中華人民共和國對中華民國喺國際社會地位嘅影響

中華人民共和國政府一直對中華民國政府治下嘅臺灣地區有主權主張，但中華民國政府亦有堅持發展自己喺國際社會嘅地位。不過，建基於主權主張，中華人民共和國政府不時會要求，甚至施壓其他政府或者國際組織，唔畀中華民國政府參加，或者要用『中華台北』或者『中國台灣』嘅名義。中華人民共和國政府呢啲做法，除咗喺政治層面外，甚至出現喺人道救援等公共衛生嘅議題上。喺中華人民共和國政府以外，呢啲做法亦得到一啲中資公司或者中華人民共和國非官方機構支持同跟從。

九二一地震期間被指阻撓臺灣求援

内文：九二一地震

有部份意見認為，中華人民共和國喺九二一地震阻攔各國對臺灣嘅支援，甚至施壓各國，話任何援助大地震嘅行為（捐款、救災物資、救難援助）都要得到中華人民共和國同意，又指責中華民國政府只係地方政府，利用地震同各國作外交接觸。

武漢肺炎疫情期間被指阻撓臺灣購買疫苗

内文：武漢肺炎臺灣疫情

喺武漢肺炎疫情期間，全球搶購疫苗。不過，中華人民共和國就被指阻撓臺灣購買疫苗。喺2021年6月，美國一名高級官員就美國捐贈疫苗接受路透社訪問嘅時候就話，佢哋捐疫苗畀臺灣，係基於要拯救生命，而唔係有政治或者經濟嘅考慮，美國又批評，中華人民共和國除咗阻止臺灣攞到疫苗之外，仲好積極咁利用疫苗捐贈作為手段，誘使更多中華民國邦交國同中華民國斷交。除咗美國之外，日本亦有唔少呢啲批評。

呢個議題亦引申到國民黨同民進黨之間嘅罵戰，其中喺2021年9月，國民黨立委、主席江啟臣就曾經批評民進黨籍行政院長蘇貞昌，質疑政府無辦法保證足夠疫苗運到嚟臺灣，要求蘇貞昌落台。當時蘇貞昌就反駁，話政府一直努力爭取疫苗嚟到臺灣、控制好疫情，但江啟臣明知道中華人民共和國喺度阻撓就一句都唔敢批評中華人民共和國。

中華人民共和國政府面對呢啲批評嘅回應

中華人民共和國政府面對國際社會呢方面批評嘅時候，多數都係強調臺灣係中華人民共和國嘅一部分，國際社會唔應該干預中華人民共和國內政。