公明黨

出自維基百科,自由嘅百科全書
Jump to navigation Jump to search

公明黨日本嘅一個政黨,簡稱「公明」。喺1964年(昭和39年)11月17號成立,總部位於東京都新宿區南元町17。目前黨員有46萬人左右。

公明黨同宗教團體嘅關係一直係俾人非議嘅地方。公明黨同日本宗教組織創價學會關係密切,可以話係公明黨嘅母體。早年創價學會甚至會干預公明黨嘅人事安排,俾人指控違反「政教分離」嘅戰後日本憲法精神。後來公明黨搵咗啲唔係創價學會嘅人加入,去溝淡宗教色彩。不過公明黨仍然有唔少關於政教合一方面嘅指控。

黨史[編輯]

公明黨嘅歷史可以追溯到1954年創價學會嘅文化部成立。喺之後一年(1955年),文化部喺統一地方選舉入面開始支持候選人,而且大有殺獲。1956年更加向國政邁進,喺第4屆日本參議院議員通常選舉攞到3席。

1960年,池田大作成為創價學會會長。喺佢推動之下,創價學會更加喺政界加速發展,1961年,公明政治連盟正式成立。1964年,創價學會同公明政治連盟名義上分離,公明黨正式成立。

1969年,社會黨喺眾議院選舉大敗,社會黨內部開始提出一種同其他政黨合作嘅路線,聯合公明黨同民社黨對抗自民黨政權,「社公民路線」誕生。之後三黨雖然有時會有衝突,但係大部分時間都維持到合作關係。

1993年,公明黨聯同其他七黨組成「非自民非共產連合政權」,成功以些微差距令自民黨首次下野,公明黨第一次參與執政。但係唔夠一年,政權內部意見分歧,社會黨同新黨先驅重走去同自民黨組閣。公明黨喺執政10個月後就要落台。

同一年,公明黨加入新進黨,但係參議院部分就獨立出嚟成為一個院內會派「公明」。

1998年,新進黨因為黨內矛盾日益增加而宣布解散,原本屬於公明黨嘅議員喺解散後成立「新黨平和」同「黎明俱樂部」。同一年11月,三個會派重新合併做公明黨。

到1999年,公明黨受自民黨邀請加入政府,兩黨一直合作,直到2009年民主黨打低自民黨為止。到2013年,自民黨重新上台,公明黨又跟著一齊執政。

睇埋[編輯]