何承天

何承天，SBS，OBE，JP（英文：Edward Ho Sing-tin，1938年 12月2號—）係香港畫則師兼政治人。

簡歷[編輯]

何承天喺1938年出世，中小學都係讀聖若瑟書院，並且喺香港大學建築系畢業。1969年加入王董建築師樓直到2015年退休。

1987年，何承天接替退休嘅陳壽霖成為立法局非官守委任議員，開始從政。

1991年，何承天由委任議員轉為參加功能組別選舉，以工商專聯嘅牌頭喺建築、測量及都市規劃界功能界別競逐連任。喺四人混戰底下，何承天以過半票數當選，之後何承天更加得港督委任做行政局議員，變身「雙料議員」。

1991年立法局選舉，港同盟大勝，成為立法會第一大黨。選舉結果令到政府同親政府保守派好詫異，認為港同盟勢力太強會威脅政府施政，於是選舉之後，以李鵬飛等人為首嘅保守派議員組成咗「啟聯資源中心」，抗衡民主派，當中何承天亦係創會成員之一。

1992年，對中國態度溫和嘅港督衛奕信畀當時嘅英國首相馬卓安換咗落嚟，改由彭定康接任最後一任港督。彭定康一上任就改變衛奕信對中國容忍嘅態度，實行政治改革。其中之一就係將「行政立法分家」。由於呢個政策，何承天要離開做咗只係接近一年嘅行政局。

1993年，何承天在內嘅十幾個立法局議員將啟聯資源中心改組成為自由黨，為之後嘅舉行嘅三級選舉準備。

到2000年，何承天繼續循建築、測量及都市規劃界競逐連任，但係輸咗畀劉炳章，從此告別立法會。

亞爸何少庵係香港報人，佢喺《華僑日報》效力將近四十年，係華僑日報嘅秘書，同時喺香港報業公會創會之初就做司庫直到過身；亞媽係梁寶芳，佢重有兩個細佬妹^[1]。

老婆係郤丹華。

由佢亞爸開始，何承天一家四代人都係聖若瑟書院嘅舊生，而灣仔活道嘅聖若瑟小學校舍亦係出自何承天嘅手筆^[2]。