三枝夕夏

三枝夕夏
女歌手
別名	AIKA（舊藝名） 隱岐有花（冠夫姓）
出世	菊池有花 (1980-06-09) 1980年6月9號 日本愛知縣名古屋市
職業	歌手 作曲家 填詞人 生意人
母校	金城學院中學校・高等學校 金城學院大學（中退）
代表作品	《君と約束した優しいあの場所まで》 《宛如橫渡七海的風》
活躍年代	1995 - 2010
唱片公司	Sony Records（1995 - 2001） GIZA studio（2002 - 2010）
經紀公司	Ading（2001年 - 2010年）
相關團體	三枝夕夏IN db 愛內里菜&三枝夕夏

三枝夕夏（日文：さえぐさ ゆうかSaegusa Yūka，英文：U-ka saegusa，1980年6月9號—），係日本女歌手、作曲家兼作詞人，出世名菊池有花（日文：日文：きくち ゆうか），樂隊三枝夕夏 IN db嘅前主唱。2010年宣佈引退，2014年開始做生意。

經歷

三枝夕夏係愛知縣名古屋市人，係屋企嘅獨生女。老豆係一名音樂指導，加上又受到阿媽嘅影響下（阿媽係美國男團海灘男孩嘅Fans），所以佢自細已經開始玩音樂。高中時期曾經係學校民歌部嘅成員之一。

為咗一圓自己嘅音樂夢，佢毅然決定由金城學院大學中途退學，去東京發展，希望可以做一位好勁同出名嘅歌手，2001年改以AIKA嘅名義活動。雖然由1995年開始已經加入娛樂圈做演員，但係涯咗幾年事業都一直發展得冇出色，所以佢返翻老家名古屋，希望讀返書。但係最後佢又放唔低自己嘅音樂夢，因此佢去大阪學唱歌。

2002年，一直發展平平嘅佢終於有轉機。21歲嘅佢，畀佢遇上一生人嘅「伯樂」長戶大幸。長戶先後介紹佢加入GIZA studio同埋Ading，仲幫佢組成單人樂隊「三枝夕夏 IN db」。同年佢以《Whenever I think of you》正式以歌手身份出道，改名叫「三枝夕夏」。

2003年，佢嘅一首歌「君と約束した優しいあの場所まで」響公信榜排行第八，開始出名。同時，「三枝夕夏 IN db」加入三位男成員，分別係岩井勇一郎（結他手）、大藪拓（低音結他手）同埋車谷啓介（鼓手）。自此之後，三板就好少出單人歌，多數以樂隊活動。

除咗做歌手之後，佢都有幫其他歌手作詞，因為佢作嘅詞好難唱但又好有意思，所以獲得好好嘅評價。

佢成日同名偵探柯南合作，幫名偵探柯南唱過唔少電視版片頭片尾曲，就好似《眠る君の横颜に微笑みを》、《云に乘って》。而同隊成員大藪拓仲成日同其他同柯南有關係嘅歌手合作。

2005年，獲選為愛知縣警察中警察署嘅「一日警察署長」，有好多Fans前嚟睇佢。2006年宣佈同老友兼同公司藝人愛內里菜組成愛內里菜&三枝夕夏，發表《100扇門》，成為名偵探柯南嘅電視版片尾曲之一。第二年又發表《宛如橫渡七海的風》，呢首歌同時係名偵探柯南第十一部劇場版紺碧之棺嘅主題曲。

2009年，佢話出嚟捱咗咁多年，好掛住屋企，係時候要返翻去。佢同隊員多次傾過之後，決定第二年解散樂隊。2010年1月，響搞完東京、名古屋同大阪嘅演唱會之後，「三枝夕夏 IN db」正式解散。同月月尾，三枝正式引退。

引退之後，佢返翻鄉下，開始對美容業有興趣。響修讀完專業學校之後，2014年用真名響名古屋開美容院「Neuf（日文：ヌフ）」，生產美容用品。2016年關門大吉之後，佢開始成日響鄉下唔少雜誌登場。依家同老公響名古屋開咗一間Cafe，另外仲專門研究搾果汁。響同老公結婚後，冠夫姓叫隱岐有花（日文：おき ゆうか），有兩個仔女。

除咗響2015年由hills パン工場搞嘅節目「hillsパン工場presents THURSDAY LIVE SPECIAL ROCK NIGHT～車谷な夜～」上面以藝人身份出過場之外，佢再都冇出現響公眾面前。