中華人民共和國高速鐵路

  呢篇文講中國大陸嘅高速鐵路網同埋計劃。想搵中國鐵路嘅高速列車及技術（包括高鐵同普鐵）嘅話，請睇中國鐵路高速列車。

中國大陸嘅高鐵網。

  300 - 380 km/h

  200 - 299 km/h（新綫）

  200 - 250 km/h（提速綫）

  其他鐵路綫（冇高速化）

 中華人民共和國高速鐵路（粵拼：zung1 waa4 jan4 man4 gung6 wo4 gwok3 gou1 cuk1 tit3 lou6） ，簡稱中國高鐵，係指中國大陸嘅高速鐵路網絡及發展計劃。呢度嘅「高速鐵路」係指時速喺200 km/h及以上嘅鐵路服務。根據呢個時速定義，中國高鐵係世界上營業里程最長嘅高鐵系統，長達1萬6千公里（2014年12月數字，呢個數字係客運專用嘅綫路長度，排除咗三千公里嘅客貨兩用高鐵綫），重長過世界其餘所有高鐵夾埋嘅里程。當中中國高鐵有世界最長嘅高鐵綫京廣高鐵，長達2298公里。

中國大陸鐵路嘅高速服務開始於2007年，當時搞鐵路第六次提速，喺原有鐵路上引入咗高速列車；直到遞年嘅2008年中國大陸先開通專門嘅高鐵綫京津城際鐵路。而家中國起好咗好多條高鐵綫，除咗專門起嘅高鐵綫外，一啲原有嘅鐵路亦高速化，而喺未來有好多計劃緊嘅高鐵綫、提速計劃，當中唔少已經喐手開工。根據中國大陸嘅中長期鐵路網規劃，到2015年底中國大陸基本起好「四縱四橫」嘅高鐵骨架，而到2020年時速200公里以上嘅中國大陸鐵路里程超過三萬公里。而家中國大陸嘅高鐵非常之繁忙，2007年到2014年間累計客流31.6億人，佔鐵路客流嘅比重由2007年嘅4.8%上升到2014年嘅38.5%，到2015年1月日均客流249萬人。

鐵路網方面，中國大陸高鐵經過33個省級政區中嘅28個，覆蓋160幾個地級市（佔所有地級以上城市嘅55%以上）。營運方面，由中國鐵路總公司營運。

對於中國大陸當局，起高鐵係擴大內需來刺激經濟增長嘅手段之一，所以起到霖霖聲，不過2011年原先嘅鐵道部長劉志軍因爆出貪腐而拉咗，同年發生温州高鐵事故，令公眾集中爆發對國有鐵路嘅不滿，高鐵呢範就有諸如安全隱患、票價高、利用率低、高鐵建設嘅財政負擔、起高鐵造成嘅環境破壞等等嘅不滿，呢啲輿論壓力令中國大陸高鐵進程放慢咗。技術方面，早期中國大陸高鐵用嘅外國轉讓嘅技術，包括亞世通（法國）、西門子（德國）、龐巴迪（加拿大）、川崎重工（日本），後來中國工程師自行研發出中國高鐵技術，時速高達380公里。