路環

由安德魯餅店睇路環衛生中心 (右) 同恩尼斯總統前地

路環（葡文：Coloane），又叫路環島（葡文：Ilha de Coloane），係澳門嘅一個地方，而家亦係組成澳門嘅四大部份（區域）之一。喺未填海之前，路環係一個島，離氹仔個島南面約莫兩千米，不過兩個島之間填晒海，新填地叫路氹城。島嘅西南面係珠海市嘅橫琴島，兩島最窄嘅地方唔夠300米。

歷史

路環其實係路灣。因為廣東話有時將灣讀做環。路灣古書上叫佢做過路灣，葡文名 Coloane 亦印證呢點。路環個名就係咁來。古書上亦有寫做九澳，鹽灶灣等。呢啲都係島上某啲地方嘅代表。

大宋起，個島都係鹽場之地，海邊係產鹽。大明同大清時，路環係歸廣東香山所管。

1864年，葡人乘大清敗於英國之際，佔領路環。

以前路環居民來往澳門半島同氹仔係用渡輪。

地理

路環島屬於聖方濟各堂區，上邊丘陵起伏，地勢係成個澳門最高，冇乜平地。路環面積大約7.6平方公里，2011年人口大約有4,300人。

山

路環成個區域大部分地方都係山。路環島最高點係疊石塘山（塔石塘山），同時又係澳門最高嘅山，有海拔172.4米高。疊石塘山半山以上嘅地區，被劃定為郊野公園，受到嚴格保護。

郊野公園

澳門大部分郊野公園都喺路環，佢哋係黑沙水庫郊野公園、石排灣郊野公園同九澳水庫郊野公園。

海灘

每年吸引好多人去嘅黑沙海灘同竹灣海灘都喺路環。

食

由安德魯餅店望路環衛生中心 (右)同恩尼斯總統前地

澳門葡撻嚟自路環市區安德魯餅店。

發展

路環島因為離澳門市區最遠，發展比較慢，以前係以漁業為主，重有啲船廠。呢幾年喺東北岸九澳起咗發電廠同埋水泥廠同深水港，西北部填海拓地準備發展工業。黑沙海灘同竹灣海灘係路環島嘅兩個海灘，分別喺島東南同南。隨住澳門嘅發展，路環嘅發展步伐亦都係加快緊。