中文系統

行緊 DOS 中文系統嘅列車月台顯示屏，可以睇到大部分嘅字都唔係正方

中文系統係一種外掛程式，用喺唔支援中文嘅作業系統上面，用唔同嘅方法，夾硬整到用家可以睇同打中文。中文系統基本上係微軟系統（PC 機）用嘅嘢，最先喺 DOS，後來喺 Windows；喺 Windows 改用統一碼，可以正常顯示中文之後開始式微。

出名嘅 DOS 中文系統包括臺灣出嘅國喬中文系統同倚天中文系統等等，Windows 嘅中文系統就包括例如澳洲嘅南極星。另外仲有第啲，例如有香港報館用咗中國北大方正嘅產品。

DOS 時期嘅中文系統係所謂 TSR 程式。亦會好多時利用顯像管嘅特性，繞過應用程式介面（BIOS）直接整到張顯示卡用唔標準嘅熒幕解像度，等熒幕可以出到多啲字，通常係至少要出多一行，用來lei4顯示用緊嘅輸入法、全形定半形、打緊嘅字根、用緊嘅內碼等等。因為爾啲唔標準嘅解像度淨係中文圈先有人用，後來出現嘅虛擬機並會唔識支援爾啲解像度。

Windows 改用統一碼之後，中文系統嘅中文處理會好易會同 Windows 本身嘅中文處理撞，一啲用家會基於 Windows 嘅輸入法唔好用，繼續用中文系統，但係閂咗佢嘅顯示功能，再將輸入法設定成統一碼輸出，將中文系統變咗額外嘅輸入法。

喺設計 CSS 嗰陣，中文空格同正方唔對應嘅問題一直都被忽略，直到2023年先有人提，亦即係中文字形一直被當成一定係正方形；但係喺 DOS 嘅中文系統其實中文字形從來都唔係正方，基本字形雖然係正方，但係印嘢嘅時候可以用控制碼隨時將字形變濶變窄。

好多中文輸入嘅習慣都可以直接追溯到 DOS 時代嘅中文系統，例如撳 Control-space 轉換中英文輸入、Shift-space 轉換全形半形等等都係 DOS 時期定嘅習慣。