丁屋
(由丁權跳轉過嚟)
丁屋，香港屋宇一種，出自新界小型屋宇政策（英文：New Territories Small House Policy），專畀新界原居民嘅男丁，有權起嚟自住嘅屋，喺香港殖民地時期已經有。未有起屋，但有權起嘅，叫丁權。
史
[編輯]丁屋並非英國租借新界一開始就有，亦非大清留落來嘅傳統權益。而係英國藉香港政府推出來嘅懷柔政策，介於六七暴動之後，香港前途談判之前。
二十世紀七十年代，香港政府大力收地，發展衛星城市（後稱新市鎮），新界原居民反對，同港府對抗，為冧掂呢班友，港府畀新界鄉下男性原居民特權，每人一生起一座三層高（上限27呎／8.22米高），每層面積唔超過700平方呎嘅丁屋，唔使畀地價。後來更發展到政府以地換地畀原居民起丁屋，同埋以「私人協約」方式用優惠價賣地畀原居民起丁屋，直至2018年郭卓堅向香港法院提請司法覆核，最終法院判決「以地換地」同「私人協約」並非「受《基本法》保障嘅傳統權益」，政府唔可以再咁批丁屋。
參考
[編輯]- 《認可鄉村名冊》，新界鄉議局
- 《建築物條例（新界適用）條例》（香港法例第121章）
- 《胡應湘倡丁權證券化 自由售賣發展權 增新界土地供應》，明報，2006年1月21日
- 《政府擬批建20層丁屋 沙田元朗試行 提供2000單位》，明報，2006年3月1日