解像度

出自維基百科,自由嘅百科全書
呢張圖顯示晒最常見嘅解像度。每種顏色代表一個顯示嘅比例(例如紅色代表4:3)。
呢張圖顯示晒最常見嘅解像度。每種顏色代表一個顯示嘅比例(例如紅色代表4:3)。

解像度resolution)喺電腦圖像上係指一幅圖嘅精細度。如果淨係講一張圖,一般指有幾多粒像素,通常寫做×,例如 1024 × 768 即係闊1024像素、高768像素。

印刷平面設計,解像度亦可以指印刷出來嘅實際點陣密度,例如每吋有幾多點(dots per inch,DPI),例如 300 DPI 即係印出來係每吋有 300 點。另外,電腦上面嘅點陣圖亦可以指明幅圖 「應該」 印幾大,爾個數值嘅單位通常係每吋有幾多像素(pixels per inch,PPI)。正式來講因為一個像素除非係專色印刷,通常要用多個網點先印到,所以 DPI 同 PPI 唔係同一樣嘢,但係一般來講,如果話啲圖要 300 DPI,其實係指 300 PPI。

解像度本來係指某件架生可以解析(resolve)圖像嘅能力,所以本來唔可以話一幅圖本身有幾高解像度,而只能夠話例如某一個電腦熒光幕嘅解像度係 1024 × 768(大啲嘅圖解析唔到),或者某部印刷機嘅解像度係 2400 dpi(再細啲嘅網點印唔出)。而今我哋講某張圖有幾高解像度其實係假定咗佢唔係原圖,而係用某種方法由原圖縮細之後嘅衍生物。