中天新聞台冇獲續牌事件
 |
中天新聞台冇得續牌事件，係指喺中天新聞台喺2020年11月續牌申請被拒之後所發生嘅一連串事件。
2020年11月18號，台灣國家通訊傳播委員會（NCC）以多次違規、內控機制失靈、持有人蔡衍明嚴重介入新聞製作，冇落實新聞專業同唔自律等多個理由，加上喺2014年續牌嗰時已經提出過有關問題，但中天新聞冇正視到，最終以7:0一致否決中天新聞台嘅續牌申請。[1][2]
事件背景
政治立場問題
中天新聞台嘅政治立場一向被視為親北京，而且自2018年起，更不遺餘力追捧當時嘅高雄市長，之後代表國民黨參選2020年中華民國總統選舉嘅韓國瑜。當時佢哋同韓國瑜有關嘅報道比例超過五成，係全台最高。佢哋甚至將天空出現「鳳凰展翅」雲朵同埋加拿大華裔女導演嘅《包子》奪奧斯卡最佳動畫短片，都歸功於韓國瑜。[2]
違規同埋內部調節機制失衡
NCC喺宣布決定嘅時候提到，中天新聞台自2014年起至決議日共違規25次，主要問題包括無做到事實查證、妨害公序良俗等，其中2次被警告、23次被罰款，合共1,153萬元新台幣（約313萬港元），數字係全台為最多；觀眾投訴個案由2017年嘅72宗暴增去到2019年嘅962宗，佔電視類投訴量嘅31.55%。另外，中天內部控制同埋自律機制失靈，對觀眾投訴問題未能自我修正，新聞部主管長期懸缺，內部訓練亦經常同新聞專業無關，蔡衍明甚至用唔同嘅方式（例如經由前新聞事業副總裁邱佳瑜）介入中天新聞台製播，違反中天自訂嘅「新聞自主公約」，而且中天新聞台申請續牌期間提出嘅改善承諾，都未能有效說明點樣排除股東嘅不當干預。[1][2]
正式宣布
NCC喺2019年11月18號，決定唔畀中天續牌，意味著中天電視台將會喺於12月11號後失去衛星廣播頻道執照，12月12號唔能夠喺有線電視播出。[1]
後續反應
呢個決定引起咗台灣社會好大嘅關注，另外國際社會亦都有少量聲音關注事件。[3]
台灣政府當局
總統府、行政院喺11月19號一致表示，尊重獨立機關依法做成嘅專業決定。總統府發言人張惇涵喺11月19號下晝表示，台灣係民主法治國家，依照衛星廣播電視法，電視頻道嘅執照每6年進行換照審查作業，並由獨立機關NCC依換照審查辦法進行審查，所有電視頻道無一例外。行政院秘書長兼發言人李孟諺就話，中天新聞台係因為無法通過NCC嘅獨立審查，NCC所有委員都係學者專家，亦通過立院嘅嚴格審查，行政院尊重NCC獨立行使職權所做嘅決定。[1][4]
台灣國家通訊傳播委員會
面對有人話呢個係政治決定，NCC主委陳耀祥就話事件無任何政治勢力介入，只係要話畀所有要買媒體嘅財團大老闆要尊重新聞專業自主，同新聞保持一定適當距離。[2]面對中華人民共和國國台辦嘅批評，副主委翁柏宗就強調，包括審查項目、評分基準都好明確，一切都係依法行政，並無審查電視台政治立場，反而不點名批評中國無新聞自由，「連申請都冇辦法」。[3]
中天電視
- 中天電視指控呢個係政治判決，話所有人都知道係蔡英文政府要中天收聲，又話會用唔同法律手段爭取員工嘅工作權同埋新聞自由。[2]
- 中天大股東蔡衍明形容，事件完全就係政治操弄。[5]
- 中天新聞台《文茜世界周報》節目主持人陳文茜就表示，同意中天唔夠自律，但反問其他電視台夠唔夠自律，又話從來無人可以關掉佢哋嘅節目，哪怕係總統。[5]佢又批評，蔡英文心中無言論自由價值。[6]
國民黨
喺總統大選期間得到中天電視台支持嘅韓國瑜，喺續牌決定公佈前，多次公開聲援中天。[7]去到正式公佈拒絕續牌結果嘅時候，以「七個小矮人摧毀台灣新聞自由」形容呢次事件。[5][8]
民主進步黨
民主進步黨發言人劉康彥話，新聞媒體具有公共性、公益性，對社會有高度滲透同埋強大嘅影響，由獨立審查機關對更換電視台執照進行嘅定期審查，喺民主政體係標準做法，唔涉及侵害新聞自由。劉康彥又批評國民黨假「新聞自由」嘅名義，謊稱民主國家都唔會撤照，係公然嘅魚目混珠，又提及前總統馬英九任內亦曾經將年代綜合台撤照，喺對事實公平有更嚴謹要求嘅英國，過去亦有廢撤新聞台執照嘅案例。佢又話，民進黨捍衛新聞同埋言論自由，呼籲國民黨停止政治操作，回歸理性討論，摒除自身政黨利益盤算，尊重NCC專業審查嘅決定。[4]
時代力量
時代力量前立委，參與「反旺中」運動八年嘅黃國昌喺社交媒體發表以「終於，向蔡衍明的中天告別了」嘅文章，表示感謝大家嘅之前努力同埋堅持，並重申媒體公器唔應該淪為大老闆嘅工具。[5]
無國界記者
無國界記者台灣分會表示，對受影響嘅中天新聞台員工深表遺憾，但唔認為NCC嘅決定有侵害新聞自由，審查中天新聞台執照符合正當性。[2][5][9]
其他台灣公眾人物
網絡紅人兼律師呂秋遠表示呢個決定對於好多家庭嚟講，係相當大嘅福音，以後都唔使為轉台問題而嘈交。佢又比喻，六年前補考已經通知要改善，六年後經過七名委員重新審查，仍然以懸殊比數決定不予許可換照，咁樣唔可以歸咎係新聞自由被扼殺。[10]
參考
- ↑ 1.0 1.1 1.2 1.3 黃有容、何醒邦 (2020-11-19)。〈NCC列四大理由 不予中天新聞台換照〉 (中文)。聯合報。喺2020-11-25搵到。
- ↑ 2.0 2.1 2.2 2.3 2.4 2.5 〈屢罰不改 蔡衍明涉介入製播 中天新聞台不獲續牌〉。am730。2020-11-19。喺2020-11-25搵到。
- ↑ 3.0 3.1 楊綿傑 (2020-11-25)。〈中國國台辦不滿中天換照未過 NCC反嗆：有些國家還沒得申請〉 (中文)。自由時報。喺2020-11-25搵到。
- ↑ 4.0 4.1 溫貴香 (2020-11-19)。〈中天換照遭駁 府院：尊重NCC依法決議〉 (中文)。中央通訊社。喺2020-11-25搵到。
- ↑ 5.0 5.1 5.2 5.3 5.4 遠見編輯部 (2020-11-19)。〈中天新聞台被鍘！郭台銘、陳文茜、韓國瑜他們這樣看…〉。遠見雜誌。喺2020-11-25搵到。
- ↑ 黃順祥 (2020-11-24)。〈「沒有為民主自由奮鬥過一天」 陳文茜批蔡英文心中無言論自由價值〉。《新頭殼新聞網》 (中文)。喺2020-11-25搵到。
- ↑ 〈中天換照｜若關台！韓國瑜「臺灣民主也會關門」〉。《蘋果新聞網(台灣)》 (臺灣中文)。2020-10-20。喺2020-11-25搵到。
- ↑ 周怡孜 (2020-11-18)。〈中天新聞台換照被駁 韓國瑜說話了〉 (中文)。鏡週刊。喺2020-11-25搵到。
- ↑ 〈無國界記者：NCC不予中天新聞台換照令人遺憾，但不涉及侵害新聞自由〉。《獨立評論@天下雜誌》 (中文)。2020-11-19。喺2020-11-25搵到。
- ↑ 黃順祥 (2020-11-19)。〈中天新聞台換照遭駁 呂秋遠：同意換照才是傷害新聞自由〉。《新頭殼新聞網》 (中文)。喺2020-11-25搵到。