國民民主黨 (日本)
國民民主黨（日文：国民民主党／こくみんみんしゅとう；英文：Democratic Party For the People），簡稱「國民黨」。依家係日本其中一個在野黨，喺2018年5月7號成立。立場自稱係中間派，由舊希望之黨同民進黨合併而成，黨代表係玉木雄一郎。
歷史
[編輯]當初民進黨旨意靠東京都知事小池百合子喺東京都議會選舉嘅餘威領導反安倍晉三路線嘅候選人，務求贏得眾議院選舉，於是叫民進黨員「借殼」希望之黨出選，點知小池唔肯接收所有民進黨員，要揀過先，加上佢又唔肯辭職選國會議員等等不利因素，搞到希望之黨選舉成績好差。選後小池辭任希望之黨代表，話要專注都政。希望之黨代表就由玉木雄一郎接任。
選舉之後，民進黨一直接觸立憲民主黨同希望之黨，希望統一返三個黨，最初民進黨建議三黨合組統一會派（黨團），不過好快立憲民主黨拒絕咗，民進黨同希望之黨繼續傾嘅時候，因為雙方意見南轅北轍，反而觸發唔少民進黨參議員「轉會」去立憲民主黨。最後雙方都係組唔成統一會派。
到咗2018年3月，讀賣新聞開始傳民進黨同希望之黨傾緊合併嘅事，建議最終成事。消息公報之後，兩邊都有議員反對合併。民進黨方面，反對嘅議員好多加入咗立憲民主黨；希望之黨方面，就有人轉做獨立議員，例如一開始就由民進黨走咗去希望之黨嘅細野豪志，一班本身由右翼政黨轉投嘅議員（好似松澤成文）就組成新嘅希望之黨。多數人有民進黨身份嘅院內會派無所屬之會，就話會繼續喺兩黨（國民民主黨、立憲民主黨）之間進行協調。最後民進黨同希望之黨都係得一半人加入呢個新黨。
國民民主黨組成嘅方式好特別，首先，舊希望之黨解散，然後成立咗一個叫「國民黨」嘅新黨同埋新嘅希望之黨，跟著呢個「國民黨」即日就整體合併落民進黨度，成為國民民主黨。所以名義上，國民民主黨繼承咗以前民主黨同民進黨嘅身份。
2019年1月24號，國民民主黨同自由黨喺國會組成統一會派。到咗4月26號，兩黨終於合併，自由黨大部分議員都加入咗國民民主黨。
同一年7月，國民民主黨迎嚟2019年日本參議院選舉，呢次亦都係創黨之後嘅第一場選舉，結果國民黨贏咗6席，比起選之前少2席，同時比例代表嘅票數亦都少過2017年希望之黨嗰時好多。日本主張修憲嘅政黨爭4席就達到修憲嘅門檻。同一時間，黨內有參議員提出要同主張修憲嘅日本維新會組成統一會派，後來更加指自民黨想同國民黨組成「大聯合政府」，不過後嚟國民黨同其他在野黨合組統一會派，「大聯合政府」嘅構想就冇咗。
喺參議院選舉完咗之後，原本對在野黨派合併比較反對嘅立民黨，態度開始軟化，因為今次佢哋比起上次眾議院選舉少咗足足300萬票。到9月，立民黨、國民黨等嘅在野黨派成立咗統一會派（黨團）。到10月，兩個黨開始為合併交換意見。2020年1月，國民黨開始表決係咪要同立憲民主黨合併，但係被否決。到2月，喺參議院嘅統一會派更加鬧出要解散嘅風波，但係最終都冇解散到。
到2020年7月，兩個黨從頭傾過合併嘅事，到8月，兩個黨終於講掂數，會喺9月合併做一個新黨。不過國民黨內部有一班人因為政見唔同，唔會加入立憲民主黨嗰邊，包括黨代表玉木雄一郎。
2020年9月15號，國民民主黨同立憲民主黨合併成新嘅立憲民主黨，而玉木雄一郎就同另外14名議員組成新嘅國民民主黨。
