{cite web}}: Unknown parameter|dead-url=ignored (|url-status=suggested) (help) - ↑ "A Christmas Carol (1908)". IMDb. 喺2013-04-23搵到.
- ↑ "A Christmas Carol (2009)". IMDb. 喺2013-04-22搵到.
- ↑ "Singing the bah humbug away". Los Angeles Times (美國英文). 2004-11-26. ISSN 0458-3035. 原著喺2019-04-06歸檔. 喺2019-04-06搵到.
{{cite news}}: Unknown parameter|dead-url=ignored (|url-status=suggested) (help) - ↑ 〈奇幻聖誕夜(2009)〉。香港話劇團。原著喺2016-03-10歸檔。喺2013-04-22搵到。 香港話劇團嘅奇幻聖誕夜嘅英語原裝版本Scrooge係改編自聖誕頌歌
- ↑ 〈奇幻聖誕夜(2011)〉。香港話劇團。原著喺2013-05-14歸檔。喺2013-04-22搵到。 香港話劇團嘅奇幻聖誕夜嘅英語原裝版本Scrooge係改編自聖誕頌歌
- ↑ Ackroyd, Peter (1990). Dickens. London: Sinclair-Stevenson. p. 67-68.
出面網頁
[編輯]
- 聖誕頌歌嘅英文PDF檔案
- 英國格拉斯哥大學嘅聖誕頌歌初版館藏資料
- 魔幻聖誕頌(2009)電影預告片
- 香港話劇團奇幻聖誕夜(2011)宣傳片
- Scrooge，劍橋英文字典，喺廿一世紀初嘅英文，scrooge（本來係史高治個英文名）做名詞嗰陣，又可以解做孤寒鬼噉嘅意思。