何建宗 (生態學家)

何建宗教授，BBS，JP（英文：Prof. Ho Kin-chung）係紅潮同水質研究專家，香港極地研究中心創辦人，曾經喺環境保護署工作過十年，前香港公開大學科技學院院長，從事水質工作、水污染研究長達40年時間^[1]。

簡歷

何建宗喺香港培正小學同香港培正中學畢業^[2]，之後喺香港中文大學新亞書院主修生物系，1979年理學士（榮譽）畢業，1980年獲英國University of Salford環境資源學碩士，1991年以在職兼讀方式獲得香港大學（植物學系）哲學博士。博士論文為「亞熱帶海區紅潮之特徵」。2007年，佢又以兼讀方式獲得「香港公開大學」頒授嘅教育學碩士。何博士喺1981-1992年3月任職香港政府「環境保護署」（1986年4月前稱為「環境保護處」），係當時政府公務員中環保嘅開山擘石人物之一，主要任職喺「水質政策組」。佢喺1992年4月轉職到香港公開進修學院任教擔任高級講師，之後學院升格為「香港公開大學」，佢經獨立評審之後轉職級為副教授，之後喺2002年晉升為教授，係香港公開大學首位獲晉升教授嘅重量級學術人物。佢分別喺1999、2001同2004年三度獲得香港公開大學「校長卓越成就獎」，喺2009年奪得「中國環境人物成就獎」、2011年獲譽為「科學中國人（2010）年度人物」、2012年獲「美麗中國-時代領袖獎」、2014年獲香港公開大學評審為「伍振民環境科學及生態保育教授」，此外，亦曾經喺多個國際獎項獲得殊榮，包括喺「日內瓦創新發明展」中獲得銀獎。佢出版咗四百幾篇論文，分別喺國際學術期刊同國際學術研討會論文集中發表，又主編同撰寫咗四十幾本書、二十幾個政府同機構嘅專業技術報告，亦製作咗八套遠程學習（又叫「遙距學習」, Distance Learning) 教材。佢並且創辦咗香港公開大學嘅「創新科技及持續發展研究所（IRITS)」，曾經出任佢督導委員會主席三年。校政管理方面，佢喺2006年9月起署任香港公開大學科技學院院長，當時亦兼任環境學課程同應用科學課程主管（系主任），並喺同時擔任主理學生事務嘅「學生事務委員會」主席。何教授喺2008年5月獲正升晉升為科技學院院長。亦為大學爭取到唔少硏究同發展、獎助學金資源。設立咗唔少新頴而社會實用科目，例如：「檢測和認證」、「能源管理與可持續發展」、「環境、安全和健康」等，直到2018年5月喺香港公開大學榮休。

學術範疇

何建宗嘅學術範疇廣泛，包括：有害藻華（紅潮）、環境科學、海洋生態、環境監測、水質同水環境管理（污水同食水處理）、環境政策（環境影響評估、環境管理學、跨境環境管理政策、環境法律、可持續發展）、環境倫理（生態哲學、生態神學）、環境教育（綠色學校、NGO、綠色運動）等。除咗進行大量研究同講學活動之外，亦經常喺報紙撰稿同接受傳媒採訪，對香港政府喺環保、水質、生態等方面嘅施政發表論述，並喺擔任嘅公職中發揮所長。

極地研究

1993年，經極地探險家李樂詩介紹，何建宗展開咗極地方面嘅研究，之後曾經十五次到訪北極、四次親臨南極進行環境同生態調查，主要從事紅潮藻類嘅全球生物地理分佈、海洋營養鹽同微藻、極區海洋產生藻華機制、冰區海岸嘅植物分佈同生態特徵、極地氣候下嘅地衣品種等研究。何建宗係繼李樂詩之外，去過南北極次數最多嘅香港人。

休閒活動

何建宗喺休閒嘅時候鍾意創作新詩、書法、畫畫（特別係漫畫）。書法曾經多次喺展覽會度展出，並曾經喺韓國獲獎。佢亦熱愛運動，例如：馬拉松跑、行山、潛水、八段錦等。

學歷

國家／地區	頒授機構	學術資格
香港	香港中文大學	生物學榮譽學士
英國	索耳福大學（University of Salford）	環境資源學碩士
香港	香港大學	植物學哲學博士
香港	香港公開大學	教育學碩士、教育行政管理深造證書

社會公職

著作

《悠悠大地》
《南極的呼號》
《珠江口海域的水化學環境》
《水舞人間》
《何説紅潮》
《極地的呼喚》

參考

↑ 環境學教授何建宗運動與海洋保育^{[失咗效嘅鏈]}
↑ 〈1975 年級昕社 | 香港培正同學會〉。原著喺2020年1月15號歸檔。喺2022年12月28號搵到。

[1] 環境學教授何建宗運動與海洋保育^{[失咗效嘅鏈]}

[2] 〈1975 年級昕社 | 香港培正同學會〉。原著喺2020年1月15號歸檔。喺2022年12月28號搵到。

[1]

[2]