哈大客運專綫

哈大客運專綫
哈大高鐵地圖
概況
類型	高速鐵路
現狀	營運緊
所在地	中國東北地區
起終點	哈爾濱西站 ─ 大連站
站數	23
等級	客運專綫
一日客流量	6.4萬人次
營運
開通	2012年12月1號
形態	地上鐵路
車型	CRH380B型高寒動車組
綫路資訊
總長短	921 km（572 mi）
軌道數	全綫複綫
軌距	1435 mm（標準軌）
最大坡度	20 ‰
最短半徑	7,000 m（23,000 ft）
電氣化	50Hz 25 kV（交流電、高架電纜） 全綫電氣化
最高速度	350 km/h（220 mph）

哈大客運專綫綫路圖
例 鐵路：濱洲綫、濱北綫 高鐵（起緊）：哈齊高鐵、哈牡高鐵、哈佳高鐵 km 哈爾濱站 0 哈爾濱西站 40 雙城北站 98 扶餘北站 156 德惠西站 240 長春西站 303 公主嶺南站 358 四平東站 409 昌圖西站 437 開原西站 484 鐵嶺西站 538 瀋陽北站 543 瀋陽站 瀋陽南站 608 遼陽站 638 鞍山西站 677 海城西站 715 營口東站 743 蓋州西站 772 鮁魚圈站 843 瓦房店西站 880 普灣站 921 大連北站 938 大連站

 哈大客運專綫（粵拼：haa¹ daai⁶ haak³ wan⁶ zyun¹ sin³） ，又嗌哈大高（速）鐵（路）haa¹ daai⁶ gou¹ cuk¹ tit³ lou⁶（英文：Harbin–Dalian High-Speed Railway），係位於中國東北地區嘅高速鐵路，連住哈爾濱到大連，全長921公里。呢條高鐵喺2007年8月破土開工，喺2012年12月1號正式通車，係世界上第一條喺高寒地區營運嘅高鐵。哈大高鐵條綫路基本同哈大綫一樣，不過經嘅站唔同，唔用哈大綫條鐵軌。

概況

喺中國國務院制定嘅《中長期鐵路網規劃》當中，高鐵幹綫嘅架構嗌做「四縱四橫」，哈大高鐵就係其中一條「縱」嘅組成部份，呢條縱即係京哈客運專綫，由京瀋高鐵、哈大高鐵、盤營高鐵組成。呢條高鐵綫從黑龍江嘅哈爾濱到遼寧嘅大連，總共長921公里，其中遼寧段長553公里、吉林段長270公里、黑龍江段長81公里。作爲客運專綫，佢嘅速度夠曬快，平均速度200 km/h，最高速度350 km/h。

條高鐵喺2007年8月23號正式動工，2012年10月8號開始試運，當年嘅12月1號就正式通車喇。

成條高鐵綫有成三分二以上嘅路段喺高架橋度。而過河嘅橋多達162條，呢啲橋嘅長度夾埋有663公里，最長嗰條橋係伊通河特大橋，長達57公里。隧道有8條，夾埋嘅長度達9.9公里，最長嘅隧道係九里莊隧道，長達4.33公里。全綫橋隧長度佔總長嘅74%。

營運現況

而家有「冬夏兩張列車運行圖」，即係車速同車票價喺冬、夏兩個時段係唔同嘅。夏季時段係指4月1號到11月30號（共八個月），呢時嘅速度等級係300 km/h，而冬季時段係指12月1號到遞年3月31號（共四個月），呢時嘅速度等級係200 km/h，票價方面夏季時段貴過冬季時段。

哈大高鐵唔一定全程都高速，大連、瀋陽有啲路段可能係普速，其中大連普速路段係大連北站到大連站，瀋陽普速路段係瀋陽北站到瀋陽站。當中大連北站係新起嘅，係哈大高鐵嘅配套大站，打算成爲綜合交通樞紐，不過地方偏遠，嗰度係郊區，接近大連開發區，離大連市區咁遠，啲市民坐車唔方便，於是條綫路延長到大連站，作爲始發終到站，呢兩個站之間嘅路段係舊有嘅，已經由普通鐵路改成高速鐵路。雖然延長咗路段，但始終大連北站係高鐵專屬站，所以大連站到大連北站之間有普速通勤車，大連北站係高速同普速車嘅換乘站，於是呢兩個站之間有普速段，過咗大連北站打北，先至慢慢提速。

瀋陽站同瀋陽北站都位於瀋陽市區，距離唔遠，都停呢兩個站嘅車唔使太高速度，而瀋陽站本身亦接受普速車，計劃成爲中國東北最大嘅火車客站，因此成爲高鐵上主要到發站。爲咗配合哈大高鐵開通，亦爲咗籌辦2013年8月嘅全運會，瀋陽站大修過，車站嘅東口大樓大規模改造，但留返歷史建築嘅外觀，西口起新站樓，成個站擴容，面積至少擴大一倍，可以接受更大客流，多個出口亦方便旅客上落。