立憲民主黨 (日本2020年)
立憲民主黨（日文：立憲民主党／りっけんみんしゅとう Rikken minshu tō；英文：The Constitutional Democratic Party of Japan），簡稱民主黨，係依家日本最大在野黨，屬中間至中間偏左。黨代表係野田佳彥。
黨史
[編輯]2020年8月，舊嘅立憲民主黨同舊嘅國民民主黨達成咗共識，兩黨會喺9月合併，喺統一會派入面嘅組織──重建社會保障國民會議同無所屬論壇都響應加入新黨。新黨喺9月10號嘅黨名同黨代表選舉之前已經有149個國會議員表示會加入，當中包括立憲民主黨88人、國民民主黨40人、重建社會保障國民會議6人、無所屬論壇12人、參議院會派民友會2人同1個喺黨團入面嘅獨立人士。合併嘅方法沿用舊國民民主黨嗰陣嘅模式，舊國民黨想加入嘅新黨嘅人成立一個臨時政黨叫「民主黨」，然之後呢個民主黨就同立民黨佢哋合併做新黨。而國民民主黨有一派人唔打算加入新黨，包括黨代表玉木雄一郎，之後佢同其餘14個議員組成新嘅國民民主黨。
新黨嘅黨名同黨代表選舉喺9月10號舉行，有兩個人出嚟選黨代表，包括原先立憲民主黨嘅黨代表枝野幸男同國民民主黨嘅議員泉健太；黨名都有兩個提議，分別係「立憲民主黨」同「民主黨」，最後黨代表個位由枝野幸男贏咗，黨名亦都揀返枝野提議嘅「立憲民主黨」。喺黨代表選舉之後，再多1個眾議員加入，議員數目去到150人，當中有107個眾議院議員同43個參議院議員，係2012年以嚟，第一次有在野黨喺眾議院入面多過100席。
新嘅立憲民主黨就喺9月15號正式成立。到9月30號，立憲民主黨公佈咗新嘅黨徽。
喺枝野幸男帶領下，立憲民主黨奉行同國民黨、共產黨、社民黨等嘅中左翼政黨合作（在野共鬥），喺選舉一齊支持同一個候選人，好多選舉當中都有斬獲，例如：東京都議會選舉、橫濱市長選舉同國會議席補選。
2021年10月21號前係眾議院選舉舉行嘅限期，但係自民黨臨陣易帥，結果趕唔切喺限期前進行大選，最後大選要定喺10月31號舉行，係日本戰後第一次出現噉嘅情況。呢屆立憲民主黨同其他左翼政黨整合，喺小選舉區盡量只係派一個候選人，令在野黨喺搖擺區贏到多啲席位，最初選前民意調查話立憲民主黨會多20幾席，不過越接近選舉，立憲民主黨喺民調嘅優勢就越嚟越少，甚至有民調話立民黨嘅議席會倒跌，最後喺「在野共鬥」嘅策略下，立民黨得96席，輸咗14席去，黨內大佬同長勝將軍紛紛落馬：小澤一郎、中村喜四郎、中川正春、渡邊周要靠比例復活當選；辻元清美、平野博文更加要告別議會。分析話係因為立民黨同共產黨呢幾年行得太埋，結果嚇窒咗唔滿意自民黨政府，但又對共產黨冇好感嘅中間選民，令佢哋投向國民黨或者維新會呢啲中間派或者在野右翼政黨。
選舉輸咗之後，黨代表枝野幸男請辭，代表一職要進行補選，有4個人去爭，分別係：逢坂誠二、小川淳也、泉健太同西村智奈美，最後由立場冇咁偏左，喺創黨代表選舉輸過嘅泉健太贏咗。
2022年參議院選舉，立憲民主黨嘅席位數目繼續減少，32個單議席選區入面，在野黨贏得4個位，當中2個屬於立民黨，而全國比例區嘅得票更加跌到全國第三，畀日本維新會超越。
但隨住自民黨因為統一教爭議、政治獻金醜聞，同埋日圓匯率低而造成嘅物價飆升等因素，執政黨民望下挫，包含立民黨在內嘅在野黨民望就開始回升。2024年9月，立民黨舉行新一屆黨代表選舉，除咗時任黨代表泉健太競逐連任，重有上手代表枝野幸男、做過首相嘅野田佳彥，同埋眾議員吉田晴美，民調顯示黨代表主要係枝野同野田兩個人之爭。到選舉當日，由於冇人可以攞到過半票數，最高票嘅兩個候選人：野田同枝野進入第二輪選舉，泉健太提早宣佈連任失敗。最後野田喺第二輪選舉繼續領先優勢，贏咗枝野幸男，成為立民黨第三任代表。
